အပစ်ရပ်သွားသည့် တိုင်းရင်းသားလက်နက်ကိုင်တပ်ဖွဲ့များအား မတရားအသင်းမှ ဦးသိန်းစိန်အစိုးရပယ် ဖျက်ပေးသင့်ကြောင်း သျှမ်းပြည်တပ်မတော် RCSS/SSA ကိုယ်စားလှယ်အဖွဲ့ဝင်တဦးကဆိုသည်။


“အပစ်ရပ်ရုံနဲ့မပြီးဘူးပေါ့၊ အပစ်ရပ်သွားတဲ့ လက်နက်ကိုင်တိုင်းရင်းသား တပ်ဖွဲ့အားလုံးကို မတရား အသင်း ကနေ တရားဝင်ပယ်ဖျက်သင့်တယ်။ အဲဒီလိုမလုပ်ရင် လူထုက အပစ်ရပ်တဲ့အပေါ် ဘယ်အယုံအကြည် ရှိမတုန်း”- ဟု မကြာမှီ ကျိုင်းတုံ၌ အစိုးရကိုယ်စားလှယ်နှင့် သွားရောက်တွေ့ဆုံမည့် RCSS/SSA ကိုယ်စားလှယ်အဖွဲ့ဝင်တဦး ကပြောပါသည်။


ဦးသိန်းစိန် အစိုးရ ကိုယ်စားလှယ်များသည် အင်အားကြီး အပစ်ရပ်တိုင်းရင်းသား လက်နက်ကိုင်တပ်ဖွဲ့ အချို့အား ပြည်ထောင်စုအဆင့်အဖြစ်ဆက်တိုက် လက်ခံတွေ့ဆုံခဲ့၏။ ၁၉၉၆ ကတည်းက တကြိမ်တခါမှ အပစ်မရပ်ဖူးသည့် သျှမ်းပြည်တပ်မတော် (တောင်ပိုင်းတပ်ဖွဲ့) နှင့်လည်း မကြာမှီ ပြည်ထောင်စုအဆင့် ဒုတိယ အကြိမ်တွေ့ဆုံဆွေးနွေးမည်ဖြစ်၏။ သို့သော် ထိုတိုင်းရင်းသားလက်နက်ကိုင်တပ်ဖွဲ့များအား တကြိမ် တခါမျှ မတရားအသင်းမှ ပယ်ဖျက်ကြောင်း ထုတ်ပြန်ခြင်းမရှိခဲ့သေးပေ။


“ရှင်းရှင်းပြောရင်ဗျာ၊ အခုအပစ်ရပ်တယ်လို့တာပြောတယ်။ မကြာခဏ သေနတ်သံထွက်တယ်။ တိုင်းရင်းသား လက်နက်ကိုင်တပ်ဖွဲ့နဲ့ ပတ်သက်တဲ့သူတွေကို လိုက်လံဖမ်းဆီးတယ်။ ဘယ်လို အယုံအကြည်ရှိနိုင်မလဲ။ မြို့ထဲ ဝင်လာတဲ့ သျှမ်းစစ်သားတယောက်ကို လွတ်လွတ်လပ်လပ်စကားပြောဖို့ မရဲဘူး” - ဟု သိန္နီမြို့ခံ တဦး ကပြောပါသည်။


လက်ရှိဦးသိန်းစိန်အစိုးရ နှင့် အပစ်ခတ်ရပ်စဲသော တိုင်းရင်းသားလက်နက်ကိုင်တပ်ဖွဲ့များမှာ - သျှမ်းပြည် တပ်မတော် နှစ်ဖွဲ့ RCSS/SSA နှင့် SSPP/SSA ၊ မွန်ပြည်သစ်ပါတီ NMSP ၊ ၀ ပြည်သွေးစည်းညီညွှတ်ရေး ပါတီ UWSP/UWSA၊ မိုင်းလားတပ်ဖွဲ့ ခေါ် အမျိုးသားဒီမိုကရက်တစ်မဟာမိတ် တပ်မတော် သျှမ်းပြည်အရှေ့ ပိုင်း NDAA-ESS ၊ ကရင်နီအမျိုးသားတိုးတက်ရေးပါတီ KNPP ၊ ကရင်အမျိုးသားအစည်းအရုံး KNU ၊ ချင်း အမျိုးသားတပ်ဦး CNF ၊ ရခိုင်လွတ်မြောက်ရေးပါတီ ALP နှင့် အပစ်ရပ်သဘောတူညီချက် တခါမျှမပျက် ဖူးသည့် သျှမ်းပြည် တောင်ပိုင်းမှ KNLP ကယန်းအမျိုးသားလွတ်မြောက်ရေးပါတီ တို့ဖြစ်သည်။


ညှိနှိုင်းနေဆဲတပ်ဖွဲ့များမှာ ပလောင်ပြည်နယ်လွတ်မြောက်ရေးတပ်ဦး PSLF ၊ ဝ အမျိုးသားအဖွဲ့ချုပ် WNO/WNA ၊ လားဟူ ဒီမိုကရက်တစ်အစည်းအရုံး LDU နှင့် တိုက်ခိုက်ဆဲ ဆွေးနွေးညှိနှိုင်းရေးလုပ်ပြီး မအောင်မမြင်ဖြစ်နေသည့် ကချင်လွတ်လပ်ရေးအဖွဲ့ချုပ် KIO/KIA တို့ဖြစ်သည်။