ထိုင်းနိုင်ငံ အထက်ပိုင်း “ရိုးရာယဉ်ကျေးမှု မြင့်တင်ရေးနှင့် အတွေ့အကြုံ နှီးနှောဖလှယ်ပွဲ”အား ချင်းမိုင်မြို့ ခုမ်းဖူးခမ်းဟော်တယ်၌ ကျင်းပရာ “ဆရာသမားကောင်း” ဆုရ သျှမ်းပညာရှင်တစ်ဦး လည်း တက်ရောက်သည်။


အောက်တိုဘာလ ၂၃ ရက်မှ ၂၅ ရက်နေ့ထိ ၃ ရက်ဆက်တိုက် ကျင်းပရာမှာ ပညာရှင်အဆင့် ပုဂ္ဂိုလ်များနှင့် လေ့လာသူများ အင်အား ၃၀၀ ကျော် တက်ရောက်ခဲ့သည်။
ရိုးရာယဉ်ကျေးမှု မြင့်တင်ရေးနှင့် အတွေ့အကြုံ နှီးနှောဖလှယ်ပွဲ (Photo:SHAN)

“သျှမ်းလူမျိုးဆို အဘတယောက်တည်းဘဲ ပါတယ်။ သျှမ်းရိုးရာယဉ်ကျေးမှုတွေကို မပျောက်ကွယ် အောင် သက်ထက်ဆုံး သင်ကြားပို့ချပေးသွားမယ်” ဟု အခမ်းအနားတက်ရောက်သူ သျှမ်းပညာရှင် စဝ်ပိုင်းမိဏ်း က ပြောပါသည်။

အသက် ၇၅ နှစ်ရှိ တော်လှန်ရေးသမားဟောင်း မျိုးချစ်ပုဂ္ဂိုလ် စဝ်ပိုင်းမိဏ်း သည် ၂၀၁၂ အတွင်း ထိုင်းအစိုးရက ရွေးချယ်ချီးမြှင့်သည့် “ဆရာသမားကောင်း” ဆုရ ၅၃၃ ဦး အနက် တစ်ဦးအပါအဝင် ဖြစ်သည်။
စဝ်ပိုင်းမိဏ်း (Photo:SHAN)

“အနာဂတ်လူငယ်တွေ ဘာပဲလုပ်လုပ် သမိုင်းကြောင်းကို ပြန်ကြည့်စေချင်တယ်။ သမိုင်းကို ပြန်မ ကြည့်ရင် ရှေ့ဆက်ဖို့ ဇဝေဇဝါ ဖြစ်နေမယ်။ ဘာပဲလုပ်လုပ် စည်းကမ်းရှိပါ။ စာရိတ္တမကောင်းရင် ပျက်စီးမယ်။ ဒါကြောင့် စာရိတ္တကောင်းမွန်အောင် ကြိုးစားပါလို့ မှာချင်တယ်” ဟု ၎င်းက ပြောပါ သည်။

စဝ်ပိုင်းမိဏ်း သည် ၁၉၉၆ မှစ၍ လူငယ်များအား ကိန္နရီ − ကိန္နရာအက၊ သိုင်း(ဓား၊ လှံ၊ တုတ်)၊ အိုးစည်ဗုံမောင်းတီးခတ်ခြင်း ပညာများကို ထိုင်း−မြန်မာနယ်စပ်ရှိ ချင်းမိုင်ခရိုင် ဝိန်းဟဲန်မြို့နယ် ပိန်းလုံကျေးရွာအုပ်စုရှိ ၎င်း၏နေအိမ်၌ သင်ကြားပေးခဲ့သည်။