သို့- သျှမ်းပြည်နယ်က အစိုးရ


သျှမ်းပြည်နယ်အစိုးရမင်းကြီး၊ ၀န်ကြီး ၊ ၀န်လေး အပေါင်း တို့ကိုမေးချင်ပါတယ်။ ရိုးရာဓလေ့ပွဲဆိုတာ ပိုက်ဆံပေးကြည့် ရတဲ့အဆင့် ရောက်နေပြီလား ။

သျှမ်းပြည်နယ်တောင်ပိုင်း (တောင်ကြီး) မြို့ရဲ့ တန်ဆောင်တိုင်မီးပုံးပျံပွဲ တော်ကြီးဟာ ဒေသခံ တိုင်းရင်းသား အသီးသီး တို့ရဲ့ထူးခြားဆန်းပြားတဲ့ ချစ်စရာရိုးရာ ဓလေ့တစ်ခုအဖြစ် မြန်မာမှာသာမက ကမ္ဘာအထိ ကျော်ကြားခဲ့တဲ့မီးပုံးပျံလွှတ်ပွဲ တော်ကြီးကို နှစ်စဉ် နိုဝင်ဘာလ တိုင်းကျင်းပလာခဲ့တာယနေ့အထိပါပဲ  ။


ဒီပွဲတော်ကို စိတ်ဝင်စားလို့ ပြည်တွင်းပြည်ပ ဧည့်သည်တော်တွေ လာရောက်ကြည့်ရှုနှုန်းက နှစ်စဉ်သိန်းနဲ့ချီရှိပါတယ် ။


ဒီအစိုးရ အသစ်လက်ထက်မှ မကြားဖူးတာတွေ ကြားရ ကြုံရတာက ဒီလိုရိုးရာဓလေ့ ပွဲတော်ကြီးကို နှစ်စဉ် နှစ်တိုင်း အများပြည်သူတွေ လွတ်လပ်အေးဆေးစွာ အခမဲ့ အများပိုင်သဘောနဲ့ဖျာခင်းပြီး ကြည့်နေတဲ့နေရာ တွေကို ဒီနှစ်မှာတော့ လုပ်ငန်းရှင်တွေကို ပွဲကြည့် အခန်းတွေဆောက်ခွင့်ပေးပြီး တစ်ခန်း ကို တစ်ည သုံးသောင်း ကျပ်နဲ့ပွဲတော်ရက်မှာ ငှားစားဖို့ဖြစ်လာတယ် ။ ဒီကိစ္စဟာဝန်ကြီး ၊ ၀န်လေးတို့ ခွင့်ပြုထားတာလား ၊ မသိတာပဲလား ။


ဒီလိုရိုးရာဓလေ့ပွဲ ကိုအခြေခံပြီး တရားလွန်စီးပွားရေးအမြတ်ထုတ်တာဟာ ရိုးရာယဉ်ကျေးမှုပွဲကို သတ်နေတာ နဲ့တူပါတယ် ။ ပြိုင်ပွဲဝင်မီးပုံးပျံ အဖွဲ့များရဲ့ ပေးဆပ်ရင်းနှီးမှုတွေကို ခေါင်းပုံဖြတ် အမြတ်ထုတ်ခြင်းကို တောင်ကြီး ဒေသခံအနေနဲ့ကန့်ကွက်ပါတယ် ။


ဒေသခံတွေ တန်ဖိုးထားတဲ့ ရိုးရာဓလေ့ပွဲတော်ကို ပိုက်ဆံပေးကြည့်ရမယ့်အဖြစ် ကို ဒေသခံတောင်ကြီးသူ ၊တောင်ကြီးသား တွေအနေနဲ့ လက်ခံလို့မရပါဘူးဆိုတာ သျှမ်းသံတော်ဆင့် ကနေတစ်ဆင့် တာဝန်ရှိသူတွေကို သိစေချင်ပါတယ် ။


နန်းပဲပုတ် (တောင်ကြီး)
နိုဝင်ဘာလ ၁ ရက် ၂၀၁၆