ဒေသအလိုက် အမျိုးသားအဆင့် နိုင်ငံရေးဆွေးနွေးပွဲတတိယနေ့ စာတမ်းအနှစ်ချုပ်ဖတ်ကြားပြီးစီး



ဧပြီလ  ၂၃  ရက်နေ့မှစ၍  ၂၅  ရက်နေ့အထိ  သျှမ်းပြည်နယ် တောင်ကြီးမြို့တွင် ကျင်းပလျက်ရှိသော ဒေသ အလိုက်အမျိုးသားအဆင့်နိုင်ငံရေး ဆွေးနွေးပွဲတွင် တတိယနေ့တွင် စာတမ်းအနှစ်ချုပ်ဖတ်ကြားပြီးစီး ရာ စာတမ်းပေါင်း  ၆၃ စောင်နှင့်ဖြည့်စွက် ဆွေးနွေးအကြုံ ပြုစာ  ၄၅  စောင် လက်ခံရရှိခဲ့ကြောင်းသိရ သည်။


အဆိုပါစာတမ်းများတွင်နိုင်ငံရေးနှင့် သက်ဆိုင်သော စာတမ်းပေါင်း ၂၈ စောင်၊ ဆွေးနွေးအကြုံ ပြုစာ ၂၃  စောင်၊ စီးပွားရေးနှင့်ဆိုင်သော စာတမ်းပေါင်း ၂၇ စောင်နှင့်ဆွေးနွေးအကြုံပြုစာ  ၉  စောင်၊ မြေယာနှင့် သဘာဝသယံဇာတနှင့်ဆိုင်သော စာတမ်းပေါင်း အစောင် ၃၀ နှင့်ဆွေးနွေးအကြုံပြုစာ  ၁၃ စောင်တို့ပါဝင်လာရာသက်ဆိုင်ရာ အကြောင်းအရာအလိုက် သီးသန့်တင်သွင်းစာတမ်းများပါဝင်ပြီး ၊ စာတမ်းတစ်စောင်တည်းတွင် အကြောင်းအရာ တစ်မျိုးထက်ပို၍ရေးသား ထားသော စာတမ်းများလည်းပါရှိသည်ဟု  ဆွေးနွေးမည့်အကြောင်းအရာ များကို သဘောထားစုစည်းချက်များလက်ခံ ထိန်းသိမ်း ပြုစုရေး လုပ်ငန်း ကော်မတီ ဥက္ကဋ္ဌ -  သျှမ်းပြည်နယ် သယံဇာတနှင့် သဘာဝပတ်ဝန်းကျင် ထိန်းသိမ်းရေး ၀န်ကြီး ဒေါက်တာ ညီညီအောင် က ပြောကြား ခဲ့သည် ။


သျှမ်းပြည်နယ် ဒေသအလိုက်အမျိုးသားအဆင့်နိုင်ငံရေးဆွေးနွေးပွဲ စာတမ်းသုံးစောင်ကို သဘာပတိများ နှင့်တက်ရောက်သူများ ရှေ့မှောက်တွင် အတည်ပြုချက် ရယူပြီး အတည်ပြုစာတမ်းများအား  သျှမ်းပြည်နယ် ဒေသအလိုက်အမျိုးသားအဆင့်နိုင်ငံရေးဆွေးနွေးပွဲ ဖြစ်မြောက်ရေး ဦးစီးကော်မတီ ဥက္ကဋ္ဌ ၊  သျှမ်းပြည်နယ် ၀န်ကြီး ချုပ်မှတစ်ဆင့်  သျှမ်းပြည်နယ်အမျိုးသားအဆင့်နိုင်ငံရေးဆွေးနွေးပွဲ ကြီးကြပ်မှု ကော်မတီ ထံအပ်နှံသွားမည်ဖြစ်ပြီး ထိုမှတစ်ဆင့် နေပြည်တော် အမျိုးသား ပြန်လည်သင့်မြတ်ရေးနှင့် ငြိမ်းချမ်း ရေးဗဟို ဋ္ဌာနကို ဆက်လက်ပေးပို့သွားမည် ၊ ဗဟိုဋ္ဌာနမှတစ်ဆင့်တူ ညီသည့်အချက်အလက်များ စုစည်း၍  ၂၁  ရာစု ပင်လုံညီလာခံတွင် ဆက်လက်တင်ပြသွားမည် ဖြစ်သည် ဟု  သိရပါသည် ။


ဆက်ဖတ်ရန်


ဒေသအလိုက်အမျိုးသားအဆင့်နိုင်ငံရေးဆွေးနွေးပွဲမှ သျှမ်း ကိုယ်စားလှယ်များ၏အသံ



သျှမ်းပြည်တောင်ပိုင်း တောင်ကြီးမြို့မှာ ဒေသအလိုက် နိုင်ငံရေးဆွေးနွေးပွဲမှာ ဧပြီလ ၂၃ ရက်ကနေ ၂၅ ရက်နေ့အထိ ကျင်းပနေပါတယ်။ သျှမ်းပြည်တွင်းမှာ သျှမ်းအမျိုးသားအဆင့်နိုင်ငံရေး ဆွေးနွေးပွဲမကျင်းပ ရသေး ဘဲနဲ့ ဒေသအလိုက်အမျိုးသားအဆင့်နိုင်ငံရေးဆွေးနွေးပွဲကို ကျော်ပြီးကျင်းပတဲ့အတွက် ဆွေးနွေးပွဲတက်ရောက်တဲ့ သျှမ်းကိုယ်စားလှယ်တွေမြင်ပါသလဲ။ ဒီဆွေးနွေးပွဲကနေ သူတို့လိုချင်တဲ့ အမြင့်ဆုံးနိုင်ငံရေးရည်မှန်းချက် ကိုရောက်နိုင်မယ်လို့မြင်မိပါသလား နန်းဆိုင်ဖူးကနေ တွေ့ဆုံမေးမြန်း ထားပါတယ်။

စိုင်းနောင့် SNDP ကျားဖြူပါတီကိုယ်စားလှယ်
 “သူများတွေဘာလုပ်နေသလဲ ဘယ်လိုခြေလှမ်းနေသလဲဆိုတာ ကျနော်တို့သိဖို့လိုတယ်လို့မြင်တဲ့အတွက် ဒီဆွေးနွေးပွဲကိုလာတက်ရတာပါ။ ဒီဆွေးနွေးပွဲမှာဘယ်အဖွဲ့က ဘာစာတမ်းလာတင်သလဲ - ဒါတွေသိရင်ဘဲကျနော်တို့ဘာဆက်လုပ်ရမလဲဆိုတာ သိနိုင်မယ်လေ။ ဒါပေမယ့်အခုလို သျှမ်းပြည်တွင်းမှာ သျှမ်းအမျိုးသားအဆင့်ကမလုပ်ရသေးဘဲနဲ့ အခုလို အဆင့်ကျော်ပြီး ဆွေးနွေးပွဲကျင်းပတဲ့အတွက်  ဒီဆွေးနွေးပွဲဟာ မပြည့်စုံဘူးလို့မြင်ပါတယ်။ သျှမ်းပြည်မှာဆိုရင် အမျိုးသားအဆင့်လုပ်ပြီးသွားတာက ပအိုဝ်းဘဲ ရှိတယ်လေ။   အမြင့်ဆုံးရည်မှန်းချက်ကဘာလဲဆိုတော့ ပါတီအနေနဲ့ကတော့ သျှမ်းလုထုရဲ့မျှော်လင့်ချက်က ပါတီရဲ့မျှော်လင့်ချက်ဘဲပေါ့နော်။  လွတ်လပ်စွာ လုပ်ပိုင်ခွင့်ပေါ့။  ၁၉၄၇ သဘောတူညီချက်လက်မှတ်ရေးထိုးစဉ်က ခေါင်းဆောင်ကြီးတွေ မျှော်လင့် ချက်အတိုင်းပေါ့။ အဲဒီအတွက် ဒီကအချက်အလက်တွေကို ကောက်ယူပြီးတော့ လာမယ့်  ဒုတိယအကြိမ် ငြိမ်းချမ်းရေးညီလာခံမှာ တင်ပြဖို့အတွက်ပါ ။ ဒီဆွေးနွေးပွဲအပေါ်ဘယ်လိုမြင်ပါသလဲဆိုတော့- အခုလို အဆင်သင့်မဖြစ်သေးတဲ့သူတွေကိုအသိမပေးဘဲနဲ့ အဆင်သင့်ဖြစ်တဲ့သူတွေက အခုလိုထလုပ်သွားတော့ တယောက်အပေါ်တယောက်မလေးစားရာရောက်ပါတယ်။ အနာဂတ်နိုင်ငံရေးမှာသျှမ်းပြည်သားတွေ သွက်လက်ချက်ချာရမယ်။ သူများထက်ဦးအောင်ကျယ်ကျယ်ပြန့်ပြန့်လေ့လာရမယ်လို့ပြောလိုပါတယ်။ ပြည်ထောင်စုအတွက်ဆိုတဲ့ရည်ရွယ်ချက်ခြင်းတူနေရင် ဘာဘဲလုပ်လုပ်တယောက်နဲ့ တယောက်တဖွဲ့နဲ့တဖွဲ့ အချိန်နှင့်အမျှ သတင်းအချက်အလက်တွေပို့ဆောင်ပြန်ကြားရမယ်။ တဖွဲ့နဲ့တဖွဲ့ လေးစားမှုရှိရမယ်။လက်တွဲဆောင်ရွက်ဖို့လိုပါတယ်။ ”

စိုင်းဦး RCSS/SSA ၏တောင်ကြီးဆက်ဆံရေးရုံးတာဝန်ခံ
“ကျနော်တို့ဒီဆွေးနွေးပွဲကိုလာတက်ရတာကတော့ ကျနော်တို့ဟာ NCA မှာလက်မှတ်ရေးထိုးပြီးတဲ့ အဖွဲ့ တဖွဲ့ဖြစ်တဲ့အတွက်ကြောင့်ဖြစ်ပါတယ်။ သျှမ်းအမျိုးသားအဆင့်မှာဘာမှမလုပ်ရသေးဘဲနဲ့ ဒီဆွေးနွေးပွဲဘာကြောင့်လာတက်ရသလဲဆိုတော့  ဒေသအလိုက်အမျိုးသားအဆင့်နိုင်ငံရေး ဆွေး နွေး ပွဲမှာ သူတို့ဘာတွေကိုဆွေးနွေးကြသလဲ ဆိုတာသိရအောင်လို့။ ဘယ်မြို့နယ် ဘယ်ဒေက ဘာတွေတင်ပြသလဲ ဆိုတာ သိရအောင်လို့။   ကျနော်တို့အတွက်ကတော့ ရည်ရွယ်ချက် ကြီးကြီးမားမား မထားပါဘူး။  ဘယ်ပါတီ ဘယ်ဒေသက ဘာကိုတင်ပြလာသလဲဆိုတာကို နားထောင်ဖို့ပါဘဲ။  အချိန်ကတော့ နီးကပ်လွန်းတဲ့အတွက် တင်ပြလာတာတွေကိုနားထောင်ကြည့် ရင် တချို့ဟာတွေကအရေးကြီးတဲ့ အချက်တွေပါပေမယ့် တချို့ဟာတွေကလည်း အလျင်အမြန် စီစဉ်ရတာကြောင့် ပြည့်စုံမှုမရှိဘူး။ တကယ်လို့အခေါက်ခေါက်အခါခါ စစ်ဆေးပြီးမှလာ တင်မယ်ဆိုရင်တော့  ပိုမိုပြည့်စုံလိမ့်မယ်လို့ယုံကြည် ပါတယ်။ ”

နန်းမြဦး တောင်ကြီးမြို့ SNLD ကျားခေါင်းပါတီအထွေထွေအတွင်းရေးမှူး
“သူတို့ဖိတ်လာလို့ကျမတို့လာတက်ရတာဖြစ်ပါတယ်။ ကျမတို့တင်ပြလိုတဲ့စာတမ်းတွေကို အစိုးရဆီ ရောက်အောင်ပေါ့ ။ သျှမ်းအမျိုးသားအဆင့်နိုင်ငံရေးဆွေးနွေးပွဲမကျင်းပရသေး ဆိုပေမယ့် ကျမတို့တင်ပြခွင့်ရှိချိန်မှာ ကျမတို့တင်ပြချင်တဲ့အချက်အလက်တွေ တင်ပြနိုင် အောင်လို့ပါ။ အလွန်နီးကပ်မှဘဲ အကြောင်းကြားလာလို့ ပြည့်စုံတယ်လို့တော့မရှိပါဘူး။ ဘာကိုမျှော်လင့်လို့လာတက်သလဲဆိုတော့ ကျမတို့ကိုသူတို့ချပေးတဲ့နိုင်ငံရေး စီးပွါးရေး မြေယာနှင့်သဘာဝသယံဇာတ ဒီခေါင်းစဉ်တွေမှာကျမတို့အသံတွေပါသွားတယ်ဆိုတဲ့အချက်ကို ကျမတို့ ကျေနပ်တယ်။ နိုင်ငံရေးရဲ့အမြင့်ဆုံးရည်မှန်းချက်ကတော့ ၂၀၀၈ ဖွဲ့စည်းပုံအခြေခံဥပဒေကိုပြင်ဆင်ချင် တယ်။ ပြင်ပကနေ ပြင်ရမလား။ လွှတ်တော်ထဲဝင်ပြီးပြင်ရမလား။ ရတဲ့နည်းနဲ့ပြင်သွားမယ်။ ဒါကိုမပြင်ရရင်တော့ ပြည်သူလူထုအတွက်ဘာမှအကျိုးမရှိဘူး။ ဒါကြောင့်ဒီဟာ လုပ်နိုင်ဖို့ ကျမတို့ကြိုးစားသွားရမယ်။ ရည်မှန်းချက်အတိုင်းဖြစ်လာမလားဆိုတာကတော့ -အခုပြောနေတဲ့ဟာပေါ့။ သူတို့လုပ်နေတဲ့လုပ်ငန်းစဉ်မှာအဆင့်ဆင့်သွားမယ်ဆိုတာ။ ဒီဟာကိုဒီမှာတင်ပြပြီးရင် ပြည်ထောင်စုကိုရောက်သွားမယ်ဆိုတဲ့အတွက် ကျမတို့ဖြစ်ချင်တဲ့အချက်တွေ လုပ်ဖို့အခွင့်အလမ်း ရှိလာမလားလို့ပါ။ အဲ့ကြောင့်ကြိုးစားပြီးလုပ်ရမှာ။ ”


ဆက်ဖတ်ရန်


ဒေသအလိုက် အမျိုးသားအဆင့် နိုင်ငံရေးဆွေးနွေးပွဲ တိုင်းရင်းသားများ စာတမ်းအတွက်ပြင်ဆင်ချိန်မရ



သျှမ်းပြည်နယ်အစိုးရမှ ဦးဆောင်ကျင်းပသော ဒေသအလိုက် အမျိုးသားအဆင့် နိုင်ငံရေးဆွေးနွေးပွဲ၌ စာတမ်း များ တင်သွင်းရန် နိုင်ငံရေးပါတီများ ၊ တိုင်းရင်းသားလက်နက်ကိုင်များဘက်မှ စာတမ်းပြုစုရန်အတွက် ကြိုတင်ပြင်ဆင်ချိန်မရကြောင်း သိရသည်။


“နိုင်ငံတော်အတိုင်ပင်ခံရုံး ဝန်ကြီးဌာနမှ ငြိမ်းချမ်းရေးကော်မရှင်ကနေတစ်ဆင့် ဒီဆွေးနွေးပွဲကို ကျင်းပဖို့ ကျနော်တို့ကို ညှိနှိုင်းလာပါတယ်၊ သျှမ်းပြည်နယ်အစိုးရမှ ဦးဆောင်ပြီးတော့ ကော်မရှင် တွေဖွဲ့ပါတယ်။ ရတဲ့ အချိန်လေးပေါ်မှာ ကျနော်တို့ အကောင်းဆုံးဖြစ်အောင် ပြင်ဆင်ပါတယ် ၊ ကျနော်တို့ကို အကြောင်းကြား လာ တာက ဧပြီ ၁၉ ရက်နေ့  ၊ ကျနော်တို့ ချက်ချင်းစီစဉ်တယ်၊ အလွှာစုံအောင်တော့ အတတ်နိုင်ဆုံး စီစဉ်ပါ တယ်၊ ကျန်ခဲ့တာလည်းရှိကောင်းရှိမယ်” ဟု သျှမ်းပြည်နယ် လူမှုရေးဝန်ကြီးဌာန ဒေါက်တာမျိုးထွန်း ကပြော သည်။


သျှမ်းပြည်တောင်ပိုင်း တောင်ကြီးမြို့ မြို့တော်ခန်းမ၌ ဒေသအလိုက် အမျိုးသားအဆင့် နိုင်ငံရေးဆွေးနွေးပွဲကို ဧပြီ ၂၃ ရက်မှ ၂၅ ရက်နေ့ထိ သုံးရက်သာ ပြုလုပ်သွားမည်ဖြစ်သည်။


တောင်ကြီးမြို့နယ် ကျားခေါင်းပါတီ၏ အတွင်းရေးမှူး နန်းမြဦး က “ ကျမဆိုရင် ခုချိန်ထိ စာတမ်းမတင်နိုင် သေးဘူး။ ဖတ်တာတော့ ဖတ်မယ်။ မတင်နိုင်သေးဘူးဆိုတာက အချက်အလက်တွေ ပြန်စုရတာ အရမ်းကြီး ကမန်းကတန်းဖြစ်သွားတဲ့တွက် မပြည့်စုံမှုတွေ ဖြစ်မှာစိုးလို့ ကိုယ့်တစ်မျိုးသားလုံးနဲ့ ဆိုင်တဲ့ ကိစ္စကို တစ်ရက် နှစ်ရက် အတွင်း အပြီးရေးဖို့ဆိုတာ မဖြစ်နိုင်ဘူး ခုချိန်ထိတောင် မှ စာတမ်းမပေးရသေးဘူး”ဟု ပြောသည်။


နိုင်ငံရေးဆွေနွေးပွဲသို့ သျှမ်းပြည်နယ်အတွင်းရှိ ကိုယ်ပိုင်အုပ်ချုပ်ခွင့်ရတိုင်း/ဒေသ နှင့် ခရိုင်အသီးသီးမှ ကိုယ်စားလှယ်များတင်ပြလာသည့် စာတမ်းများအနေဖြင့် နိုင်ငံရေးဆိုင်ရာ စာတမ်း(၂၆) စောင်၊ စီးပွားရေး ဆိုင်ရာစာတမ်း (၂၃)စောင် ၊မြေယာ နှင့် သဘာဝပတ်ဝန်းကျင်ထိန်းသိမ်းရေးဆိုင်ရာစာတမ်း (၂၁) စောင်၊ စုစုပေါင်းစာတမ်း (၇၀)စောင် ကို တင်သွင်းထားကြောင်း သျှမ်းပြည်နယ် ဝန်ကြီးချုပ် ဒေါက်တာလင်းထွဋ် က မိန့်ခွန်းတွင် ပြောသွားသည်။


ဝ ကိုယ်ပိုင်အုပ်ချုပ်ခွင့်ရ တိုင်းဦးစီးအဖွဲ့ အလုပ်အမှုဆောင် ဦးရန်ကျော် က “ ကြိုတင်ပြင်ဆင်မှုတွေ သေချာ လုပ်ရ အောင်လ်ို့ ညသိတယ် မနက်ခရီးထွက်ရတယ်ဆိုတော့ အဆင်မပြေဘူး၊ ကမန်းကတန်းလာရတဲ့အတွက် ဘာမှ ပြင်ဆင်မှု မလုပ်လိုက်ရဘူး ပြီးပြည့်စုံစုံလည်း ဘာမှ မပြောပြလိုက်ရဘူး အားမရဘူးပေါ့၊ ကြိုတင်ပြီး တော့ အနည်းဆုံး ငါးရက် တပတ်လောက်တော့ အကြောင်းကြားဖို့ လိုတယ် အသိပေးဖို့ လိုတယ်။ ဘာဖြစ်လို့ လည်းဆိုတော့ အမျိုးသားရေးအဆင့် ဆိုတာ အရမ်းအရေးကြီးတယ်။ ပဏာမဘဲဖြစ်ဖြစ် ဆွေးနွေးညှိနှိုင်း တာ ဘဲဖြစ်ဖြစ် အရေးကြီးတယ်၊ နောက်တစ်ကြိမ် ဖိတ်ခေါ်မယ်ဆိုရင်တော့ ကြိုတင်ပြီးတော့ ကျနော်တို့ကို ပြင်ဆင်မှုရရှိအောင် ရေးဆွဲလို့ရအောင် စီမံလို့ရအောင် ကြိုတင်ပြီးတော့ ဖိတ်ကြားထားရင်တော့ ပိုကောင်းပါတယ်” ဟုပြောသည်။


" ညကသိတယ် ၊ မနက်ခရီးထွက်ရတယ် ဘာအစီအစဉ်မှလဲ သေချာမစီ  စဉ်ခဲ့ ရဘူး ၊ နောက်တစ်ကြိမ်သာ ထပ်ခေါ်မယ်ဆိုရင် ကြိုတင်ပြင်ဆင်မှုရရှိ အောင် ရေးဆွဲ စီမံလို့ရအောင် ဆောင်ရွက်ပေးဖို့လိုတယ် " ဟု ၄င်းကဆက် လက်ပြောသည် ။


သျှမ်းပြည်နယ်အတွင်းရှိ တိုင်းရင်းသားလက်နက်ကိုင်အဖွဲ့အစည်း များဖိတ်ကြားမှုတွင် သျှမ်းပြည်ပြန် လည်ထူထောင်ရေးကောင်စီ RCSS/SSA နှင့် ပအိုဝ်းအမျိုးသားလွတ်မြောက်ရေးအဖွဲ့ PNLO ကိုသာဖိတ်ကြား ထားသည်ဟုသိရသည် ။


ဒေသအလိုက်ကျင်းပသည့်ပွဲသည် သက်ဆိုင်ရာပြည်နယ်အစိုးရက ဦး ဆောင်ကျင်းပရသည့်ပွဲဖြစ်တဲ့အတွက် ဖိတ်ကြားသည့် အပိုင်းသည် ပြည်နယ်အစိုးရ၏ သဘောထား ဖြစ်သော်လည်းသျှမ်းပြည်နယ်အတွင်း  ပြည်နယ် အဆင့် ပြည်ထောင်စု အဆင့် လက်မှတ်ထိုးထားသည့် တိုင်းရင်းသား လက်နက်ကိုင် အဖွဲ့ အစည်းများအား လုံးကို လေ့လာသူအနေနှင့် ဖြစ်စေ ၊ အထူးဖိတ်ကြားသူအ နေနှင့်ဖြစ်စေ ဖိတ်ကြားသင့် သည်ဟု ( PNLO ) ဥက္ကဌ ဦးခွန်မြင့်ထွန်း ကပြောသည် ။


သျှမ်းပြည်နယ် ဒေသအလိုက်အမျိုးသားအဆင့် နိုင်ငံရေးဆွေးနွေးပွဲအား တက်ရောက်ရန် ကိုယ်စားလှယ် (၄၀၀)ကျော် သတ်မှတ်ထားပြီး ၊ ဆွေးနွေး ပွဲတွင် ဖယ်ဒရယ်ကိုအခြေခံသော နိုင်ငံရေး ၊ စီးပွားရေး ၊ မြေယာ နှင့် သယံဇာတ ဆိုင်ရာ မူဝါဒများဟူသောခေါင်းစဉ်(၃) ခုဖြင့် စာတန်းပြုစုသွားမည်ဖြစ်ကြောင်းသိရှိရပါသည် ။


RCSS/SSA တောင်ကြီးဆက်ဆံရေးရုံးတာဝန်ခံ ဒုဗိုလ်မှူးကြီး စိုင်းဦး က “အခုလုပ်တာက အစိုးရကနေ စီစဉ်ပြီးလုပ်တယ် ၊ လုပ်တာက လုပ်သင့်ပါတယ် ၊ ဒါပေမယ့် အရမ်းကြီးလောသွားတယ် တစ်ဆင့်ခြင်းစီ လုပ်သွားသင့်တယ် ” ဟု ဧပြီ ၂၁ ရက်နေ့က ပြောသည်။


သျှမ်းပြည်နယ်တွင် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲတွင် ပအိုဝ်းတိုင်းရင်းသား များသာ ကျင်းပနိုင်ခဲ့ပြီး သျှမ်းတိုင်းရင်းသားများအတွက် လူမျိုးအလိုက် အမျိုးသားအဆင့် နိုင်ငံရေးဆွေးနွေးပွဲ ကျင်းပရန် အတွက် အစိုးရက တောင်ကြီး နှင့် ပင်လုံမြို့၌ ကျင်းပခွင့် မပေးသောကြောင့် ယနေ့ချိန်ထိ ကျင်ပခွင့် မရှိသေးပေ။


ဆက်ဖတ်ရန်


အဖိတ်ခံရ သျှမ်းအဖွဲ့ သျှမ်းပြည်နယ် ဒေသအလိုက် အမျိုးသားအဆင့် နိုင်ငံရေးဆွေးနွေးပွဲတက်ရောက်ရန်ရှိ



သျှမ်းပြည်နယ် ဒေသအလိုက် အမျိုးသားအဆင့် နိုင်ငံရေးဆွေးနွေးပွဲကိုတက်ရောက်မည်ဖြစ်သော် လည်း သျှမ်းတစ်မျိုး သားလုံးတွက် ကိုယ်စားပြုရန်မဖြစ်နိုင်ကြောင်း ဖိတ်ကြားခံရသည့် သျှမ်းအဖွဲ့အစည်းမှတာဝန်ရှိ သူများကပြောသည်။


RCSS/SSA တောင်ကြီးဆက်ဆံရေးရုံးတာဝန်ခံ ဒုဗိုလ်မှူးကြီး စိုင်းဦးက- “တက်တာတော့ လာတက် မယ်။ တကယ်တမ်း  သျှမ်းလူမျိုးအတွက် အမျိုးသားအဆင့်က မလုပ်ရသေးဘူး။ ပအိုဝ်းတွေက လုပ်ပြီးသွားပီ၊ အစိုးရဘက်က ဒေသအဆင့်အတွက် ဖိတ်လာတယ်။ ပြီးတော့ NCA ကနေလာတယ် ဆိုတော့ တက်တော့ လာတက်မယ်။ စာတမ်းတွေ တင်ဖို့တော့ မရှိသေးဘူး။ တကယ်လို့ ရှိလာမယ် ဆိုရင်လည်း သျှမ်းတစ်မျိုး သားလုံးတွက် ကိုယ်စားပြုမှာ မဟုတ်ဘူး” ဟု သျှမ်းသံတော်ဆင့် အားပြော သည်။


သျှမ်းပြည်နယ် အစိုးရမှ ဦးဆောင်ကျင်းပပြုလုပ်မည့် သျှမ်းပြည်နယ် ဒေသအလိုက် အမျိုးသားအဆင့် နိုင်ငံရေးဆွေးနွေးပွဲ ကို ဧပြီလ ၂၃ ရက်မှ ၂၅ ရက်အထိ သျှမ်းပြည်တောင်ပိုင်း တောင်ကြီးမြို့၌ ကျင်းပပြုလုပ်မည်ဖြစ်ပြီး ခေါင်းစဉ်ကြီး ၃ ခု နှင့် စာတမ်းဖတ်ကြားသွားမည်ဖြစ်ကြောင်း သိရသည်။


“စာတမ်းဖတ်မယ့် ခေါင်းစဉ်ကတော့ ဖက်ဒရယ်ကို အခြေခံတဲ့ နိုင်ငံရေး ၊ ဖက်ဒရယ်ကို အခြေခံတဲ့ စီးပွားရေး နဲ့ ဖက်ဒရယ်ကို အခြေခံတဲ့ မြေယာ နဲ့ သဘာဝ သယံဇာတ ဆိုင်ရာမူဝါဒ ကိစ္စတွေ ဖတ်သွားမယ်” ဖိတ်ကြားရေး ကြိုဆိုရေး နှင့် တည်းခိုရေးကော်မတီ ဥက္ကဌ သျှမ်းပြည်နယ် လူမှုရေးဝန်ကြီးဌာန ဒေါက်တာမျိုးထွန်း ကပြောသည်။


သျှမ်းပြည်တွင်းရှိ အဖွဲ့အစည်း စုစုပေါင်း ၁၀ ဖွဲ့၊ ကိုယ်စားလှယ်ပေါင်း ၄၂၆ ယောက် ဖိတ်ကြား ထားကြောင်း ဖိတ်ကြားရေး ကြိုဆိုရေး နှင့် တည်းခိုရေးကော်မတီ ဥက္ကဌ သျှမ်းပြည်နယ် လူမှုရေးဝန်ကြီးဌာန ဒေါက်တာမျိုးထွန်း ကပြောသည်။


အမျိုးသားအဆင့် နိုင်ငံရေးဆွေးနွေးပွဲကြီးကြပ်ရေးမှုကော်မတီ လည်းဖြစ် ကျေးသီးမြို့နယ် ပြည်နယ် လွှတ်တော်အမှတ်(၂) တွင် အနိုင်ရရှိခဲ့သည့် (SNLD) ပါတီ တောင်ကြီးမြို့နယ် ဥက္ကဌ ဦးခင်မောင်ညွန့် က “လူမျိုးအဆင့် နိုင်ငံရေးဆွေးနွေးပွဲ အရင်လုပ်သင့်တယ်လို့ မြင်တယ်။ သျှမ်းတိုင်းရင်းသားတွေက မလုပ်ရသေးဘူး။ ပအိုဝ်းတိုင်းရင်းသားတွေဘဲ လုပ်ပြီးသွားတာ၊ ဒေသအလိုက် လာလုပ်တယ်ဆိုတာ ဘာကြောင့် သူတို့ လောပြီး လာလုပ်ရတာလည်း မသိဘူး၊ စာတမ်းတင်ဖို့က တစ်ယောက်ကို ၁၀ မိနစ်ဆိုတော့ မပြည့်စုံနိုင်ဘူးပေါ့ ၊ ကျားခေါင်းအနေနဲ့တော့ အမျိုးသမီး ၃ ယောက်လာတက်ရောက် မယ်။ စာတမ်းရှိရင်လည်း ဖတ်သွားမယ်” ဟုပြောသည်။


၁-အစိုးရအဖွဲ့များ ၊ ၂- လွှတ်တော်ကိုယ်စားလှယ်များ၊ ၃ - တပ်မတော်သားကိုယ်စားလှယ်များ၊ ၄- NCA လက်မှတ်ရေးထိုးထားသည့် တိုင်းရင်းသားလက်နက်ကိုင်များ RCSS/SSA နှင့် PNLO ၊ ၅- ပြည်နယ်အဆင့်ဌာနဆိုင်ရာများ၊ ၆- နိုင်ငံရေးပါတီ ၂၃ ခု ၊ ရ- သျှမ်းပြည်တွင်းရှိ CSO ၃၂ ခု၊ ၈- စာပေယဉ်ကျေးမှု ၁၈ ဖွဲ့ ၊ ၉- မြို့နယ်အလိုက် ခရိုင်အလိုက် စာတမ်းဖတ်မည့် ကိုယ်စားလှယ် များ၊ ၁၀- ဌာနဆိုင်ရာ တို့ ကို ဖိတ်ကြားထားကြောင်း ဒေါက်တာမျိုးထွန်းကပြောသည်။


ဒေသအလိုက် အမျိုးသားအဆင့် နိုင်ငံရေးဆွေးနွေးပွဲကို တောင်ကြီးမြို့ရှိ မြို့တော်ခန်းမ၌ ဧပြီ ၂၃ ရက်မှ ၂၅ ရက်နေ့ထိ ၃ ရက်  ပြုလုပ်သွားမည်ဖြစ်ကြောင်း သိရသည်။


ဆက်ဖတ်ရန်


တက်သုတ်ရိုက် သျှမ်း- ဒေသဆွေးနွေးပွဲ ၊ ပန်ဆန်းအခြေပြု နိုင်ငံရေး နဲ့ မှေးမှိန်လာတဲ့ ဒီမိုကရေစီ တပွင့်



ငြိမ်းချမ်းရေး ဆွေးနွေးတည်ဆောက်မှုကို တပွဲထိုးအဖြေရှာ သဘောတူလက်မှတ်ရေးထိုးဆိုတဲ့ အခမ်းအနားမျိုး အမြင်ထက် ရန်စောင်အမုန်းပွားနေတဲ့ ဘက်နှစ်ဘက်အကြား ရေရှည်တည်တံ့တဲ့ ယုံကြည်မှုကို အချိန်နဲ့အမျှ တည်ဆောက်ပေးရတဲ့ ဖြစ်စဉ်တစ်ရပ်အဖြစ် ရှုမြင်သဘောထားရ မှာဖြစ်တယ် -လို့ ဆိုလာသူကတော့ ဂျိုနသန်ပါဝဲလ်ပဲဖြစ်ပါတယ်။


သူဟာ မြောက်အိုင်ယာလန် ငြိမ်းချမ်းရေး ဖြစ်စဉ်မှာ ဗြိတိသျှအစိုးရဘက်က ငြိမ်းချမ်းရေးဆွေးနွေးမှု ဆွေးနွေးညှိနှိုင်းရေးအဖွဲ့ခေါင်းဆောင်အဖြစ် တာဝန်ယူခဲ့သူပါ။တစ်ချိန်တည်းမှာလည်း သူဟာ ၀န်ကြီးချုပ် တိုနီဘလဲရဲ့  ၀န်ကြီးချုပ်ရုံးအဖွဲ့မှူးရာထူးကို ထမ်းဆောင်ခဲ့သူဖြစ်ပါတယ် ။


လက်ရှိ မြန်မာနိုင်ငံရဲ့ အရပ်သားအစိုးရဖြစ်တဲ့ NLD အစိုးရလက်ထက် ကျင်းပခဲ့တဲ့ ၂၁ ပင်လုံ ပထမအကြိမ်ကိုလည်း ဂျိုနသန်ပါဝဲလ်ဟာ တက်ရောက်ခဲ့ပြီး နည်းစနစ်ပိုင်းဆိုင်ရာ အကြံပေး မှုတွေလည်း ပြုလုပ်ခဲ့တယ်လို့ ဆိုကြပါတယ်။


စေ့စပ်ဆွေးနွေးမှု ညှိနှိုင်းဖြစ်စဉ်တစ်ခုကို အစပြုလိုက်တာနဲ့ အဲဒီဖြစ်စဉ်ကို ရေရှည်တည်တံ့ဖို့အတွက် ဦးတည်လုပ်ဆောင်ရပါတယ်။ ၄င်းအနေနဲ့တော့ စက်ဘီး သီအိုရီလို့ သတ်မှတ်ပြီး အဆက်မပြတ် စီးနင်းနေရမည်ဖြစ်ကာရပ်လိုက်တာနဲ့ လဲကျသွားမှာဖြစ်တယ်။ ရပ်ပြီး ပြန်နင်းရင်လည်း အားစိုက် ရတယ်။ ဆွေးနွေးပွဲက ဘယ်လောက်ပဲ ပင်ပန်းပါစေ ရပ်တန့်မသွားအောင်လုပ်ဆောင် သွားရမှာဖြစ် သလို ချဉ်းကပ်မှု ပုံစံအဟောင်းတွေနဲ့ အဆင်မပြေရင်လည်း ပုံစံအသစ်အသစ် ချဉ်းကပ်မှုအသစ်နဲ့ အဆက်မပြတ် စဉ်းစားဆွေးနွေးနေရမှာဖြစ်တယ် လို့ ဆိုပါတယ်။


 လက်နက်ကိုင် အဖွဲ့တွေနဲ့ ဆွေးနွေးညှိနှိုင်းတဲ့အခါမှာလည်း သံတမန်ပိုင်းဆိုင်ရာ ညှိနှိုင်းဆွေးနွေး မှုတွေ လိုပဲ စနစ်တကျတည်ဆောက်ထားတဲ့ ပုံစံတစ်ခုတော့ ရှိဖို့လိုအပ်တယ် လို့လည်း ဟောင် ကောင် ကို တရုတ်နိုင်ငံသို့ ပြန်လည်အပ်နှံရေး ၊ ၁၉၈၀ ခုနှစ်အလယ်ပိုင်းနှစ်များက ဆိုဗီယက် ယူနီယံနဲ့ ပြုလုပ်တဲ့ လက်နက်ထိန်းချုပ်ခြင်းဆိုင်ရာ ဆွေးနွေးပွဲများနဲ့ ဂျာမန်နိုင်ငံ ပြန်လည်ပေါင်း စည်းခြင်း ဆိုင်ရာ ဆွေးနွေးမှုတွေမှာ ပါဝင်ခဲ့သူ ဂျိုနသန်ပါဝဲလ်က သူ့ ရဲ့  How to End Armed Conflict စာအုပ်မှာ ရေးသားထားပါတယ်။


လက်နက်ကိုင်အုပ်စုတွေနဲ့ ဆွေးနွေးညှိနှိုင်းရခြင်း ဆိုတာဟာ အစည်းအဝေးတွေ မကြာခဏကျင်းပပြီး လူသိရှင်ကြား လက်မှတ်ရေးထိုးမှု အခမ်းအနားတွေနဲ့ အပစ်အခတ်ရပ်စဲရေးကိုလုပ်လိုက်တာ ထက်  စိတ်ရှည်သည်းခံမှုတွေ ၊ ကြီးမားတဲ့ ဉာဏ်ပညာရှိမှုတွေ ၊ ခိုင်မာတဲ့ စိတ်ဆုံးဖြတ်မှုတွေနဲ့အတူ ရေရှည်အကျိုးမျှော်ကိုးပြီး စီမံထားတဲ့ ဖြစ်စဉ်တွေနဲ့ ချဉ်းကပ်ဖြေရှင်းခြင်းကသာ အကောင်းဆုံးပါပဲလို့ လည်း သူက ဆိုပါတယ်။ ပဋိပက္ခ ဖြေရှင်းမှုနဲ့ ငြိမ်းချမ်းရေးဖြစ်စဉ် တည်ဆောက်မှုအတွက် သူအကြံပြုထားတဲ့ အချက် ၂၀ လောက်ထဲမှာ ခိုင်မာတဲ့ ငြိမ်းချမ်းရေးဖြစ်စဉ်အတွက် စနစ်ကျတဲ့ ဖွဲ့စည်းတည်ဆောက်မှုဖြစ်ဖို့ ၊ စေ့စပ်ညှိနှိုင်းမှုဆိုတာ ဆွေးနွေးငြင်းခုန်မှု Debate နဲ့ တရားဟောဆုံးမ သြဝါဒပေးတာ Preaching မဟုတ်တာကို သတိပြုဖို့ လိုပါတယ်။


 ငြိမ်းချမ်း process အတွက် အရှိန်ကို ထိန်းထားဖို့ စကားလုံးတွေရဲ့ အရေးပါမှု ၊ဆွေးနွေးပွဲတွေ ကျင်းပမဲ့ နေရာကို မှန်ကန်စွာရွေးချယ်သတ်မှတ်နိုင်ဖို့က ယုံကြည်မှု တည်ဆောက်ရာမှာ အရေးပါတယ်လို့လည်းဆိုသလို စေ့စပ်ညှိနှိုင်းမှုဖြစ်စဉ်အတွက် စီမံချက် ၁ နဲ့ မအောင်မြင်ရင် အရံသင့် (၂) ဆိုတာ ရှိရန် လိုအပ်မှု ၊ စေ့စပ်ဆွေးနွေးမှုများမှာ အသွင်သဏ္ဍာန်နဲ့ အမှတ်သရုပ်လက္ခဏာတွေရဲ့ အရေးပါမှုကို အလေးထားမှုကလည်း အရေးကြီးတယ်လို့  မစ္စတာပါဝဲလ်က ဆိုထားပါတယ်။


အရေးကြီးတဲ့အချက်ကတော့ စေ့စပ်ညှိနှိုင်းဆွေးနွေးရေးကိုမဟာဗျူဟာတကျလုပ်ဖို့လိုသလို အခြေအနေ ၊ အချိန်အခါ အလိုက်ပြုလွယ်ပြင်လွယ်ရှိစေရန် စီမံထားဖို့ကလည်း အရေးအကြီးဆုံးဖြစ်ပြီး စေ့စပ်ညှိနှိုင်းမှုဖြစ်နဲ့ပတ်သက်တဲ့ အန္တိမရည်မှန်းချက်ကိုမူ ခိုင်ခိုင်မာမာ အမျှော်အမြင်ရှိရှိထားဖို့ လိုတယ်လို့ သူ့စာအုပ်ထဲမှာ ဖော်ပြထားပါတယ်။


အရေးကြီးတဲ့အချက်ကတော့ ကမ္ဘာတစ်လွှားမှာရှိတဲ့ အမျိုးမျိုးသော စေ့စပ်ညှိနှိုင်းမှုဖြစ်စဉ်တွေဟာ အာဏာခွဲဝေခြင်း ၊ ရင်းမြစ်ခွဲဝေခြင်း စတဲ့ တူညီတဲ့ ကိစ္စရပ်တွေအပေါ်မှာသာ ထပ်ခါတလဲလဲဖြေရှင်းနေကြခြင်းဖြစ်ပြီး စေ့စပ်ညှိနှိုင်းမှုများအတွက် ဆွေးနွေးဘက်တွေအကြား အကောင်းဆုံး ကိုယ်စားပြုမှုကို ဖြစ်ပေါ်စေမဲ့ ဆုံးဖြတ်ချက် ချမှတ်မှုဖြစ်စဉ်ကိုလည်း ကြိုတင်စဉ်းစားဖို့ လိုတယ်လို့လည်း သူက ဆိုပါတယ်။


အောင်မြင်ခဲ့တဲ့ တောင်အာဖရိက ငြိမ်းချမ်းရေးဖြစ်စဉ်မှာ ဆွေးနွေးပွဲကျင်းပမှု ပုံသဏ္ဍာန်အခင်းအကျင်း ကျင်းပမဲ့ နေ့ရက်တွေနဲ့ ပတ်သက်လို့ လူဖြူအစိုးရကကြီးကြီး သီးသန့်ဆုံးဖြတ်တာ မဟုတ်ပဲ အားလုံးပါဝင်တဲ့ ကော်မတီကသာ ဆုံးဖြတ်ခဲ့တာဖြစ်ပါတယ်။ မြန်မာမှာလည်း နိုင်ငံရေးဆွေးနွေးပွဲနဲ့ ဆက်စပ်မဲ့ ငြိမ်းချမ်းရေးနဲ့ အပစ်အခတ်ရပ်စဲရေးဖြစ်စဉ်မှာ ဆွေးနွေးမှု ပုံသဏ္ဍာန်အခင်းအကျင်းတွေကို  အားလုံးပါဝင်တဲ့ အစုအဖွဲ့ ကော်မတီတွေက ဆုံးဖြတ်ဖို့ NCA နိုင်ငံလုံးဆိုင်ရာ အပစ်အခတ်ရပ်စဲရေး စာချုပ်မှာ ပြဌာန်းခဲ့ကြတာဖြစ်ပါတယ်။ အဓိကအားဖြင့် နိုင်ငံရေးဆွေးနွေးပွဲတွေ ကျင်းပဖို့အတွက် UPDJC လို့ခေါ်တဲ့ ပြည်ထောင်စု ငြိမ်းချမ်းရေး ဆွေးနွေးမှုဆိုင်ရာ ပူးတွဲကော်မတီဟာ အဆင့်အလိုက် နိုင်ငံရေးဆွေးနွေးမှုတွေ ၊အစည်းအဝေး ဘယ်နေ့ကျင်းပမယ်ဆိုတာက အစ ဆုံးဖြတ်ရမဲ့ နေရာဖြစ်ပါတယ်။ အဲဒီကော်မတီမှာ နိုင်ငံရေးပါတီတွေ တိုင်းရင်းသားပါတီတွေနဲ့ တိုင်းရင်းသားလက်နက်ကိုင် အဖွဲ့အစည်းတွေ အစိုးရ တာဝန်ရှိသူတွေ ပါဝင်တာပါ။ NCA စာချုပ်ဟာ လွှတ်တော်မှာ အတည်ပြုပြီးပြီဖြစ်တဲ့အတွက် စာချုပ်ပါ အချက်တွေကို လေးစားလိုက်နာ အကောင်ထည်ဖော်ဖို့ ဟာ အားလုံးမှာ တာဝန်ရှိပါတယ်။


ဆွေးနွေးပွဲ အဆင့်ဆင့် ကျင်းပမှုတွေက အစ UPDJC မှာ ဆုံးဖြတ်ရမှာဖြစ်သလို NCAနဲ့ ပတ်သက်လို့ အကြပ်အတည်းမှန်သမျှဟာ JICM လို့ခေါ်တဲ့ နိုင်ငံလုံးဆိုင်ရာ အပစ်ခတ်ရပ်စဲရေး စာချုပ် အကောင်ထည်ဖော်မှုဆိုင်ရာ ပူးတွဲညှိနှိုင်းမှု အစည်းအဝေး ( ထိပ်သီးခေါင်းဆောင်တွေပါဝင်တဲ့ ) မှာ ဆုံးဖြတ်ရမှာ ဖြစ်ပါတယ်။ ယုတ်စွအဆုံး ဖြစ်စဉ် ရပ်တန့်နေတာတွေကအစ ဆွေးနွေးမှု ဖြစ်စဉ် ဆက်မသွားနိုင်တာ ၊ အလုပ်ဖြစ်နိုင်ဖွယ်ရှိတဲ့ အခင်းအကျင်း မပေါ်ပေါက်တာက အစ NCAအရ အမြင့်ဆုံး အဖွဲ့အစည်းဖြစ်တဲ့ JICM မှာ ဆုံးဖြတ်ရမှာဖြစ်ပါတယ်။


ဒိုင်ယာလော့ခ်နည်းလမ်းနဲ့ ဆွေးနွေးညှိနှိုင်းအဖြေရှာမှုဖြစ်စဉ်တွေမှာ အားလုံးရဲ့ ပါဝင်ပတ်သက်မှုဟာ အဓိပ္ပာယ်ရှိတဲ့ ပါဝင်ပတ်သက်မှုဆိုတဲ့ စိတ်ခံစားမှုဖြစ်ပေါ်စေခြင်းဟာ ယုံကြည်မှု တည်ဆောက်ရေးမှာ အရေးပါလှသလို ဖြစ်စဉ်ကို နိုင်ငံရေးအဖွဲ့အစည်းတစ်ခုတည်းက ပိုင်တာမဟုတ်ဘူးလို့လည်း ပြသရာရောက်ပါတယ်။


ဖော်ပြခဲ့တဲ့ UPDJC ကော JICM ကော အစိုးရသစ် လက်ထက်မှာ အသက်မဝင် ဖြစ်လာတာက တော့ စိတ်မကောင်းစရာပဲဖြစ်ပါတယ်။ ဧပြီလ ၂၀ ရက်နေ့ မနက်နိုးနိုးခြင်းမှာပဲ ဖေ့ဘုပ်ဖွင့်ကြည့်လိုက်တော့ သတင်း တပုဒ်ကို တွေ့ရပါတယ်။ သျှမ်းအမျိုးသားအဆင့် နိုင်ငံရေးဆွေးနွေးပွဲကို ကျင်းပခွင့်မရတဲ့ တောင်ကြီးမြို့မှာ ဒေသအလိုက် အမျိုးသားအဆင့် နိုင်ငံရေးဆွေးနွေးပွဲကို အစိုးရက ဦးဆောင်လို့ ရက်ပွဲအတွင်း တက်သုတ်ရိုက်ကျင်းပမဲ့ သတင်းပါ။ ဒီသတင်းကို ဆက်ဖတ်ကြည့်တော့ ဒေသတွင်း အပစ်ရပ်ထားတဲ့ အင်အားကြီး တိုင်းရင်းသားလက်နက်ကိုင် အဖွဲ့ဖြစ်တဲ့ RCSS/SSA သျှမ်းပြည်တပ်မတော်တောင် တက်ရောက်ဖို့ အဆင်သင့် မဖြစ်သေးဘူးလို့ ဆိုပါတယ်။ သူတို့လည်း ကြိုတောင် မသိဘူးလို့ ပြောထားပါတယ်။ သူတို့ ပြောတာကလူထု ဆန္ဒအရ အမျိုးသားအဆင့် ဆွေးနွေးပွဲကျင်းပမှု မလုပ်နိုင်သေးပဲ ဒေသအလိုက်ကို တက်သုတ်ရိုက်အဆင့်ကျော်ပြီး သွားလုပ်ရင် ၂၁ ပင်လုံမှာတောင်သွားပြီး အခက်တွေ့ဦးမယ်လို့ ဆိုထားပါတယ်။ ပိုဆိုးတာက ဒီအစည်းအဝေးကျင်းပမှုကို UPDJC ကနေ ဆုံးဖြတ်တာ မဟုတ်ပဲ အစိုးရ အစီစဉ်နဲ့ သီးခြား တက်သုတ်ရိုက်လုပ်လာတာဖြစ်ပါတယ်။ သီအိုရီတွေအရ ဆွေးနွေးပွဲ အဆတ်မပြတ်ရှိခြင်းဟာကောင်းပေမဲ့ အလုပ်ဖြစ်နိုင်ဖွယ် ကြိုတင်ပြင်ဆင်မှု ရှိမရှိ ဆိုတာ အရေးပါတဲ့ အချက်ဖြစ်ပါတယ်။


ဒါ့အပြင် NCA စာချုပ်အကြောင်းပြောနေပြီး NCA နိုင်ငံလုံးဆိုင်ရာအပစ်ခတ်ရပ်စဲရေး စာချုပ်ပါ အချက်တွေကို အကောင်ထည်ဖော်မှု အားနည်းတာ ၊ ဆွေးနွေးဘက်တွေရဲ့ အခွင့်အရေးတွေကို မလေးစားပဲ မိမိသဘောနဲ့ ဆုံးဖြတ်မှု ဆိုတဲ့ အနေထားပါ တွေ့မြင်လာရတာပဲဖြစ်ပါတယ်။ တောင်ကြီးမှာ ကျင်းပဖို့ ရည်ရွယ်ထားတဲ့ ဒီအစည်းအဝေးမှာ ဒေသတွင်း အပစ်မရပ်ထားတဲ့ အဖွဲ့တွေလည်း ပါဝင်ခွင့်ရမရ ၊ အရပ်ဘက် အဖွဲ့အစည်းကဏ္ဍ စတာတွေလည်း ရေရာမှု မရှိလှပါဘူး။ ခြုံငုံသုံးသပ်ရမယ်ဆိုရင်တော့ မေလအတွင်းကျင်းပဖို့ ရည်ရွယ်ထားတဲ့ ၂၁ ပင်လုံမတိုင်မှီ အပြကောင်းရုံသက်သက်လောက်ပဲဖြစ်ပါလိမ့်မယ်။ သျှမ်းပြည်နယ်အတွင်းမှာ အဓိက တိုင်းရင်းသား အင်အားစုဖြစ်တဲ့ သျှမ်းအမျိုးသားအဆင့်ဆွေးနွေးပွဲ မလုပ်ရသေးပဲ ကျန်တဲ့ ပအိုဝ်းလို တိုင်းရင်းသားတွေရဲ့ ဆွေးနွေးပွဲတွေသာ ကျင်းပနိုင်သေးပြီး ဒေသအလိုက် ဆွေးနွေးပွဲကို  အစိုးရ သဘောနဲ့ ကျင်းပတာဟာ တိုင်းရင်းသားတွေ ပူးပေါင်းပါဝင်ဆုံးဖြတ်ခွင့်ကို အများစု မဂျော်ရတီနဲ့ လိုသလို ပုံစံသွင်းတဲ့ သဘောပါ ဆောင်သလို သွေးခွဲအုပ်ချုပ်တဲ့ သဘောဆောင်ပါတယ်။ အခုမှ ဒီလိုဖြစ်နေတာတော့မဟုတ်ပါဘူး။ ၂၁ ပင်လုံကျင်းပမယ်လို့ ဒေါ်အောင်ဆန်းစုကြည် စပြောလိုက်ကတည်းက ကျန်တဲ့ တိုင်းရင်းသားအဖွဲ့အစည်းတွေ ပါတီတွေ တရားဝင် ကော်မတီတွေနဲ့ ဆွေးနွေးမှု မပြုပဲ ကြိုတင်ကြေငြာခဲ့တာ သတိထားမိပါတယ်။ NCA မထိုးသေးတဲ့ တိုင်းရင်းသားလက်နက်ကိုင်တွေကို မေးငေါ့နေတဲ့ အစိုးရအနေနဲ့ မိမိကိုယ်တိုင်လည်း NCAနဲ့ ငြိမ်းချမ်းရေး ဖြစ်စဉ်ကို ကျေညှက်နားလည်ဖို့လိုပါတယ်။ ဒေါ်အောင်ဆန်းစုကြည်အနေနဲ့ UPDJC ဥက္ကဌ ဖြစ်လို့ ဒီလို ဆုံးဖြတ်တယ်ဆိုရင်တောင် မူအရ ကော်မတီအဖွဲ့ဝင်တွေနဲ့ အတွင်းရေးမှူးလို နေရာရာထူးတွေမှာ တိုင်းရင်းသားအင်အားစုတွေ ပါဝင်တဲ့အတွက် သူတို့နဲ့ အစည်းအဝေးလုပ်ပြီးမှ ဆုံးဖြတ်ဖို့ လိုပါတယ်။ ဒါမှ မဟုတ်ရင် ဗဟို ဦးစီးစနစ်နဲ့ လုပ်နေတဲ့ ငြိမ်းချမ်းရေးဖြစ်စဉ်သာဖြစ်နေပါလိမ့်မယ်။ လတ်တစ်လောမှာပဲ NCA ထိုးပြီးသား အဖွဲ့တွေမှာတောင် NCA စာချုပ်ပါ အချက်တွေကို အကောင်ထည်ဖော်ပေးမှု အားနည်းတဲ့အတွက် စိတ်ပျက်မှုတွေ ရှိလာတာက ငြင်းမရ နိုင်တဲ့ ကိစ္စပါ။


 ဒီလို ဆွေးနွေးပွဲတွေကို အလုပ်ဖြစ်ဖြစ် မဖြစ်ဖြစ် ဗဟို အစိုးရ သဘောအတိုင်း လုပ်နေတာက အမျိုးသားအမှတ်သညာ ရုပ်လက္ခဏာအရလည်း မေးခွန်းထုတ်စရာ ရှိပါတယ်။ စိတ်ဝမ်းကွဲမှု များပြားတဲ့ လူ့အဖွဲ့အစည်းတွေမှာ တိုင်းရင်းသားမျိုးနွယ်စု ဆိုင်ရာ လက်နက်ကိုင် ပဋိပက္ခတွေရှိတာ သဘာဝဖြစ်ပြီး အဲဒီ ပဋိပက္ခတွေကို စီမံခန့်ခွဲရာမှာ ဒီမိုကရေစီ အလေ့အထတွေနဲ့ ညှိနှိုင်းဆွေးနွေး အဖြေရှာပြီး စည်းရုံးရစမြဲဖြစ်ပါတယ်။ ဒီမိုကရေစီ အလေ့အထ မဟုတ်တဲ့ အကျင့်တွေ ၊ လက်အောက်ခံ ဘဝ ကျရောက်မှု အပါဝင် ဗဟိုချုပ်ကိုင်မှုများလွန်းတာ ၊တွေကို ဖြေရှင်းရတာဟာ တိုင်းရင်းသားမျိုးနွယ်စု ပဋိပက္ခတွေကို ဖြေရှင်းရာမှာ ကြုံတွေ့ရမြဲဖြစ်ပါတယ်။ ဒီမိုကရေစီ အလေ့အထအားနည်းတဲ့ လူ့အဖွဲ့အစည်းမှာ ဒီမိုကရေစီအရ အသွင်ကူးပြောင်းမယ်ဆိုရင် ဦးဆောင်သူတွေကိုယ်တိုင် ဒီမိုကရေစီအလေ့အထတွေဖြစ်တဲ့ ညှိနှိုင်းတိုင်ပင်စေ့စပ်ဆွေးနွေးတဲ့ အလေ့အထတွေကို အသုံးပြုမှုကသာ မျိုးနွယ်စု လက်နက်ကိုင် ပဋိပက္ခတွေကို ဖြေရှင်းရာမှာ ဒီမိုကရေစီ အလေ့အထ မရှိသူတွေအတွက် ဦးဆောင်လမ်းပြအနေနဲ့ အထောက်အကူ ပြုသလို ဖြစ်ပါစေလိမ့်မယ်လို့ တီမိုသီဆစ့်ရဲ့ Power sharing and International Mediation In Ethnic Conflict ဆိုတဲ့ စာအုပ်မှာ ဖော်ပြထားပါတယ်။ မဂျော်ရတီသာ အနိုင်ရတဲ့ ဒီမိုကရေစီစနစ် မြန်မာလို စနစ် ( တိုင်းရင်းသားမျိုးနွယ်စု တစ်မဲ ဗမာတစ်မဲ မဖြစ်နိုင် ဥပမာ သျှမ်းလူဦးရေနဲ့ ဗမာလူဦးရေ ကွာခြားမှုအရ ဗမာသာ မဲအများစု အမြဲရနိုင် )တွေမှာ လူဦးရေနည်းတဲ့ တိုင်းရင်းသားမျိုးနွယ်စုတွေအနေနဲ့ ရွေးကောက်ပွဲစနစ်ကို ကြောက်ကြတာ သဘာဝပဲဖြစ်ပါတယ်။ ( ဥပမာ မြောက်အိုင်ယာလန် ပြည်တွင်းစစ် ရွေးကောက်ပွဲတွင် လူဦးရေများသော ပရိုတက်စတင့်တွေသာ အမြဲအနိုင်ရပြီး သူတို့သဘောအတိုင်းသာ အမြဲဆုံးဖြတ်တဲ့အတွက် ရိုမန်ကက်သလစ်တွေက လက်နက်ကိုင် ဆန့်ကျင်၊ ဒါကြောင့် အာရင်းလိပတ်ခ်ျလို ပုဂ္ဂိုလ်တွေကတော့ မဂျော်ရတီမဲများတိုင်း၊ လူဦးရေများတိုင်း အနိုင်ရတဲ့ စနစ်ကို ဒီမိုကရေစီလို့ မသတ်မှတ်ဟု ဆိုခဲ့တာဖြစ်နိုင်ပါတယ်။ )


တိုင်းရင်းသားမျိုးနွယ်စုတွေကို အာဏာခွဲဝေမှု ပြုလုပ်တဲ့ အလေ့အကျင့်နဲ့ Consociational ပုံသဏ္ဍာန်း တနည်းအားဖြင့် အသွင်မတူကွဲပြားတဲ့ မျိုးနွယ်စုတွေအကြား နိုင်ငံရေးအရနဲ့ ကိုယ်စားပြုမှု ရှိသူတွေကို  အာဏာခွဲဝေပေးတဲ့ ပုံစံမျိုးက အသင့်တော်ဆုံးဖြစ်တယ်လို့ သီမိုတီဆစ့်က  ဆိုပါတယ်။ တောင်အာဖရိကမှာ မင်ဒဲလား သမ္မတဖြစ်စေခဲ့တဲ့ ကြားဖြတ်ဖွဲ့စည်းပုံမှာ အင်အားစု အားလုံးပါဝင်တဲ့ အမျိုးသား ပြန်လည်သင့်မြတ်ရေးအစိုးရ ဖွဲ့စည်းနိုင်ခဲ့မှုဟာ ငြိမ်းချမ်းရေးအရကော အသွင်ကူးပြောင်းရေးအတွက် အထောက်အကူပြုစေခဲ့ပါတယ်။ မြန်မာမှာတော့ NLDအနေနဲ့ တိုင်းရင်းသားအချှို့ကို ရာထူးနေရာပေးခဲ့တာ ရှိပေမဲ့ နိုင်ငံရေးအရ သဘောတူညီချက်တွေနဲ့ ပေးတာ မဟုတ်ပဲ အမျိုးသားပြန်လည်သင့်မြတ်ရေးအစိုးရလို့ အပြည့်အဝ မဆိုနိုင်ခဲ့တဲ့အတွက် အသွင်သဏ္ဍာန်သာရှိတဲ့ Cohabiting တနည်းအားဖြင့် ပဋိဉာဉ်မပါတဲ့ အစိုးရလို့ သာ ဆိုနိုင်ပါတယ်။ NLDနဲ့ တိုင်းရင်းသားတွေအကြား ယုံကြည်မှု ယိုယွင်းလာမှုကို ကြည့်မယ်ဆိုရင် အစိုးရဖွဲ့စည်းမှု ကာလကတည်းက စတယ်လို့ ဆိုနိုင်ပါတယ်။ အကွဲအကြီးနဲ့ အကွဲအသေးအကြား အကြီးကို ကိုင်တိုင်းနိုင်တယ်ဆိုတဲ့ အယူအဆဟာ ရေရှည် အမျိုးသားပြန်လည်သင့်မြတ်ရေးအတွက်တော့ ကောင်းလှတဲ့ လက္ခဏာ မဟုတ်ပါ။ ချောင်းဆုံမြို့နယ်က ဗိုလ်ချုပ်အောင်ဆန်းတံတားကိစ္စဟာ ဒီမိုကရေစီအရ အနိုင်ကျင့်မှုဖြစ်သလို မျိုးနွယ်စု တိုင်းရင်းသားတွေဘက်က အစိုးရ ဖော်ဆောင်နေတဲ့ ငြိမ်းချမ်းရေးအတွက်လည်း မေးငေါ့စဉ်းစားစရာ ကိစ္စဖြစ်ပါတယ်။ တိုင်းရင်းသားမျိုးနွယ်စု ပဋိပက္ခတွေနဲ့ ပတ်သက်လို့ အစိုးရဘက်တွေနဲ့ ပညာရှင်တွေအကြား အမြင်မတူတတ်မှုတွေမှာ အဓိက ကျတာက တစ်ခါတစ်ခါအစိုးရတွေဟာ ငြိမ်းချမ်းရေးဖြစ်စဉ် မြန်မြန်ပြီးမြောက်လိုဇော ( သို့မဟုတ် ) ၄င်းတို့ အစိုးရသက်တမ်းအတွင်း အမြန်ပြီးပြတ်လိုစိတ်နဲ့ ကြုံသလို လုပ်တတ်တာဟာ အကြီးမားဆုံးအမှားဖြစ်တယ်လို့ တီမိုသီဆစ့်က ထောက်ပြပါတယ်။ ပညာရှင်တွေ စကော်လာတွေရဲ့ ချဉ်းကပ်မှုမှာတော့ တက်သုတ်ရိုက်ကြုံသလို လုပ်တာ မဟုတ်ပဲ ရေရှည်ခိုင်မာမှုကို အခြေခံပြီး စနစ်တကျချဉ်းကပ်မှုမျိုးကို အားပေးကြပါတယ်။ အဲလို အခြေခံတဲ့အတွက်လည်း မမျှော်လင့်ပဲ အချိန်တိုတိုအတွင်း အောင်မြင်သွားတာတွေလည်း ရှိပါတယ်လို့ တီမိုသီဆစ့်က ထောက်ပြပါတယ်။


လက်ရှိ အချိန်ကို ပြန်ကြည့်မယ်ဆိုရင် ငြိမ်းချမ်းရေးဖြစ်စဉ်ဟာ ပထမအကြိမ် ၂၁ ပင်လုံပြီးကတည်းက အကြပ်အတည်းကာလထဲကို ရောက်နေခဲ့ပြီဖြစ်ပါတယ်။ တစ်ချိန်တည်းမှာလည်း NCAကို လက်မခံပဲ ဆွေးနွေးမဲ့ အုပ်စုတွေ ပထဝီနိုင်ငံရေးလို ကိစ္စတွေကလည်း အားကောင်းလာခဲ့ပါပြီ။ အဲဒီလို အခြေနေမှာ ထွက်ပေါက်က အနည်းငယ်သာ ရှိပါတယ်။ လက်မှတ်ထိုးပြီးသားအဖွဲ့အစည်းတွေ ၊ သက်ဆိုင်ရာ မျိုးနွယ်စု အလိုက် ကိုယ်စားပြုတဲ့ ပါတီ အရပ်ဘက် အဖွဲ့အစည်းတွေနဲ့ ကောင်းမွန်တဲ့ ဆက်ဆံရေးရှိမှု ၊ ကောင်းမွန်တဲ့ ပူးပေါင်းဆောင်ရွက်မှုတွေကလည်း ဒီအချိန်မှာ အရေးကြီးပါတယ်။ တစ်ချိန်တည်းမှာလည်း လက်မှတ်ထိုးပြီးသားအဖွဲ့တွေမှာကော မထိုးသေးတဲ့ အဖွဲ့တွေမှာပါအစိုးရကိုကျော်လို့ တပ်နဲ့ တိုက်ရိုက်ဆွေးနွေးဆိုတဲ့ အယူအဆအားကောင်းလာတာလည်း ငြင်းမရနိုင်တဲ့ ကိစ္စပါပဲ။ ' အစိုးရ တက်တာ တစ်နှစ်ကျော်ရှိပြီဘာမှ တိုးတက်မှု မရှိဘူး။ တာဝန်ယူမှု တာဝန်ခံမှုကလည်း မရှိဘူး။ တရားဟောတာ ဟန်ပြလုပ်တာနဲ့ပဲ အချိန်ကုန်နေတယ်လေ။ တပ်နဲ့ တိုက်ရိုက်ဆွေးနွေးရေးအယူအဆ အားကောင်းလာတာလည်း အဆိုးဆိုလို့မရဘူး။ ' လို့ NCA အပစ်ရပ်စာချုပ်ထိုးထားတဲ့ အဖွဲ့တစ်ဖွဲ့မှ ငြိမ်းချမ်းရေးကိုယ်စားလှယ်အဖွဲ့ဝင်တစ်ဦးက ဆိုပါတယ်။ သျှမ်းပြည်တပ်မတော် RCSS/SSA ဆိုရင် NCA အပါအဝင် အပစ်ရပ်စာချုပ် စုစုပေါင်း ၃ ခု လက်မှတ်ရေးထိုးထားပေမဲ့ အကောင်ထည်ဖော်မှု အားနည်းတဲ့အတွက် တပ်မတော်နဲ့ မကြာခဏ တိုက်ပွဲတွေဖြစ်နေတာတွေ့ရပါတယ်။


ဝ တပ်ဖွဲ့တာဝန်ရှိသူ တစ်ဦးကတော့ ' တပ်နဲ့ တိုက်ရိုက်ဆွေးနွေးတာဟာ အခုလက်ရှိအနေထား ထက်စာရင် ကောင်းတဲ့အချက်တွေလည်း ရှိပါတယ်ဗျာ။ ' လို့ စာရေးသူအားပြောဆိုဖူးပါတယ်။


ဝ ဒေသ  ပန်ဆန်းအစည်းအဝေး ထုတ်ပြန်ချက်ဟာ NCA လိုင်းကို ကျော်လို့ သီးသန့် ဆွေးနွေးမဲ့ အစီစဉ်ဖြစ်ပြီး တောင်းဆိုမှုကော နိုင်ငံရေးအရ တင်းမာတဲ့ သဘောရှိပါတယ်။ NCA ထိုးပြီးသားအဖွဲ့တွေတောင် အကြပ်ရိုက်နေမှုမှာ မထိုးသေးတဲ့အဖွဲ့တွေကလည်း သူတို့တောင် ဘာမှ မရေရာသေးဆိုတာမျိုး NCA မထိုးသေးတဲ့ အဖွဲ့တွေက ထောက်ပြနိုင်သလို အခန့်မသင့်ရင် ထိုးပြီးသားအဖွဲ့တွေတောင် အမာလိုင်းဘက် ကူးသွားနိုင်မလား ဆိုတာ မပြောနိုင်တဲ့ ကိစ္စပါ။


တပ်နဲ့ လက်နက်ကိုင် အချင်းချင်း ဆွေးနွေးမယ်ဆိုတဲ့  အနေထားမှာ လက်နက်ကိုင်ထားတဲ့ စစ်ဘုရင်အချင်းချင်း ပြေလည်ကောင်း ပြေလည်သွားနိုင်ပေမဲ့ ဒီမိုကရက်တိုက်ဇေးရှင်းနဲ့ အရပ်သား အခန်းကဏ္ဍအတွက် တော်တော်လေးကို ပြဿနာ ရှိလာပါတယ်။ အရပ်သားအခန်းကဏ္ဍ ဘေးရောက်လာရင်ဒီမိုကရေစီ အလေ့အထ ဆုတ်ယုတ်လာမှာ ၊ တရားဥပဒေ စိုးမိုးရေး ကိစ္စတွေမှာပါ အများကြီး ပြဿနာ ရှိလာနိုင်ပါတယ်။ ဒီမိုကရေစီ အစိုးရရဲ့  မဟာဗျူဟာကင်းမဲ့မှုကြောင့် ဒီမိုကရေစီ အခန်းကဏ္ဍနဲ့ အရပ်သားအခန်းကဏ္ဍ မှေးမိန်လာမဲ့ အလားအလာမြင်တွေ့နေရတာဟာ စိုးရိမ်စရာ ကိစ္စရပ်ပဲဖြစ်ပါတယ်။  ပွင့်လင်းမြင်သာမှု ၊ တာဝန်ခံ ၊ တာဝန်ယူမှု မရှိတာတွေကြောင့် ငြိမ်းချမ်းရေး ဖြစ်စဉ်မှာ ယုံကြည်မှု လျော့နည်းပြီး အမာလိုင်းအားကောင်းလာနိုင်တာကို ထည့်သွင်းတွက်ချက်ဖို့လိုပါတယ်။ လွန်ခဲ့တဲ့ နှစ် ၂၀ ကျော်ကာလအတွင်း အင်အားစုတွေအားလုံး ကိုင်စွဲလာခဲ့တဲ့ တပ်မတော် ၊ တိုင်းရင်းသား ဒီမိုကရေစီ အင်အားစုများဆိုတဲ့ သုံးပွင့်ဆိုင် ဆွေးနွေးရေးမူမှာ ဒီမိုကရေစီ တပွင့်က ဒီမိုကရေစီ အစိုးရလက်ထက်မှာ မှေးမိန်လာတော့မလားဆိုတာလည်း တွေးဆစရာပါ။ အရပ်ဘက်အဖွဲ့အစည်းကဏ္ဍ NLDမဟုတ်တဲ့ အခြားဒီမိုကရေစီ အင်အားစုတွေ ဘေးရောက်နေမှု ရွေးကောက်ပွဲအနိုင်ရတဲ့ တိုင်းရင်းသားပါတီတွေတောင် နေရာမရမှုတွေက လက်နက်ကိုင် နိုင်ငံရေးအတွက် အားကောင်းစေနိုင်တဲ့ အခင်းအကျင်းပဲဖြစ်ပါတယ်။


တပ်မတော်ကာကွယ်ရေးဦးစီးချုပ်ဆိုရင် မတ်လ ၂၇ တပ်မတော်နေ့မှာ ၂၁ ပင်လုံအကြောင်းတောင် မပြောတော့သလို ၊ ပတ်ဝန်းကျင် အိမ်နီးချင်း နိုင်ငံဖြစ်တဲ့ တရုတ်နိုင်ငံကလည်း မြန်မာ့ငြိမ်းချမ်းရေးဖြစ်စဉ်က မြင်သာတဲ့ ကာလအတွင်းမှာ ပြေလည်သွားဖို့ အလားအလာနည်းတယ်လို့ တရုတ်ဘက်က ယူဆထားကြောင်း တရုတ်- မြန်မာအရေး လေ့လာသူ ဒေါက်တာယွန်ဆင်ရဲ့  မကြာသေးခင်က သူမရဲ့ ဆောင်းပါးဖြစ်တဲ့ China and Myanmar's Peace Process ဆောင်းပါးမှာ ဖော်ပြထားပါတယ်။ ယွန်ဆင်ရဲ့ ဆောင်းပါး အနှစ်ချုပ်ကတော့ သဘောကတော့ စိတ်ရင်းစေတနာမှန်နဲ့ စနစ်တကျ မဖြေရှင်းနိုင်လေလေ မြန်မာနိုင်ငံ မြောက်ပိုင်းက ပဋိပက္ခက ကြာလေလေဆိုတဲ့ သဘောပါ။


Ref; Talking to Terrorists- How To End Armed Conflicts – Jonathan Powell
Power Sharing and International Mediation in Ethnic Conflicts- Timothy D. Sisk
China and Myanmar's Peace Process- Yun Sun



ဆက်ဖတ်ရန်


သျှမ်းပြည်နယ်ဒေသအလိုက်အမျိုးသားအဆင့်နိုင်ငံရေးဆွေးနွေးပွဲအတွက်အစိုးရပြင်ဆင်နေ



သျှမ်းပြည်နယ် ဒေသအလိုက်အမျိုးသားအဆင့်နိုင်ငံရေးဆွေးနွေးပွဲ ကို တောင်ကြီးမြို့ ၊ မြို့တော်ခန်းမတွင် ဧပြီလ (၂၃ ) ရက်နေ့ မှ (၂၅) ရက်နေ့ အထိကျင်းပပြုလုပ်သွားမည်ဖြစ်ကြောင်း သျှမ်းပြည်နယ် အစိုးရအဖွဲ့ အတွင်း ရေးမှူး ဦးစိုးစိုးဇော်ကပြောသည် ။


" အဓိကကတော့ နိုင်ငံရေး ၊ စီးပွားရေး ၊ သယံဇာတနဲ့ သဘာဝပတ် ၀န်းကျင်ဆိုင်ရာ တွေမှာ ကျနော်တို့ နိုင်ငံမှာ ဘယ်လို ဖယ်ဒရယ်စနစ်  မျိုး နဲ့သွားမလဲ။ အခြားနိုင်ငံတွေက ဘယ်လို ဖယ်ဒရယ်စနစ်နဲ့သွားသလဲ ကျနော်တို့ဖြစ်သင့်တာ ဘာတွေဖြစ်မလဲ။ တိုင်းရင်းသားတွေနဲ့ ပါတီတွေက တင်ပြတဲ့စာတမ်းတွေကို ကျနော် တို့က ဖော်ထုတ်သွားမှာဖြစ်ပြီး ပြည်ထောင်စုအဆင့်ကို တင်ပြမယ့် စာတမ်း သုံးစောင် ထွက်ရှိမှာဖြစ် ပါတယ် " ဟု ၄င်းကရှင်းပြသည် ။


နိုင်ငံရေး ၊ စီးပွားရေး ၊ သယံဇာတနှင့် သဘာဝပတ်ဝန်းကျင်ဆိုင်ရာစာတမ်းများအား သျှမ်း/တောင် ၊ သျှမ်း/မြောက် ၊ သျှမ်း/အရှေ့တွင်ရှိသော တိုင်းရင်းသား ကိုယ်စားလှယ်များ ၊  ပါတီများ၊ တိုင်းရင်းသားလက် နက်ကိုင်အဖွဲ့အစည်းများ၊ အခြားဖိတ်ကြားထားသော ပုဂ္ဂိုလ်များ ၊  CSO  ၊ NGO စသည့် အဖွဲ့အစည်း များအား ဖိတ်ကြားထားပြီး စာတမ်းဖတ်ကြားတင်ပြမည်ဖြစ်ကြောင်း ၄င်းထံမှဆက်လက်သိရသည် ။


ဧပြီလ  ၂၀  ရက်နေ့တွင်မူ သျှမ်းပြည်နယ်ရှိမြို့နယ်အားလုံး မြို့နယ်အဆင့်စတင်ဆွေးနွေးနေပြီဖြစ်ကြောင်း သိရှိရပါသည် ။



ဆက်ဖတ်ရန်


 
© 2012 All Rights Reserved | Asean Celebrity | Fonts @ AtFonts | Free Templates