အာဏာပိုင်နှင့်ပြည်သူအကြား ဥပဒေနှင့်လူ့အခွင့်အရေးများဆိုင်ရာအလုပ်ရုံ ဆွေးနွေးပွဲကို Mercy Corps နှင့် ချယ်ရီပုံရိပ်အဖွဲ့တို့ မှပူးပေါင်း၍ တောင်ကြီးမြို့ရှိ ဟုတ်ကြန့်ဘုံကျောင်းတွင် မတ်လ(၂၁)ရက်နေ့က ကျင်းပခဲ့ကြောင်း သတင်းရရှိသည် ။

တောင်သူလယ်သမားအခွင့်အရေး အလုပ်ရုံဆွေးနွေးပွဲ

ကျေးရွာလူထုအား မြန်မာနိုင်ငံ၏အုပ်ချုပ်မှုစနစ်၊ ဥပဒေနှင့် လူ့အခွင့်အရေးများအကြောင်း သိရှိနားလည်နိုင်ရန် အတွက် ဆွေးနွေးပွဲကျင်းပရခြင်းဖြစ်ကြောင်း ပွဲဖြစ်မြောက်ရေးကော်မတီမှ ဒေါ်ချိုမြဦးက ပြောသည်။

"  ဒီလယ်မြေတွေသိမ်းခံရတဲ့ကိစ္စနဲ့ပတ်သတ်လို့  ဘာကြောင့် သိမ်းခံရတယ် ၊  လယ်မြေပြန်ရဖို့ အတွက်ကို ချယ်ရီ ပုံရိပ်အဖွဲ့အနေနဲ့ဘာတွေလုပ်ပေးနိုင်မယ် ဆိုတာရှင်းပြပြီး သူတို့ဆီက အကြံဉာဏ်တွေကို ရယူပါတယ်  " ဟု ၄င်းကဆက် လက်ရှင်းပြသည်။

ယင်းဆွေးနွေးပွဲသို့ သျှမ်းပြည်တောင်ပိုင်းရှိ လဲလျောင်း၊ ကောင်းတန်၊ ညိုမီး၊ ဘော်ဆိုင်း၊ အောင်ပန်းစသည့် ကျေးရွာများ မှ လယ်ယာမြေများသိမ်းဆည်းခံရသောတောင်သူလယ် သမား (၃၀၀) ၀န်းကျင်ခန့်တက်ရောက်ခဲ့ကြောင်းသိရသည်။

" ကျနော်တို့ဘော်ဆိုင်းဒေသမှာအရင်ကချယ်ရီပုံရိပ်အဖွဲ့ကလာရောက်ပြီး ဆွေးနွေးပွဲတွေပြုလုပ်ပေးခဲ့တဲ့အတွက် ကျနော် တို့ ခုလည်းဒီပွဲကိုတက်ရောက်နိုင်ခဲ့တာပါ။ ဒီပွဲကိုတက်ရောက်ရတဲ့အတွက် ဥပဒေ အကြောင်းတွေ ကိုအနည်းငယ် သိရှိနား လည်လာတယ် " ဟုဘော်ဆိုင်းဒေသခံ ကိုဝင်းနိုင်ကပြောသည်။

သျှမ်းပြည်နယ်အတွင်း မြေယာကိစ္စနှင့်ပတ်သက်၍ တောင်သူလယ်သမားများက ပြည်နယ် အစိုးရကို အကြိမ်ကြိမ် ဆန္ဒပြ  ခဲ့ဖူးသည် ။  တောင်ကြီးခရိုင်၊ တာချီလိတ်ခရိုင် နှင့် ကျောက်မဲခရိုင်တို့တွင် မြေယာကိစ္စနှင့် ပတ်သက်၍ သျှမ်းပြည်နယ် အစိုးရအနေနှင့် အမှုတွဲပေါင်း တစ်ထောင်ကျော်ဖြေရှင်းနေရပြီး ဒေသခံ တိုင်းရင်းသား များ၏ နေ့စဉ်မြေယာပြဿနာမှာ လည်းအမှုတွဲပေါင်းတစ်ထောင်ကျော်ရှိနေကြောင်း သျှမ်းပြည်နယ် ၀န်ကြီးချုပ် ဦးစဝ်အောင်မြတ်မှ ၂၀၁၄ ဒီဇင်ဘာ၂၄ ရက်နေ့က ပြောကြားခဲ့ဖူးသည်။