နတ်တော်လဆန်း ၁ ရက်နေ့ဟာ ရှမ်းလူမျိုးတို့ရဲ့ နှစ်သစ်ကူးနေ့ဖြစ်ပါတယ် ။

မိမိတို့လူမျိုး၏ အထွတ်အမြတ်ထားရာ ယဉ်ကျေးမှုအရ နှစ်သစ်တွင် လယ်ယာခြံမြေမှရလာသော ကောက်ပဲသီးနှံသစ်များကို ဘုရားတရား ရည်စူးပြီး သံဃာတော်တွေကိုလှူဒါန်းပါတယ် ။


လာမယ့်နှစ်မှာ ရာသီဥတုကောင်းမွန်အောင်၊ သီးနှံအထွက်တိုးအောင်၊ ရပ်ရေး ရွာရေးအေးချမ်းပြီး ကောင်းမွန်စွာ လယ်ယာလုပ်ငန်း လုပ်ကိုင်နိုင်အောင် ဆုတောင်းပါတယ် ။


လာမယ့်နှစ်မှာ မင်္ဂလာရှိအောင်ဆိုပြီး နှစ်သစ်ကူးညမှာ ပျော်ပွဲရွှင်ပွဲကျင်းပ ကခုန်ပျော်မြူးစွာနဲ့ နှစ်သစ်ကိုကြိုဆိုပါတယ် ။


ဒါပေမယ့် …

ဒီနှစ်တွေအတောအတွင်းမှာ ကျနော်တို့ ပြန်ကြည့်မယ်ဆိုရင် …
ရှမ်းနှစ်သစ်ကူးကို ကောင်းစွာမကြိုဆိုရလေအောင်၊
ကောက်သစ် ၀ါးသစ်တွေ ကောင်းစွာမလှူနိုင်လေအောင် ၊
အဖျက်အမှောင့် အနှောင့်အယှက်တွေက များပြားလွန်းလှပါဘိ ။
ဟော …တိုက်ပွဲတဲ့ ဖြစ်ရပြန်ပြီ။ ဟော … ကောက်တောင်မရိတ်ရသေးဘူး ဟိုရွာကလူတွေ ရွာကနေထွက်ပြေးရပြီ။
ဟော .. နင်းမိပြီတဲ့ ဗုံး ။


ကျနော်တို့ရှမ်းနှစ်သစ်ကူးနဲ့ တိုက်ဆိုင်အောင်ဘဲ တမင်သက်သက် ကြံရွယ်လုပ်ယူတာလားအောင့်မေ့ရတယ် ။


နှစ်သစ်မှာ မင်္ဂလာယူဖို့ဆိုခါမှ … တကတဲဗျာ… သူတို့ရဲ့ရိုးရာနှစ်သစ်ကူးကို အဲလိုသွားဖျက်ရင် ကြိုက်ကြပါ့မလား ။။


အရိပ်နေနေ အခက်ချိုးချိုး ၊ ကိုယ်သာအာဏာရှိဖို့ ၊ ကိုယ်သာ ကြီးမြတ်သူဖြစ်ဖို့ ၊ ကိုယ်ကျိုးကိုသာကြည့်တဲ့ လူဆိုးတွေ …
အေးချမ်းတဲ့မြေမှာ ယမ်းငွေ့ဝေအောင်ဖန်တီးကြတယ်။ အေးချမ်းတဲ့ဘဝကို ငိုသံလွှမ်းအောင်ဖန်တီးကြတယ်။ အေးချမ်းတဲ့လူနေမှုကို မိသားစုကွဲအောင် လုပ်နေကြတယ် ။


ဗုဒ္ဓဘာသာကိုးကွယ်တဲ့နိုင်ငံမှာနေပြီး .. ကိုယ်ချင်းစာတရားလေးတွေတောင်မရှိကြဘူး ။


မိစ္ဆာတွေထက်တောင်ဆိုးနေကြတယ် ။


သူတို့ပြောပြောနေတဲ့ ငြိမ်းချမ်းရေးရဖို့ ကျနော်တို့ ဘယ်လောက်ထိ စတေးရဦးမှာလဲ။ ကျနော်တို့ လူထုကို ချမ်းသာပေးပါလို့ တောင်းဆိုပါရစေ။ မင်္ဂလာရှိအောင် နှစ်သစ်ကိုမင်္ဂလာရှိရှိ ကြိုဆိုပါရစေ .. ဆရာ့ ဆရာကြီးများတို့ခင်ဗျား ။။


နမ့်ခမ်းမြို့ခံ

စိုင်းအိုက်စံ