ကဆုန်လပြည့် မေလ ၂၁ ရက်နေ့တွင် သျှမ်းပြည်တောင်ပိုင်း မိုးနဲမြို့နယ် နားခံကျေရွာအုပ်စု လွယ်စက်တော်ခေါ် ဗုဒ္ဓမြတ်စွာဘုရား ခြေရာတော်ရှိသောတောင်၌ မိုးခေါ်ပွဲနှင့်  တောင်သူ လယ်သမားများ၏ သဘာဝ ဘေးအန္တရာယ် ထိန်းသိမ်းခြင်း ဆိုင်ရာ နှီးနှော ဖလှယ်ပွဲ ကျင်းပ ပြုလုပ်သွားမည် ဖြစ်ကြောင်း သိရသည် ။


အဆိုပါပွဲတွင် မိုးနဲမြို့နယ် အပါအဝင် သျှမ်းပြည်တွင်း ၁၇ မြို့နယ်မှ တောင်သူလယ် သမား အဖွဲ့များကတက်ရောက်မည်ဖြစ်ကြောင်း ၊ မိုးနဲမြို့နယ်တွင် ရေခမ်း ခြောက်မှုများ ကြုံတွေ့ နေရခြင်း နှင့် ပတ်သက်ပြီး သဘာဝပတ်ဝန်းကျင်ထိန်းသိမ်းရေးအတွက် ဆွေးနွေးသွား မည်ဖြစ်ကြောင်း သိရသည် ။

ပွဲကျင်းပရန် ဒေသခံများစုပေါင်းပြင်ဆင်နေပုံ (ဓါတ်ပုံ-  Sai Mg Gyi )

ထို့အပြင် မိုးနဲမြို့ မြောက်ဘက်ရှိ  လွယ်စက်တော်တောင်တွင် ငွေရှင်များက ကျောက်မီး သွေးတူး ဖော်ရန်စမ်းသပ်နေမှုများကို ဒေသခံများမှ မကြာခဏဆိုသလိုတွေ့ရှိနေရကြောင်း မိုးနဲမြို့၏  ပြည်နယ် လွှတ်တော် အမတ် စိုင်းမွန်းလိန် ကပြောသည် ။


“ သျှမ်းပြည်တဝှမ်းက တောင်သူလယ်သမားအဖွဲ့ ဒီဆုတောင်းပွဲကိုလာတက်မယ် ။ အတူတူ မိုးခေါ်ကြမယ်။ အခုမိုးနဲမှာ ရေအရမ်း ခမ်းခြောက်နေတယ် ။ ပြီးတော့ ကုမ္မဏီကြီးတွေက ကျောက်မီးသွေးလာတူးမယ်လို့ ကြားထားတယ်။ မိုးနဲရဲ့သမိုင်းဝင် လွယ်စက်တော်တောင်မှာ ။ အဲ့ဒါကိုလည်း ကာကွယ်မယ် ” ဟု ပြောသည် ။


ယင်း ကျောက်မီးသွေးသည် နမ့်ဟူးစက်တော်တောင် (စက်တော်ရေထွက်တောင်) ၏ အထက်ပိုင်း တွင်ရှိပြီး နမ့်ဟူးစက်တော် ပျက်စီးလျှင် နမ့်ဟူး (သဘာဝ) ရေပေါက်ကို အမှီပြုနေသည့် လယ်ယာ မြေများ ပျက်စီးမည်ဖြစ်ကြောင်း ၊ လယ်ယာများပျက်စီးလျှင် တောင်သူလယ် သမားများ ဒုက္ခရောက်မည် ဖြစ်ကြောင်း မိုးနဲမြို့ဒေသခံ  သျှမ်းလူငယ် စိုင်းမျိုး (yookyaak) ကပြောသည် ။


“ ကျောက်မီးသွေးတူးဖော်မှုကို တာဆီးဖို့ ၊ သဘာဝပတ်ဝန်းကျင်ကိုကာကွယ်ဖို့ ဒီပွဲကိုလုပ်ရခြင်း ဖြစ်တယ် ။ ပြီးခဲ့တဲ့ နှစ်နှစ်လောက်က ကျောက်မီးသွေးတူးဖို့ ငွေရှင်တွေက ကြိုးစားခဲ့ဖူးတယ်လို့ ရွာသားတွေပြောပြချက်အရသိရတယ် ။ ဒါကို တောင်သူလယ်သမားအသင်းအဖွဲ့နဲ့ ကျားဖြူပါတီ လွှတ်တော် အမတ်တွေက ကန့်ကွက်တော့ ကျောက်မီးသွေးတူးဖော်မယ့် အစီအစဉ် ရပ်သွားတယ်။ ဒါပေမယ့် မကြာခဏဆိုသလို လာရောက် စမ်းသပ်နေတာရှိတယ် ” ဟု ၄င်းက ဆက်လက် ပြောပြသည် ။


သဘာဝပတ်ဝန်းကျင် ထိန်းသိမ်းခြင်း ၏ ပြယုဂ် တစ်ခုဖြစ်စေရန်ရည်ရွယ်ပြီး ချယ်ရီပင်ပေါင်း တစ်ထောင်ပင် စိုက်ရန် စီစဉ်ထားသော်လည်း ရာသီဥတု အခြေအနေကြောင့်  သြဂတ်စ်လမှသာ  စိုက်ပျိုးဖြစ်မည် ဖြစ်ကြောင်း စိုင်းမျိုး (yookyaak) ကဆက်လက်ရှင်းပြသည် ။


သဘာဝ ပတ်ဝန်းကျင် ထိန်းသိမ်းခြင်းဆိုင်ရာ ဗဟုသုတ ပေးသည့် ဗီနိုင်းများ ခင်းကျင်းပြသထားသည့် အဆိုပါ သဘာဝပတ်ဝန်းကျင် ထိန်သိမ်းခြင်းဆိုင်ရာ နှီးနှောဖလှယ်ပွဲ ကျင်းပရခြင်း၏ ရည်ရွယ်ချက်မှာ သဘာဝ သစ်တောထိန်းသိမ်းရန် နှင့် မိုးနဲမြို့ဂုဏ်ဆောင် သမိုင်းဝင် ခြေရာတော်ရှိ  လွယ်စက် တော်တောင်အား ဖျက်ဆီးလာမည့်ရန်အမျိုးမျိုးကို ကာကွယ်ရ န်၊ မိုးနဲမြို့၏ သဘာဝအလှများကို ထိန်းသိမ်းရန် စသည်တို့ဖြစ်ကြောင်း မိုးနဲမြို့ခံလူငယ်များက ပြောသည် ။