တိုင်းရင်းသားများနှင့် တပ်မတော်တို့အကြား ဖြစ်နေသည့် တိုက်ပွဲတွင်ပြည်သူ့ ဆန္ဒမဲဖြင့် တက်လာသည့် အစိုးရ အဖွဲ့မှ တိုက်ပွဲဝင်တပ်မတော်သားများအား ဂုဏ်ထူးဆောင် ဆုတံဆိပ်ချီးမြှင့်ခဲ့မှုမှာနိုင်ငံရေးနှင့် အမျိုး သား ပြန်လည်သင့်မြတ်ရေးလုပ်ငန်းစဉ်အတွက်အမြော်အမြင်နည်းသည့် လုပ်ရပ်သာဖြစ်သည်ဟု ဗကသ ( ဗမာနိုင်ငံလုံးဆိုင်ရာကျောင်းသားသမဂ္ဂများ အဖွဲ့ချုပ် ) ခေါင်းဆောင်ဟောင်း တစ်ဦးဖြစ်သည့် ကိုလင်းထက်နိုင် က ဝေဖန်ပြောဆိုလိုက်သည် ။

‘ ဒီလုပ်ရပ်ဟာ အမြင်မကျယ်ပဲ အမြော်အမြင်နည်းတဲ့ လုပ်ရပ်ပဲလို့ ကျနော်ပြောချင်တယ်။ ‘ ဟု ကိုလင်းထက်နိုင်က သျှမ်းသံတော်ဆင့်သို့ ဇန်နဝါရီလ ၅ ရက်နေ့က ပြောသည် ။


၆၉ နှစ်မြောက် လွတ်လပ်ရေးနေ့တွင် လွန်ခဲ့သည့်နှစ်အတွင်း ဖြစ်ပွားခဲ့သည့် တိုက်ပွဲများ တွင် ထူးချွန်ခဲ့သည့် တပ်မတော်သားများ အရပ်သားအစိုးရ၏ သမ္မတကိုယ်တိုင်  ဂုဏ်ထူးဆောင် ဆုချီးမြှင်ခြင်း ကိစ္စအား ငြိမ်းချမ်းရေးလှုပ်ရှားနေသူများအကြား ဝေဖန်မှုများရှိခဲ့သည် ။


သမ္မတ ဦးထင်ကျော်မှ ပေးအပ်ခဲ့သည့် ဆုချီးမြှင့်မှုတွင် သီဟသူရဘွဲ့တစ်ဦး၊ သူရဘွဲ့ ၁၄ ဦးနှင့် ဂုဏ်ထူး ဆောင်တံဆိပ် (သူရဲကောင်းမှတ်တမ်းဝင်တံဆိပ်) ရ၅ ဦးကို ချီးမြှင့်ကြောင်း သတင်းထုတ်ပြန်ခဲ့ပြီး ဇန်နဝါရီ ၄ ရက်နေ့တွင်သမ္မတ ဦးထင်ကျော်ကိုယ်တိုင် သီဟသူရဘွဲ့နှင့် သူရဘွဲ့ရရှိသူများကိုနေပြည်တော်ရှိ နိုင်ငံတော် သမ္မတ အိမ်တော်တွင် ချီးမြှင့်ခဲ့သည် ။


ပြည်တွင်းငြိမ်းချမ်းရေး တည်ဆောက်ခြင်းနှင့်အမျိုးသားပြန်လည်သင့်မြတ်ရေးကိစ္စကို လုပ်ဆောင်မည် တည်ဆောက်မည်ဟုဆိုခဲ့သည့် အစိုးရ တစ်ရပ်အနေဖြင့် ယခုကဲ့သို့ တစ်ဖက်ဘက်တွင်ဆုချီးမြှင့်သည့် အပြုအမူသည် အမျိုးသားပြန်လည်သင့်မြတ်ရေးကို ဝေးကွာသွားစေနိုင်ကြောင်း ဝေဖန်မှုများရှိသည် ။


‘ကျနော်တို့က အစိုးရသစ်ဆိုတော့ မျှော်လင့်တာပေါ့။ ဒီလိုပြည်တွင်းစစ်သမိုင်းတစ်လျှောက်မှာ စစ်ပွဲကို အား ပေးအားမြောက်ဖြစ်စေမဲ့ ချီးမြှင့်မြှောက်စားမှုတွေကြောင့်ပဲ စစ်ပွဲတွေက တာရှည်ခဲ့ရတာလေ။ အစိုးရသစ် ဆိုတော့အရင် ခေတ်ကာလတွေနဲ့ မတူတဲ့ ချဉ်းကပ်မှုတွေနဲ့ ပြည်တွင်းစစ် ပြဿနာဖြေရှင်းနိုင်မလားလို့ပါ။ တစ်ဘက်ဘက်ကို ရပ်ပြီးပြောတာ မဟုတ်ပဲနဲ့။ အခုကတပ်မတော်ရဲ့ တိုက်ခိုက်နေမှုတွေကို လူထုမဲနဲ့ တက်လာတဲ့ အစိုးရက တရားဝင်အသိမှတ်ပြုပေးနေသလိုဖြစ်နေတယ်။’ ဟု ကိုလင်းထက်နိုင်က ထောက်ပြသည် ။


ဆုချီးမြှင့်ပွဲ တက်ရောက်ခဲ့သည့် အန်အယ်လ်ဒီ ဗဟို အလုပ်အမှုဆောင် သျှမ်းပြည်နယ် နောင်ချိုမြို့နယ် ပြည်သူ့လွှတ်တော်ကိုယ်စားလှယ်ဦးထွန်းထွန်းဟိန်ကမူ ဝေဖန်မှုများ ရှိမည်ဖြစ်သော်လည်း အားလုံး၏ ဆန္ဒ နှင့်အညီ ဆုပေးရန် မှာ ခက်ခဲမှုများ ရှိမည်ဖြစ်ကြောင်း ပြောဆိုသည်ဟုဘီဘီစီ မြန်မာပိုင်းတွင် ဖော်ပြ ထားသည်။


‘ဒီကိစ္စက တိုင်းရင်းသားနိုင်ငံရေးအင်အားစုတွေရဲ့ယုံကြည်မှုပိုမိုကျဆင်းစေတယ်လက်ရှိအနေအထားအရ အစိုးရရဲ့ထိန်းချုပ်မှုအောက်မှာရှိမနေတဲ့တပ်မတော်ကိုဘွဲ့ထူးတွေပေးနေတာဟာ လူထုရွေးချယ်ခဲ့တဲ့ အရပ်သားအစိုးရဟာတပ်မတော်နဲ့တသားတည်းလားဆိုတာမေးစရာမေးခွန်းဖြစ်နေတယ် ’ ဟု  SNLD ကျားခေါင်းပါတီ လူငယ် လွယ်ခမ်းပန်က ပြောသည် ။


မျိုးဆက်သစ် လူငယ်များ အစည်းရုံး Generation Wave မှ ဥက္ကဌ ကိုမိုးသွေးကမူ - သမ္မတ ဆု တံဆိပ်ပေး လိုက်တဲ့သူတွေထဲမှာမန်ရှင့်ဇုန်းမျှော်ကိုဘုရားသခင်ဆီပို့ပေးခဲ့တဲ့သူတွေပါရဲ့လားဝိုင်းသတိပေးလိုက်ကြပါဦးမေ့ကျန်နေမှာစိုးလို့.. ဟူ၍ ၄င်း၏ ဖေ့ဘုပ်စာမျက်နှာတွင်  ရေးသားထားသည်။


မန်ရှင့်ဇုန်းမျှော်မှာ ကွတ်ခိုင်ဒေသမှ နှစ်နှစ်အရွယ် ကလေးငယ်ဖြစ်ပြီးတပ်မတော်မှ ပစ်ခတ်သည့် လက်နက်ကြီးကျည်ဆံ ရွာထဲကျရောက်မှုကြောင့်လွန်ခဲ့သည့်နှစ်အတွင်းက သေဆုံးခဲ့ရသူလည်း ဖြစ်သည် ။


၂၀၁၆ ခုနှစ်တွင် တပ်မတော်ကာကွယ်ရေးဦးစီးချုပ်၏ သူရဲကောင်းလက်မှတ်ရရှိသူ၂၂၂ ဦး၊ တပ်မတော် ကာကွယ်ရေး ဦးစီးချုပ်၏ ဂုဏ်ထူးဆောင်လက်မှတ်ရရှိသူ ၄၈၉ ဦးရရှိခဲ့ကြောင်း  သိရပြီး တိုင်းရင်းသား လက်နက်ကိုင် ခေါင်းဆောင်များ၏ကိုယ်ကျိုးစီးပွားကြည့်ပြီး အမြင်ကျဉ်းမြောင်းမှုကြောင့် တိုက်ပွဲများဖြစ် နေရသည်ဟု တပ်မတော်ကာကွယ်ရေးဦးစီးချုပ် ဗိုလ်ချုပ်မှူးကြီးမင်းအောင်လှိုင်က လွတ်လပ်ရေးနေ့က ပြောဆိုထားသည် ။