တိုင်းရင်းသားအားလုံးပါဝင်သော အပစ်ရပ်ရေးမူဝါဒ ဆက်လက်စွဲကိုင်ထားဖို့ UNFC ဥက္ကဌ တိုက်တွန်း
လော်ခီးလာတိုင်းရင်းသား ညီလာခံကို တက်ရောက်နေသော တိုင်းရင်းသား လက်နက်ကိုင်အဖွဲ့များ အား ညီညွတ်မှုကို ဗဟိုပြု၍ အားလုံးပါဝင်သော အပစ်အခတ်ရပ်စဲရေး မူဝါဒကို ဆက်လက် ကိုင်စွဲ ထားကြရန် UNFC ညီညွတ်သောတိုင်းရင်းသား လူမျိုးများ ဖက်ဒရယ်ကောင်စီ ဥက္ကဌ ဗိုလ်ချုပ်ကြီး အန်ဘန်လက တိုက်တွန်းပြောဆိုလိုက်သည်။
ကေအန်ယူထိန်းချုပ်နယ်မြေတွင် ကျင်းပနေသည့် တိုင်းရင်းသား လက်နက်ကိုင်အဖွဲ့များ၏ ညီလာခံ ဒုတိယမြောက်နေ့တွင် သဘာပတိ အဖြစ်ဆောင်ရွက်သည့် UNFC ဥက္ကဌမှ ဆွေးနွေးပွဲ အဖွင့်မိန့်ခွန်း ပြောကြားရာတွင် ယင်းကဲ့သို့ ပြောဆိုလိုက်ခြင်း ဖြစ်သည်။
‘ ဒီကနေ့ အစည်းအဝေးမှာ တက်ရောက်နေကြတဲ့ တိုင်းရင်းသား ကိုယ်စားလှယ်တွေ အားလုံးဟာ အဖိနှိပ်ခံတွေဖြစ်ကြတဲ့အတွက် ဘက်တဘက်တည်းမှာရှိတယ်။ ဘဝတူတွေပဲဖြစ်တယ်။ အားလုံးဟာ မိမိတို့ရဲ့ အကျိုးစီးပွား (ဝါ) နိုင်ငံရေးအကျိုးအတွက် အခြားတဘက်ဖြစ်တဲ့အစိုးရနဲ့ ဆွေးနွေးညှိ နှိုင်းကြရမှာဖြစ်တယ်။အချင်းချင်း မဘက်ပြိုင်ပဲ ညီညွတ်ကြဖို့လိုတယ် ‘ ဟု UNFC ဥက္ကဌ က ပြောသည်။
ထို့အပြင် တိုင်းရင်းသားများအနေဖြင့် အတိတ် ကာလက ပြည်ထောင်စုအောင် အကောင်အထည် ဖော်ပေးခဲ့ဖူးပြီး လက်ရှိတွင်လည်း ပြည်ထောင်စုဖြစ်ပေါ်လာစေရန် တိုင်းရင်းသား များဘက်မှ ဆောင်ရွက်နေသဖြင့် အစိုးရအနေဖြင့် တိုင်းရင်းသားများအပေါ်တွင် သံသယ ဖြစ်စရာ အကြောင်းမရှိကြောင်း ပြောဆိုသည်။
ကျင်းပနေသည့် လော်ခီးလာ ညီလာခံသည် အစိုးရနှင့် တိုင်းရင်းသား လက်နက်ကိုင်အဖွဲ့များအကြား မတ်လ ၃၁ ရက်နေ့က နှစ်ဘက်သဘောတူခဲ့ကြသည့် တနိုင်ငံလုံးဆိုင်ရာ အပစ်ခတ်ရပ်စဲရေး မူကြမ်း နှင့် ပတ်သက်ပြီး တိုင်းရင်းသား လက်နက်ကိုင်အဖွဲ့ခေါင်းဆောင်များထံမှ သဘောဆန္ဒရယူရန် ကျင်းပ နေခြင်းဖြစ်သည်။
ယင်းမူကြမ်းနှင့် ပတ်သက်၍ အဖွဲ့အချို့မှာ လုံလောက်ပြီဟု ယူဆမှုများရှိနေသော်လည်း အဖွဲ့အစည်း တော်တော်များများမှာ ပိုမိုခိုင်မာသည့် အာမခံချက်များ ရရှိပါမှ လက်မှတ်ရေးထိုးလိုသည့်အတွက် အပစ်ရပ်စာချုပ်မူကြမ်းပါ အချက်အချို့ကို ပြန်လည် ပြင်ဆင်ဖြည့်စွက် လိုသည်ဟု ဆွေးနွေးပွဲ မတိုင်မှီကပင် ထုတ်ဖော်ပြောဆိုမှုများရှိနေသည်။
ယင်းအပြင် အစိုးရနှင့် တိုင်းရင်းသား လက်နက်ကိုင်အဖွဲ့များအကြား သဘောထားကွဲလွဲနေသည့် လက်မှတ်ရေးထိုးရာတွင် ပါဝင်ရမည့် အဖွဲ့အစည်းများကိစ္စနှင့် ပတ်သက်၍လည်း ‘ တအာင်းနဲ့ ကိုးကန့်ဟာလည်း ၁၃၅ မျိုးသော တိုင်းရင်းသားတွေထဲပါတာပဲ။ အခုချိန်ကျမှ ကိုးကန့်နဲ့ ပတ်သက်ပြီး မကောင်းပြောတာတွေ ရှုံ့ချတာတွေ ကြားနေရတယ်။ ဒီအချိန်မှာ ပြည်ပ ရန်သူသဖွယ် မဆက်ဆံ သင့်ပါဘူး။ သူတို့ဟာလည်း NCCT အဖွဲ့ဝင်တွေဖြစ်တဲ့အတွက် လက်မှတ်ရေးထိုးရာမှာ သူတို့လည်း ပါဝင်သင့် တယ်။ အားလုံးပါဝင်ရေးမူကို ဆက်လက်စွဲကိုင်သွားကြဖို့လည်း တိုက်တွန်းလိုပါတယ်။ ‘ ဟု ဗိုလ်ချုပ်ကြီးအန်ဘန်လက တိုက်တွန်းပြောဆိုသည်။
လက်ရှိအချိန်အထိ ကိုးကန့် ၊ အေအေ ရခိုင် တပ်မတော် အဖွဲ့တို့ကို အစိုးရဘက်မှ ဆွေးနွေးဘက်နှင့် လက်မှတ်ထိုးဘက်အဖြစ် သတ်မှတ်ထားခြင်း မရှိပေ။
ပါဝင်လက်မှတ်ရေးထိုးရမည့် အဖွဲ့အရေအတွက်နှင့် ပတ်သက်ပြီး မြန်မာငြိမ်းချမ်းရေး စင်တာမှ ဦးလှမောင်ရွှေက ‘ အခုထိတော့ အစိုးရဘက်က ပါဝင်လက်မှတ်ရေးထိုးရမဲ့ အဖွဲ့ ၁၆ ဖွဲ့လို့ သတ်မှတ် ထားတာကို ပြောင်းလဲတာမျိုးမဟုတ်သေးဘူး။ ကျနော့အမြင်ကတော့ တပ်ဘက်က ကိုးကန့်ကိစ္စ လက်ခံမှာ မဟုတ်ဘူး။ ဗဟိုကော်မတီက အစိုးရ ၊ တပ်မတော်နဲ့လွှတ်တော်တို့ပေါင်းဖွဲ့ထားတာဆိုတော့ တပ်မတော်က လက်မခံရင် ကိုးကန့်ကိစ္စက ဖြစ်နိုင်မှာ မဟုတ်ပါဘူး ‘ ဟု အားလုံးပါဝင်ရေးမူနှင့် ပတ်သက်ပြီး မှတ်ချက်ပြုပြောဆိုသည်။
ကျင်းပနေသည့် လော်ခီးလာညီလာခံကို ကုလသမဂ္ဂအထွေထွေအတွင်းရေးမှူးချုပ်၏ မြန်မာနိုင်ငံဆိုင်ရာ အထူးကိုယ်စားလှယ် မစ္စတာ နမ်ဘီးယားကလည်း လေ့လာသူအဖြစ် တက်ရောက်နေပြီး ရွေးကောက်ပွဲမတိုင်မှီ နိုင်ငံလုံးဆိုင်ရာ အပစ်ခတ်ရပ်စဲရေးလက်မှတ်ရေးထိုးရန် တိုက်တွန်းခဲ့ကြောင်း သိရသည်။
Tags: News, politic