သျှမ်းပြည်မြောက်ပိုင်း မူစယ်ဒေသခံ ၆၀၀ ကျော်က အောင်ဂရုဏာ အမှိုက်သိမ်းကုမ္မဏီအား ကျေးရွာအတွင်းအမှိုက်များစွန့်ပစ်ထားသည့်အတွက် ဆန္ဒပြခဲ့ကြကြောင်းသိရသည်။


သြဂတ်စ်လ ၂၀ ရက်နေ့က မူစယ်မြို့တွင်း ကောင်းမူးခမ်း (ကျောင်းစန်း) မှ ၁ မိုင်ကျော်ဝေးသည့် နမ့်ခမ်းသို့အသွားလမ်း အမှိုက်များစွန့်ပစ်ရာ မန့်ဝိန်းရွာ သို့လမ်းလျှောက် ဆန္ဒပြခဲ့ကြခြင်းဖြစ်သည်။

မူစယ်မြို့သန့်ရှင်းသာယာရေးအတွက် အမှိုက်သိမ်းဖို့ကန်ထရိုက်ဆွဲထားတဲ့ အောင်ဂရုဏာကုမ္မဏီက မန့်ဝိန်းရွာအတွင်း ဘော်လုံးကွင်းမှာ အမှိုက် တွေကို ဒီအတိုင်းပစ်ထားတာ။ မိုးကျရင် ထမင်းစားလို့တောင် မရဘူး အနှံ့ကတအားဆိုးတယ်။ ခြောက်သွေ့ရာသီကျတော့ အမှိုက်တွေ မီးလာရှို့တော့ တအားနံတယ် - ဟု စိုင်းကမ်ကပြောသည်။


မန့်ဝိန်းရပ်ကွက်သားများနှင့်အတူ မူစယ်ဒေသခံများ အားကစားသမားများသည် - ပြည်သူ့ကျန်းမာရေး ဂရုစိုက်ဆောင်ရွက်ပေး ဒို့အရေး၊ မန့်ဝိန်းအားကစားကွင်းဘေး အမှိုက်ပုံရှင်းလင်းပေးရေး ဒို့အရေး၊ အောင်ဂရုဏာအမှိုက်သိမ်းကုမ္မဏီ အလိုမရှိ အစရှိဆိုင်းဘုတ်များကိုင်ဆောင်ကာ စီတန်းလှည့် လည်ခဲ့ကြ သည်။


မူစယ်မြို့ဒေသခံ နန်းအေဝမ်းက - မူစယ်ကအရင်တုန်းက တကယ့်ကိုသာယာလှပတဲ့နယ်စပ်မြို့ပဲ။ အခုနောက်ပိုင်းကျတော့ အမှိုက်တွေကို  လာမကောက်လာမသိမ်းတော့ မြို့အရမ်းရုပ်ဆိုးစေတယ်။ ပိုက်ဆံသာ လစဉ်ပေးရပြီးအမှိုက်ကျတော့လာမကောက်ဘူး။ ကြာကြာမှတခါလာရှင်းတော့ ဟိုတယ်ကြီးရှေ့တို့ ဈေးရှေ့တို့ နာရီစဉ်နားတို့ သွားသွားပုံထားကြတယ် - ဟု ပြောသည်။


စည်ပင်သာယာကြေးအတွက် သာမန်အိမ် တလကျပ် ၁၅၀၀ ၊ အိမ်ထောင်စုကြီးပါက တလ ကျပ် ၂၀၀၀၊ စတိုးဆိုင် တလကျပ် ၃၅၀၀ ၊ လဘက်ရည်ဆိုင် စားသောက်ဆိုင်များအား တလ ကျပ် ၅၀၀၀ မှ ၆၀၀၀ အစရှိ အမှိုက်သိမ်းခကောက်ယူကြောင်း၊ သို့သော်အမှိုက်များကိုမူ တလကျော်ကြာသည့် တိုင်လာမ ကောက်ကြောင်း ဒေသခံများ ပြောပြချက်အရ သိရသည်။


အောင်ဂရုဏာကုမ္မဏီသည် မူစယ်မြို့တွင်အမှိုက်သိမ်းရန်အတွက် ကန်ထရိုက်ဆွဲထားရာ နှစ် ၃၀ အမှိုက်သိမ်းရန်အခွင့်ရထားသည်။ ထိုသို့ သိမ်းပြီးသွားသည့်အမှိုက်များကို စည်းမဲ့ကမ်းမဲ့လွှင့်ပစ် ထားမှုကြောင့် လွန်ခဲ့သည့် ၃-၄ နှစ်ကတည်းက ဒေသခံများငြီးငြူသော်လည်း ယနေ့တိုင်အမှိုက်များ ရှင်းလင်းခြင်းမရှိသည့်အတွက် ယခုကဲ့သို့ ဆန္ဒပြကန့်ကွက်ခြင်းခံခဲ့ရခြင်းဖြစ်သည်။