ကြားဖြတ်ရွေးကောက်ပွဲ နီးကပ်ချိန် ဒေါ်စု ပင်လုံသွားမည့်အပေါ် တိုင်းရင်းသားအချို့ ဝေဖန်
ကြားဖြတ်ရွေးကောက်ပွဲကျင်းပချိန်နှင့်နီးကပ်စွာ NLD ပါတီဝင်များ နှုတ်ထွက်မှုရှိပြီးနောက် ပြည်ထောင်စုနေ့ ၌ နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် သမိုင်းဝင် ပင်လုံသို့ သွားရောက်မည့်ကိစ္စ တိုင်းရင်းသားများစောင့်ကြည့်ဝေဖန်နေကြသည် ။
ဇန်နဝါရီ လကုန်ပိုင်းတွင် ရွေးကောက်ပွဲအတွက် မဲဆွယ်မှုစတင်တော့မည်ဖြစ်ရာ NLD ပါတီဝင်များ နှုတ်ထွက်မှုများရှိသည့် မိုင်းရှူးမြို့အသွားလမ်းရှိ ပြည်ထောင်စု စတင်ရာနယ်မြေ ပင်လုံမြို့သို့ ဖေဖော် ၀ါရီလ ၁၂ တွင် ဒေါ်အောင်ဆန်းစုကြည်သွားရောက်ရန် စီစဉ်နေခြင်းအပေါ် မဲဆွယ်စည်းရုံး ရေးအတွက် ဖြစ်နိုင်သည်ဟုလည်း ပြောဆိုဝေဖန်နေကြသည် ။
NLD ပါတီ ဗဟိုအတွင်းရေးမှူး ဦးဝင်းထိန်က ဆဲဗင်းဒေး သတင်းစာသို့ ဖြေဆိုရာတွင် ဒေါ်အောင်ဆန်းစုကြည်သည် ပါတီ ဥက္ကဌ အနေဖြင့် ပင်လုံသို့သွားခြင်းမဟုတ်ပဲ ပြည်ထောင်စုနေ့ အခမ်းအနား တက်ရောက်ရန်သွားခြင်းသာဖြစ်သည်ဟု ဆိုပါသည် ။
ကြားဖြတ်ရွေးကောက်ပွဲတွင် သျှမ်းပြည်နယ်မှာ လစ်လပ်မဲဆန္ဒနယ် အများဆုံး ပြည်နယ်ဖြစ်ပြီး ပင်လုံမြို့တည်ရှိသည့် လွိုင်လင်ခရိုင်အတွင်း ကျေးသီးနှင့် မိုင်းရှူးမြို့နယ်များတွင် လစ်လပ် မဲဆန္ဒနယ် ၆ နေရာရှိပါသည် ။
“ စစ်မှန်တဲ့ ပြည်ထောင်စု လိုလားရင် ဒေါ်အောင်ဆန်းစုကြည် အနေနဲ့ ပင်လုံသွားစရာ မလိုဘူး။ ကျမအဖေလက်မှတ်ထိုးခဲ့တဲ့ စာချုပ်ပါအချက်တွေကို အကောင်ထည်ဖော်ပါ့မယ်- လို့ ရန်ကုန်ကနေ ကတိပေးလည်းရပါတယ်။ ပင်လုံက ကျောက်တိုင်ပဲ ရှိတော့တာပဲ။ သူ့အဖေနဲ့ သျှမ်း၊ ကချင် ၊ ချင်း တိုင်းရင်းသားတွေ ပြည်ထောင်စု ထူထောင်ဖို့ သဘာတူခဲ့တယ်။ သူအဲလို ကတိပေးမယ်ဆိုရင် တိုင်းရင်းသား အားလုံးဝမ်းသာပါလိမ့်မယ်။ နို့မို့ဆိုရင် ရွေးကောက်ပွဲ မဲဆွယ် ကာလ ပင်လုံသွားတာ ထက် မပိုနိုင်ပါ။” - ဟု အမေရိကန် ပြည်ထောင်စု ကယ်လီဖိုးနီးယားပြည်နယ်မှ သျှမ်းအသင်း ဥက္ကဌ စိုင်းထွေးမောင်က ဒေါ်အောင်ဆန်းစုကြည် ပင်လုံ ခရီးစဉ်နှင့် ပတ်သက်ပြီးမှတ်ချက်ပြုသည် ။
လတ်တစ်လောမှာပင် သျှမ်းပြည်နယ်၌ NLD ပါတီဝင်များ ပါတီမှ နှုတ်ထွက်မှုနှင့် ခေါင်းဆောင်ပိုင်း ထုတ်ပယ်ခံရမှုများ ရှိခဲ့ပြီး မိုင်းရှူးမြို့နယ်မှ နှုတ်ထွက်ခဲ့သည့် ပါတီဝင်များမှာ ဒေသတွင်း အင်အားကြီးပါတီဖြစ်သည့် SNLD သို့ ကူးပြောင်းမှုများ ရှိနေသည် ။
ဧရာဝတီ သတင်းဌာနမှ မွန်တိုင်းရင်းသား သတင်းထောက် လဝီဝမ်ကမူ အစိုးရသစ်လက်ထက်တွင် NLD အစိုးရမှာ တိုင်းရင်းသားများနှင့် ယုံကြည်မှု မတည်ဆောက်နိုင်ခဲ့ပဲ လာမည့် ဖေဖော်ဝါရီ ၁၂ ခရီးစဉ်မှာ ဖက်ဒရယ်ပြည်ထောင်စု တည်ဆောက်ရန်ထက် ရွေးကောက်ပွဲမဲဆွယ်ရန်အတွက်သာဖြစ်သည်ဟု ဝေဖန် ပြောဆိုသည် ။
“ သူက နိုင်ငံရေးသမား ။ အခြေအနေအချိန်အခါတစ်ခုကို သူတွက်ဆပြီး သူ့အတွက် ဘာရမလဲဆိုတာ မှန်းပြီး ဒီခရီးကို သွားတာတော့ သေချာပါတယ်။ ပြီးခဲ့တဲ့ ရွေးကောက်ပွဲစည်းရုံးရေးကာလလည်း သူ နားဖို့ အချိန်တောင် မရှိဘူး။ တိုင်းရင်းသားဒေသကို သွားပြီး မဲဆွယ်စည်းရုံးနေတာ။ အခုလဲဘဲ သျှမ်းမှာ မဲနေရာလစ်လပ်မှုအများဆုံးလေ။ ပြီးတော့ သျှမ်းမှာ သူ့ပါတီတွေ စည်းလုံးညီညွတ်မူ ပျက်ပြားနေလေ။” - ဟု ပြောဆိုသည် ။
၂၀၀၈ ဖွဲ့စည်းပုံအရ - အစိုးရ တာဝန်ယူထားသူမှာ ပါတီနှင့် ပတ်သက်ခြင်း မရှိရပဲ ရွေးကောက်ပွဲ မဲဆွယ်စည်းရုံးမှုများတွင်လည်း ပါဝင်ခြင်း မရှိရ- ဟုပါရှိပါသည် ။
Tags: News, politic