ဖဖေါ်ဝါရီ ၂၂ -၂၄ ရက်နေ့ထိ သုံးရက်ကြာ ကျင်းပမည့် ပန်ဆန်းမြို့ တိုင်းရင်းသားလက်နက် ကိုင်တပ်ဖွဲ့များ၏ တတိယ အကြိမ် ထိပ်သီးအစည်းအဝေး ပထမနေ့တွင် တက်ရောက်သူ ကိုယ်စား လှယ်အသီးသီးက အစီရင်ခံစာများ တင်ကြသည်ဟု သိရသည် ။

ပန်ဆန်းတွင်ကျင်းပသည့် တိုင်းရင်းသားလက်နက် ကိုင်တပ်ဖွဲ့များ၏ တတိယ အကြိမ် ထိပ်သီးအစည်းအဝေး (ဓါတ်ပုံ- UWSA )

“ဒီနေ့တော့ ထွေထွေထူးထူး ဆွေးနွေးတာမရှိဘူး။ အဖွဲ့အလိုက် ဖြစ်ချင်တာတွေ တင်ပြတယ်။ အဲဒီလို ဘဲ အရင်လုပ်တာ။ နောက်နေ့တော့ NCA ကိစ္စတွေ၊ ၂၁ ရာစု ပင်လုံတွေ အကြောင်း ဆွေးနွေးကြမယ် ထင်တယ်” – ဟု တက်ရောက်သည့်အမည်မဖေါ်လိုသူ အရာရှိတဦးက ပြောသည်။


ဝ နှင့် မိုင်းလား ပူးပေါင်းကမကထ ပြုသည့် တတိယအကြိမ် တိုင်းရင်းသားလက်နက်ကိုင် တပ်ဖွဲ့များ အစည်းအဝေးတွင် မြောက်ပိုင်းမဟာမိတ်တပ်ဖွဲ့ဝင်များ (AA ရခိုင်၊ TNLA ပလောင်၊ MNDAA ကိုးကန့် ၊ KIA ကချင်)၊ သျှမ်းပြည်တပ်မတော် SSPP/SSA ထိပ်ပိုင်းခေါင်းဆောင်များ တက်ရောက်ကြသည်ဟု သိရသည်။


ဒုတိယအကြိမ် ထိပ်သီးအစည်းအဝေးတွင် UNFC အဖွဲ့ဝင်များအပြင် သျှမ်းပြည်ပြန်လည်ထူထောင် ရေးကောင်စီ RCSS/SSA ကိုယ်စားလှယ်တို့ တက်ရောက်သော်လည်း ယခုအကြိမ်တွင် မွန်ပြည်သစ် ပါတီ NMSP ကရင်နီတိုးတက်ရေးပါတီ KNPP တို့ စာတမ်းတင်သွင်းခြင်းမှလွှဲ၍ တက်ရောက် ခြင်းမ ရှိပေ။ သို့သော်သီးခြားအတည်ပြုချက်မရသေးသည့်သတင်းအရ KNU/KNLA ဒုတိယ စစ်ဦးချုပ် စောဘွယ်ကျော်ဟဲ၊ ယခင် DKBA (NCA လက်မထိုးရသေးသည့် DKBA) မှ ဗိုလ်မှူးကြီး စောဆန်းအောင် တို့လည်းတက်ရောက်သည်။