သျှမ်းပြည်တောင်ပိုင်းလဲချားမြို့နယ် ဆရာတော်သံဃာတော်များနှင့်လူငယ်များနှင့် ရပ်ရွာ လူထုတို့တွေ့ဆုံ ကာ လဲချားမြို့အရေးပါသည့် ရှေးဟောင်းအမွေအနှစ်များ ပူးပေါင်း ထိန်းသိမ်းကြရန် ဇန်နဝါရီ ၉ ရက်နေ့က တွေ့ဆုံဆွေးနွေးခဲ့ကြကြောင်း သိရသည် ။

လဲချားမြို့ ကျောင်းပန်ကျောင်းတိုက်၏ ဆေးပေးခန်းတွင် ကျောင်းဟော်ခမ်း ဆရာတော် ဦးသုဘောဂ ဦးဆောင်သည့် သံဃာတော် နှင့် လူထုတို့ တွေ့ဆုံကြရာ  ရိုးရာအမွေအနှစ်များ ထိန်းသိမ်းရေး ၊ ဘုရားကျောင်းကန်များ၊ ရှေးဟောင်းလက်ရာအမွေအနှစ်များ၊ ရှေးသျှမ်းစော်ဘွားအုဋ်ဂူများ ပြုပြင်ထိန်းသိမ်းရေးအတွက် ဆွေးနွေးခဲ့ခြင်းဖြစ်ကြောင်း၊ ဒီ့အတွက် စော်ဘွားကြီး စဝ်ခွန်လိုင်း နှင့် စဝ်နွမ် တို့၏ အုဋ်ဂူများအား ပြုပြင်ထိန်းသိမ်းရန် ဆုံးဖြတ်ခြင်းဖြစ်ကြောင်း လဲချားမြို့ခံ  စိုင်းဆုကပြောသည် ။


“ လဲချားမြို့ဖွံ့ဖြိုးတိုးတက်လာအောင် ကျနော်တို့ရဲ့ ဒီစော်ဘွားကြီးတွေက လုပ်ဆောင်ပေးခဲ့တာ။ အခု ဒီအုဋ်ဂူတွေနားမှာ လူနေအိမ်တွေ ရှိလာတော့ ကြာလာရင် ပျောက်ကွယ်ကုန်မယ်လေ။ ဒါကြောင့် ဆွေးနွေးကြပြီးတော့ ဒီအမွေအနှစ်တွေကို နောင်လာနောက်သားတွေ တွေ့မြင်ရအောင်၊ ကျနော်တို့မြို့ရဲ့သမိုင်းတွေကို လူငယ်တိုင်းသိရှိရအောင်၊ မြို့သမိုင်းနဲ့အတူ မြို့အဖြစ်တည်ထောင် ပေးတဲ့ပုဂ္ဂိုလ်တွေ ၊ မြို့ဖွံ့ဖြိုးတိုးတက်အောင်လုပ်ပေးတဲ့ ရေမြေ့အရှင်သခင်တွေအကြောင်းပါ တွဲပြီးလေ့လာနိုင်အောင် ရည်ရွယ်ပြီးတော့ ဒီစော်ဘွားကြီး ၂ ပါးရဲ့ အုဋ်ဂူတွေကို ခြံခတ် ထိန်းသိမ်းဖို့ လုပ်ရခြင်းဖြစ်ပါတယ်။” - ဟု စိုင်းဆု ကပြောသည် ။


ကျောင်းဟော်ကျောင်းတိုက် ဆရာတော် ဦးဆောင်သည့် သျှမ်းတိုင်းရင်းသားများဒီမိုကရေစီအဖွဲ့ချုပ်မှ ပြည်နယ်လွှတ်တော်ကိုယ်စားလှယ် ဦးစိုင်းမွန်း၊ လဲချားမြို့လူငယ်ခေါင်းဆောင် စိုင်းလိုင်းဟိန်း၊ စိုင်းဆု တို့အဖွဲ့က အုဋ်ဂူများတည်ရှိရာနေရာသို့ကွင်းဆင်းသွားရောက်ကြည့်ရှုခဲ့ကြကြောင်း ဆိုပါသည် ။


လဲချားမြို့သူမြို့သားများအတွက်ကျန်းမာရေးစောင့်ရှောက်မှုပေးနိုင်ဖို့ ဆေးရုံကြီးများ၊ ပညာရေးမြင့်တင် ပေးဖို့ စာသင်ကျောင်းများ၊ သာသနာတော်ပျံ့ပွါးရေးအတွက် ဘုရားကျောင်းကန်များကို အဆိုပါ စော်ဘွားကြီး ၂ ပါးက တည်ထောင်လမ်းခင်းပေးခဲ့ကြောင်း၊ ထို့ကြောင့် စော်ဘွားကြီး ၂ ပါး၏ကျေးဇူးကို သိရှိအောင့်မေ့နေအောင်ရည်ရွယ်ကာ ကြွင်းကျန် ရစ်သော အုဋ်ဂူကို ခြံခတ်ထိန်းသိမ်းထားရန် စီစဉ်ရခြင်းဖြစ်ကြောင်း လဲချားလူငယ်ခေါင်းဆောင်က ပြောသည် ။


“ အရင်တုန်းကတော့ ထားလိုက်ပါတော့ ။ ကျနော်တို့ လုပ်ဖို့အခွင့်အလမ်း မရှိတာလဲပါတယ်။ သို့သော် သမိုင်းမမေ့အောင်ဆိုပြီးတော့ ရိုးရာပွဲလမ်းသဘင်ကျရင် စော်ဘွားသမိုင်းပြခန်းဆိုပြီးတော့ နှစ်စဉ်လုပ်လေ့ ရှိပါတယ်။ ဒါပေမယ့် ပွဲပြီးရင် ပြီးပြီလေ အဲတာတွေက။ ဆိုတော့ အစဉ်အမြဲတွေ့နိုင်တာ ဆိုလို့ဒီအုဋ်ဂူကို သတိရမိတာပါ။  ဒီအမွေအနှစ်တွေကိုထိန်းသိမ်းဖို့ကျနော်တို့ယောက်တိုင်းဆီမှာလည်း တာဝန် ရှိတယ်လေ။” - ဟု ဆိုပါသည် ။


လဲချားဒေသခံများမှ ခြံခတ်ထိန်းသိမ်းရန် စီစဉ်နေသည့် လဲချားစော်ဘွားကြီး စဝ်ခွန်လိုင်းနှင့် သားတော် စဝ်နွံတို့၏အုဋ်ဂူမှာ လဲချားမြို့အနောက်တောင်ဘက်ပိုင်းရှိ ရပ်ကွက် ၄ တွင်တည်ရှိပါသည်။  နှစ်ပေါင်း ၃၀ နီးပါးခန့်ရှိပြီဖြစ်သော စဝ်နွံ၏ အုဋ်ဂူကိုစတင်ခြံခတ်ရန်စီစဉ်နေပြီဖြစ်ပြီး ခမည်းတော် စဝ်ခွန်လိုင်း၏ အုဋ်ဂူ မှာမူ ဒေသခံ၏ ခြံဝင်းအတွင်းကျရောက်နေသဖြင့် အုဋ်ဂူခြံခတ်ရန်အတွက်  ခြံပိုင်ရှင်နှင့် ဆွေးနွေးနေ ဆဲဖြစ်ကြောင်း စိုင်းဆုက ဆက်လက်ပြောဆိုပါသည် ။


“ အရင်က ဒီတဝိုက်က သင်္ချိုင်းမြေလေ။ ဒါပေမယ့်အခုတော့ လူနေအိမ်တွေတိုးချဲ့လာတော့ ဒီအုဋ်ဂူတွေ ခြံဝင်းထဲကျသွားတာပေါ့။ အဲဒီအတွက် ဆွေးနွေးရဦးမယ်။”


အုဋ်ဂူခြံခတ်ရန်အတွက် လတ်တလောတွင် ဒေသခံများ တနိုင်တပိုင် လှူဒါန်းထားသည့်ငွေကျပ် ရ သိန်း ၀န်းကျင်ရှိပြီး အုဋ်ဂူ ၂ ခုလုံး ခြံခတ်ပြုပြင်မွမ်းမံရန်အတွက် အလှူငွေများဆက်လက်ကောက်ခံနေ ဆဲဖြစ် ကြောင်း၊ ပြည်တွင်းပြည်ပ ရပ်နီးရပ်ဝေးမှ စေတနာရှင် အလှူရှင်များ လှူဒါန်းလိုပါက ကျောင်းဟော် ဆရာတော်၊ ကျောင်းပန်ဆရာတော်ကြီးများထံသို့လည်းကောင်း၊ လဲချားမြို့လွှတ်တော်ကိုယ်စားလှယ်ကြီး များထံ သို့လည်းကောင်း လူငယ်အဖွဲ့ခေါင်းဆောင်များထံသို့လည်းကောင်း အသီးသီးလှူဒါန်းသွားနိုင် ကြောင်းလည်း သိရှိရပါသည်။ လဲချားစော်ဘွား စဝ်နွမ်သည် စော်ဘွားကြီး စဝ်ခွန်လိုင်း၏ သားတော်ဖြစ်ပြီး မြန်မာနိုင်ငံလွတ်လပ်ရေးရရှိရေးအတွက် တိုင်းရင်းသားခေါင်းဆောင်များနှင့် ဗိုလ်ချုပ်အောင်ဆန်းတို့ ၁၉၄၇ ပင်လုံစာချုပ်လက်မှတ်ရေးထိုးရာတွင်လည်း ပါဝင်လက်မှတ်ရေးထိုးခဲ့သည့် စော်ဘွားတပါးဖြစ်ပါးသည် ။