သျှမ်းပြည်အရှေ့ပိုင်း ကျိုင်းတုံမြို့၌ သျှမ်းတမျိုးသားလုံး စုပေါင်းကျင်းပသော သျှမ်းနှစ်သစ်ကူး အထူးပွဲတော်ဖွင့်ပွဲ ယနေ့ မနက် ကျင်းပရာ သျှမ်းခေါင်းဆောင်ခွန်ထွန်းဦးကိုယ်တိုင် တက်ရောက်ဖဲကြိုးဖြတ်ဖွင့်လှစ်ပေးခဲ့ကြောင်း သိရသည်။

ကျိုင်းတုံမြို့ သျှမ်းနှစ်သစ်ကူးပွဲတော်အား ခွန်ထွန်းဦးနှင့် စိုင်းလုံးဆိုင်တို့ ဖဲကြိုးဖြတ် ပွဲဖွင့်လှစ်စဉ် (ဓါတ်ပုံ-ကော့လီမီဒီယာ)

“ကျိုင်းတုံမြို့ ဘောလုံးကွင်းမှာ ဖွင့်ပွဲလုပ်တယ်။ ပရိတ်သတ် ၈၀၀၀ ကျော်တက်ရောက်တယ်။ သျှမ်း တိုင်းရင်းသား များ ဒီမိုကရေစီအဖွဲ့ချုပ်ဥက္ကဌ ကျနော်တို့ သျှမ်းအမျိုးသားခေါင်းဆောင်ကြီး ခွန်ထွန်းဦး နဲ့ ပြည်နယ်လွှတ်တော်ဥက္ကဌ လုံးစိုင်းလုံးဆိုင် က ဖဲကြိုးဖြတ် ဖွင့်လှစ်ပေးတယ် ” ဟု ကျိုင်းတုံ ရောက် သျှမ်းသံတော်ဆင့် သတင်း ဌာနမှ  စိုင်းဆိုင်ယ ကပြော သည်။

ဖွင့်ပွဲအား နံနက် ၉ နာရီ ၉ မိနစ်တွင် ကျင်းပရာ တြိဂံစစ်တိုင်းမှူး ဗိုလ်မှူးချုပ် သန်းထွန်းဦး အပြင် သျှမ်းသမိုင်းကျွမ်းကျင် ပညာရှင် ဆရာစိုင်းအောင်ထွန်း၊ မြို့မိမြို့ဖ လုံးစိုင်းဟောင်ခမ်း ရန်ကုန်သျှမ်းစာပေယဉ်ကျေးမှုကော်မတီမှ ဒေါက်တာ စိုင်းဆန်အိုက် ၊ ပွဲဖြစ်မြောက်ရေး ဥက္ကဌစိုင်းယွက် တို့ အမှာစကားပြောကြားခဲ့ကြ သည်ဟု ဆိုပါသည်။

“တိုင်းမှူးက ငွေကျပ် ၁ သန်း ထည့်ဝင်ကူညီတယ်။ သမိုင်းပြခန်းကို လေ့လာသွားတယ်။ ယဉ်ကျေးမှု ပြခန်း အသုံးအဆောင် ပြခန်းကြည့်ရှုတယ်။ တိုင်းမှူးပြောသွားတာက ကနေ့ခေတ် နိုင်ငံရေးတိုးတက်ပြောင်းလဲလာပြီ။ လက်နက်ကိုင်တော်လှန် ရေးအဖွဲ့ ဆိုတာလဲ မရှိတော့ဘူး။ အေးအေးချမ်းချမ်းရှိလာပြီဆိုတော့ မိမိဒေသ မိမိလူမျိုးရဲ့ စာပေ ယဉ်ကျေးမှု ဖွံ့ဖြိုး တိုးတက်လာအောင်လက်တွဲပူးပေါင်း မြင့်တင်ဖို့ - အစရှိပြောသွားတယ်။ ပရိသတ်သဘောအကျဆုံးကတော့ တိုင်းမှူးက အဖွင့်မှာ မိုင်ဆုံခါ့ လို့ပြောတယ်။ အပိတ်မှာကျတော့ ယင်းစုမ်းခ လို့ နှုတ်ဆက်သွားတယ်။ အဲတာက မြို့ခံတွေက သဘောကျတယ်။  ” စိုင်းဆိုင်ယ က ပြောသည်။

ဖွင့်ပွဲသို့  SNLD ဥက္ကဌ ခွန်ထွန်းဦး ဦးဆောင်သောအဖွဲ့၊ စိန်ကျော့ဌာနေပြည်သူ့စစ်မှ  စဝ်ကိုင်ဖှ ၊ မိုင်းလား တပ်ဖွဲ့မှ စဝ်ခွန်ဆန်လူ စဝ်ဆိုင်လား ၊ သျှမ်းပြည်တပ်မတော် RCSS/SSA မှ  စဝ်စိုင်းလူး ၊ ကျားဖြူပါတီ ဥက္ကဌ စိုင်းယွက်  ၊ ဆရာမ နန်းမိုခမ်း ဆရာမနန်းဟွမ်လိတ်တို့လည်း တက်ရောက်ခဲ့သည်။   သျှမ်းပြည်မြောက်ပိုင်းမူဆယ်နမ့်ခမ်းလားရှိုး   သျှမ်းပြည်တောင်ပိုင်း  တောင်ကြီး  လွယ်လင် ပင်လုံ မိုးနဲ အစရှိ မြို့နယ်များအားလုံး မှ စာပေယဉ်ကျေးမှုအဖွဲ့ အင်အား ၈၀၀၀ ကျော် ဖွင့်ပွဲတက်ရောက်ခဲ့သည်။ 

“ အခု နေ့ခင်းပိုင်းမှာကျတော့  မုံးပိန်းကျောင်းတိုက်မှာ ဆရာစိုင်းအောင်ထွန်း ဒေါက်တာစိုင်းဆန်အိုက် မဟာမုံ့ (မုံးစယ့်) ဒေါက်တာစိုင်းဆန်ဖေ အစရှိ သမိုင်းဆရာတွေ မြို့မိမြို့ဖတွေက ကျိုင်းတုံမြို့ သမိုင်းကြောင်းကိုဟောပြောနေကြတယ်။   ည ကျမှ မြို့နယ်အသီးသီးက ပြင်ဆင်လာတဲ့ အကအဖွဲ့ကနေ ကပြတင်ဆက်သွားတယ်။ ခေတ်ဟောင်း ခေတ်သစ်တေး သီချင်းတွေ သီဆိုဖျော်ဖြေကြမယ်။ နက်ဖြန်မနက်မှ စာပေဟောပြောမယ့် ဆင်မီနာ အခန်းအနား စမယ်” ဟုလည်း ဆိုပါသည်။

သျှမ်းပြည်အတွင်း ပထမဆုံးအကြိမ်စုပေါင်းကျင်းပမှုဟုလည်းဆိုနိုင်သည့်အဆိုပါပွဲတော်သို့ ပရိ သတ်အများအပြား လာရောက်ပူးပေါင်းဖွင့်လှစ်ရာ နေရာထိုင်ခင်း မရှိတော့သည့်အဖြစ်လည်း ရှိခဲ့ကြောင်း ကျိုင်းတုံဒေသခံတဦးကပြောသည်။

ကျိုင်းတုံမြို့  သျှမ်းနှစ်သစ်ကူးအထူးပွဲတော်ကို ဒီဇင်ဘာ ၁၂ ရက်မှ ၁၄ ရက်အထိ ကျင်းပသွားမည်ဖြစ်သည်။