နပြည်တော်မှာ ကျင်းပပြုလုပ်တဲ့ ၂၁ ရာစု ပင်လုံ ညီလာခံ ဒုတိယ အကြိမ် သို့မဟုတ် ပြည်ထောင်စု ငြိမ်းချမ်းရေး ညီလာခံ ဟာ ဆွေးနွေးမှု မပြီးပြတ်သေးလို့ ယခင်က သတ်မှတ်ထားတဲ့ ရက်ထက် တစ်ရက် ထပ်တိုးလိုက်ကြောင်း သိရပါတယ်။

ပြည်ထောင်စုငြိမ်းချမ်းရေးညီလာခံ ကျင်းပရေးကော်မတီ ကလဲ - ၂၁ ရာစု ပင်လုံ ဒုတိယ အစည်းအဝေး အား မေလ ၂၉ ရက်နေ့ တနင်္လာနေ့အထိ ဆက်လက်ကျင်းပသွားမယ်လို့ ယနေ့ မေလ ၂၇ ရက်နေ့ ညနေပိုင်းက ထုတ်ပြန်ကြေငြာထားပါတယ်။


“ ပြည်ထောင်စု ငြိမ်းချမ်းရေးဆွေးနွေးမှု ပူးတွဲကော်မတီ UPDJC အစည်းအဝေးဆွေးနွေးမှု မပြီးသေးလို့ နက်ဖြန်မနက် ဆက်ဆွေးနွေးမယ်။ ဒါကြောင့် ညီလာခံကို တစ်ရက်ထပ်တိုးလိုက်တယ်” ဟု ပြည်ထောင်စု အင်စတီကျု ဒါရိုက်တာ ဦးခွန်ဆိုင်း ကပြောပါတယ်။


ပြည်ထောင်စုငြိမ်းချမ်းရေးညီလာခံကို  မေလ ၂၄ ရက်နေ့မှ ၂၈ ရက်နေ့ထိ ငါးရက်သာဆွေးနွေးမှု ကျင်းပပြုလုပ်သွား မည်ဖြစ်သော်လည်း ၂၉ ရက်နေ့တနင်္လာနေ့အထိ နောက်တရက်တိုးလိုက်ခြင်းဖြစ် ပါတယ်။


ပြည်ထောင်စုငြိမ်းချမ်းရေးဆွေးနွေးမှု ပူးတွဲဆောင်ရွက်ရေးကော်မတီ UPDJC အစည်းဝေးမှာ ၃ ရက်သာ ဆွေးနွေးခဲ့တဲ့ ကဏ္ဍအလိုက် အစုအဖွဲ့အလိုက် ဆွေးနွေးခြင်းကို မေလ ၂၇ ယနေ့ ပြန်လည် ဆွေးနွေးဖို့စီစဉ် ထား ပေမယ့်  မဆွေးနွေးဖြစ်ဘဲ မေလ ၂၈ ရက်မှာဆွေးနွေးဖို့ရက်ရွှေ့လိုက်တာဖြစ်ပါတယ်။ ဒါကြောင့်မို့  ပြည်ထောင်စုငြိမ်းချမ်းရေးညီလာခံကို ၂၉ ရက်နေ့ တနင်္လာနေ့မှာအဆုံးသတ်မှာဖြစ်တယ်လို့လည်း ညီလာခံကျင်းပရေးဗဟိုကော်မတီက ကြေငြာလိုက်ပါတယ်။