ဝ ပြည်သွေးစည်းညီညွတ်ရေးပါတီ UWSA မှာ ၁၉၈၉ ခုနစ်ကတည်းက မြန်မာအစိုးရနှင့် ငြိမ်းချမ်းရေး ရယူပြီးဖြစ်သဖြင့် နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးမှုတွင် ပါဝင်လက်မှတ်ရေးထိုးရန် လိုအပ်သလောဟု ၀ တပ်ဖွဲ့၏ ပေါ်လစ်ဗျူရို အဖွဲ့ဝင်များက ပန်ဆန်းတွင် ကျင်းပနေသည့် ပေါ်လစ်ဗျူရို အစည်းအဝေးတွင် မေးခွန်းထုတ်ကြောင်း သိရသည် ။

စက်တင်ဘာလ ၁၈ ရက်နေ့မှ စတင်ကျင်းပနေသည့် ၀ ပြည်သွေးစည်းညီညွတ်ရေးပါတီ၏ ပေါ်လစ်ဗျူရိုအဖွဲ့ အစည်းအဝေးမှာ နိုင်ငံလုံးဆိုင်ရာ အပစ်ခတ်ရပ်စဲရေး လက်မှတ်ရေးထိုးမှုတွင် ၀ တပ်ဖွဲ့အနေဖြင့် ပါဝင်ရန် အစိုးရဘက်မှ ကမ်းလှမ်းခဲ့ပြီးနောက်ပိုင်း အဖွဲ့အတွင်း သဘောထားကို ဆွေးနွေးရန်အတွက် ကျင်းပနေခြင်း ဖြစ်သည် ။


“ အခု ကျင်းပပြီးစီးသလောက် ကတော့ မူဝါဒပြောင်းဖို့ သိပ်မရှိဘူး ။ တော်တော်များများကလည်း ဘာကြောင့် ၀ တပ်ဖွဲ့အနေနဲ့ ပါဝင်လက်မှတ်ရေးထိုးရမှာလည်း ဆိုတာကိုပဲ မေးခွန်းထုတ်နေတယ် ။ ပြီးတော့  လက်ရှိ နိုင်ငံရေး အခြေနေတွေနဲ့ တခြားတိုင်းရင်းသားအရေးတွေနဲ့ ပတ်သက်လို့လည်း ဒီအစည်းအဝေးမှာ ဆွေးနွေး နေတယ် ” ဟု ၀ တပ်ဖွဲ့မှ အမည်မဖော်လိုသူ အရာရှိတဦးက ပြောသည် ။


အင်အားအကြီးဆုံး တိုင်းရင်းသား လက်နက်ကိုင်အဖွဲ့ဖြစ်သည့် ၀ ပြည်သွေးစည်းညီညွတ်ရေးပါတီမှာ နယ်မြေ အကျယ်ပြန့်ဆုံး ထိန်းချုပ်နယ်မြေရှိနေသည့် အဖွဲ့အစည်းဖြစ်ပြီး ၁၉၈၉  ဗမာပြည်ကွန်မြူနစ်ပါတီမှ ခွဲထွက် လာပြီး ကတည်းက မြန်မာအစိုးရနှင့် ငြိမ်းချမ်းရေး ရယူထားခဲ့ပါသည် ။


၂၀၁၃  မှ စတင်ခဲ့သည့် နိုင်ငံလုံးဆိုင်ရာ အပစ်ခတ်ရပ်စဲရေး ဆွေးနွေးပွဲများတွင် ၀ တပ်ဖွဲ့အနေဖြင့် ဆွေးနွေး သူအနေနှင့် တက်ရောက်ခဲ့ခြင်းမရှိပဲ တစ်ခါတစ်ရံလေ့လာသူအဖြစ်သာ တက်ရောက်နေခဲ့ပါသည် ။


“ တပ်မတော် ကာကွယ်ရေးဦးစီးချုပ်က ကျနော်တို့ ငြိမ်းချမ်းရေးယူပြီးကတည်းက ပြန်ကြည့်မယ်ဆိုရင် ၃ ယောက် ပြောင်းသွားပြီ ကျနော်တို့နဲ့က တစ်ခါမှ မြန်မာစစ်တပ်နဲ့ တိုက်ဖူးတာ မရှိခဲ့ဘူး ။ အဲဒီတော့ ငြိမ်းချမ်း ရေးယူပြီးသားအဖွဲ့က အပစ်ခတ်ရပ်စဲရေး ပြန်လုပ်စရာလိုလို့လား စဉ်းစားကြည့်လေ ။ မူလကတည်းကလည်း နိုင်ငံရေးဆွေးနွေးပွဲ ရောက်ရင်လာတက်ပါ့မယ် ပြောပြီးသားပဲ ” ဟု အဆိုပါ ၀ တပ်ဖွဲ့တာဝန်ရှိသူက ပြောပါသည် ။


နိုင်ငံလုံးဆိုင်ရာ အပစ်ခတ်ရပ်စဲရေး စာချုပ်တွင် ၀ တပ်ဖွဲ့အနေဖြင့် ပါဝင်လက်မှတ်ရေးထိုးမှသာ  အပစ်ရပ်ပြီးနောက်ပိုင်းကျင်းပမည့် နိုင်ငံရေးဆွေးနွေးပွဲတွင် ၀ တပ်ဖွဲ့ အနေဖြင့် တက်ရောက်ခွင့်ရမည်ဖြစ်ပြီး ၀ အဖွဲ့မှ တောင်းဆိုထားသည့် ၀ ပြည်နယ်အရေးလို ကိစ္စမှာ ယင်းဆွေးနွေးပွဲတွင် ဆွေးနွေးနိုင်မည် ဖြစ်ကြောင်း စက်တင်ဘာလ ၁၂ ရက်နေ့က ကျိုင်းတုံတွင် ပြုလုပ်သည့် မြန်မာအစိုးရနှင့် ၀ တပ်ဖွဲ့တာဝန်ရှိသူများ ဆွေးနွေး မှုတွင် မြန်မာအစိုးရဘက်မှ ပြောဆိုထားသည် ။


စက်တင်ဘာလ ၄ ရက်နေ့က ထုတ်ပြန်ထားသည့် ၀ တပ်ဖွဲ့၏ ထုတ်ပြန်ချက်တွင် ၀ အနေဖြင့် ပါဝင်လက်မှတ် ရေးထိုးမည် မဟုတ်ကြောင်း ထုတ်ပြန်ထားပြီး  ကိုးကန့် ၊ တအာင်းပလောင်နှင့် ရခိုင့်တပ်မတော်ကဲ့သို့သော အဖွဲ့များကို အဘယ်ကြောင့် အပစ်ခတ်ရပ်စဲရေး လက်မှတ်ရေးထိုးရာတွင် ပါဝင်ခွင့်မရှိသနည်းဆိုသည်ကိုလည်း မေးခွန်းထုတ်ထားပါသည် ။


ပေါ်လစ်ဗျူရိုအစည်းအဝေးမှာ စက်တင်ဘာလ ၂၂ ရက်နေ့တွင် ပြီးစီးမည် ဖြစ်ပြီး အဆိုပါနေ့တွင် ၀ ဥက္ကဌ ဦးပေါက်ယူချန်းထံမှ လမ်းညွှန်မှုများကို ရယူသွားမည်ဖြစ်ကာ ကြေငြာချက်တရပ်ကိုလည်း ထုတ်ပြန်သွားရန် ရှိနေကြောင်း ၀ တပ်ဖွဲ့ တာဝန်ရှိသူထံမှ သိရသည် ။