ရွေးကောက်ပွဲအကြို မိုင်းရှူးသွား တောလား ( အပိုင်း ၂)



(က) နောက်ပိုင်းခေတ်မိုင်းရှူးအကြောင်း တစေ့တစောင်း


သျှမ်းဘာသာ အသံထွက်ဖြင့်ဟု ဆိုလျှင် မုန်းဆု Mong Hsu ဟု ခေါ်တွင်ပါသည်။ မုန်းဆုဟု ခေါ်တွင်ရခြင်းမှာ မြို့တွင်းတွင် နမ့်ငနှင့် နမ့်ဆုချောင်းဟူ၍ ရှိသည့်အနက် နမ့်ဆုချောင်းကို အစွဲပြု၍ သျှမ်းလို မုန်းဆု ( ဗမာလို မိုင်းရှူး ) ဟု ခေါ်တွင်ရခြင်းသျှမ်းတိုင်းရင်းသားများ ထုံးစံအတိုင်း ချောင်းများ မြစ်များ တောင်များ၏ အမည်ကို ခေါ်တွင်လေ့ရှိသည်။


ဥပမာအားဖြင့်ရွှေလီမြစ်အတွင်း ရွှေတွေ့သည့်အတွက် နမ့်ခမ်း ( ခမ်းမှာ သျှမ်းဘာသာဖြင့် ရွှေ ) ဟု ခေါ်တွင် တောင်ချွန်းဖြစ်သည့် လွိုင်လျှမ်တောင်ကို အစွဲပြု၍ သျှမ်းဘာသာဖြင့် လွိုင်လျှမ်မြို့မြန်မာဘာသာဖြင့် လွိုင်လင်မြို့ စသဖြင့် ခေါ်ဆိုလေ့ရှိသည့်အတိုင်းနမ့်ဆုချောင်းမှ မုန်းဆု ဖြစ်လာခြင်းပင်။ အင်္ဂလိပ်ခေတ် ပဒေသရာဇ်သျှမ်းပြည်ခေတ်တွင်  လွတ်လပ်သည့် ပဒေသရာဇ်မြို့စားအဆင့် (မည်သည့် စော်ဘွား လက်အောက်ခံမှ မဟုတ် )  အုပ်ချုပ်သည့် မြို့အဖြစ်ရှိနေခဲ့ပြီး  လွတ်လပ်ရေးရပြီးနောက် စော်ဘွား အဆင့်ရလာခဲ့သည်။


ပါလီမန်ခေတ်နောက်ပိုင်းနှင့် ဦးနေဝင်းအာဏာသိမ်းပြီးနောက်အားကောင်းလာခဲ့သည့် သျှမ်းအမျိုးသားရေး လက်နက်ကိုင်တော်လှန်ရေးလှုပ်ရှားမှု ကာလများတစ်လျှောက် မိုင်းရှူး ၊ တန့်ယန်း ၊မိုင်းရယ် ၊ ကျေးသီး ဒေသတစ်လျှောက်မှာ သျှမ်းလက်နက်ကိုင်များ အဓိကလှုပ်ရှားရာ ဒေသများသာ။ မိုင်းရှူးမြို့ကို နိုင်ငံတဝှမ်းမှ ပြည်သူများစတင်သိလာကြသည်ကတော့ မိုင်းရှူးရတနာမြေကြောင့်ပင်။


သျှမ်းပြည်အလယ်ပိုင်းနှင့် မြောက်ပိုင်းတွင် အဓိက လှုပ်ရှားသည့် SSPP/SSA သျှမ်းပြည်တိုးတက်ရေးပါတီ အပစ်အခတ်ရပ်စဲခဲ့သည့် ၁၉၈၉ ခုနစ်နောက်ပိုင်းဒေသတွင်း အခြေနေများကြောင့်လည်း မိုင်းရှူးရတနာမြေသို့ အလုံးအရင်းဖြင့်ကျောက်လာရောက်တူးဖော်မှုများ ရှိလာခဲ့သည်။ ယခင်က အာပလာကျောက်ဟုခေါ်သည့် အရေအသွေးနိမ့်ကျောက်များမှာ လယ်ကန်သင်း သို့မဟုတ်ချောင်းစပ်တစ်လျောက်တွင်ပင် အလွယ်တကူ ကျင်ယူရရှိနိုင်ကြသည်။


အာပလာကျောက်များမှာ လစ်ပို ပုလင်း တစ်ဖုံးမှ ကျပ်တစ်ထောင်မျှသာ။ ယခုလိုအမေရိကန် ဆန်ရှင်ဖွင့်ပြီး ကျောက်မျက် ပတ္တမြားနှင့် ပတ်သက်၍ ဆန်ရှင်များပြန်လည်ကင်းလွတ်ခွင့်ပေးခဲ့ချိန်တွင် ကျောက်များမှာ တန်ဖိုးကြီးလာသော်လည်းအထွက်နှုန်းက လွန်ခဲ့သည့် ၁၈ နှစ်လောက်ကတည်းက မကောင်းတော့ တောင်ကြီးမြို့မှာပင် ကျောက်ဈေးတစ်ဈေးဖွင့်လှစ်နိုင်ခဲ့သည့်မိုင်းရှူး၏ ကျောက်ထွက်အားမှာ နဝတ ခေတ်ဦးပိုင်းတွင်တော့ကြောက်ခမန်းလိလိပင်ဖြစ်ခဲ့၏။ ဆိုခဲ့ပါ ရတနာမြေအဖြစ် သတ်မှတ်ခံရမှုကာလ လွန်ခဲ့သည့် နှစ်နှစ်ဆယ်ကာလအတွင်းကို တစေ့တစောင်းပြန်ကြည့်လျှင်အဆိုးအကောင်းဒွန်တွဲနေသလို ဒေသခံများအတွက်မူ ဒေသခံ ဆိုသည့်စကားလုံးအတိုင်းပင်ဟု မိုင်းရှူးမြို့တွင် အခြေချနေထိုင်သည် မှာနှစ်ပေါင်း ၄၀ နီးပါး ကြာမြင့်ခဲ့ပြီဖြစ်သည့် ဦးအုန်းမောင်က ပြောသည်။တကယ်လည်း ၂၀၀၀ ပြည့်နှစ်နောက်ပိုင်းမှစ၍ တောင်ပေါ်တွင် ကျောက်အထွက်နည်းလာသလို အလုပ်လည်းမဖြစ်တော့။ လုပ်ငန်းခွင်များအတွင်းမီးလောင်၍ လူပေါင်းရာနှင့် ချီသေဆုံးမှု ၊ မူးယစ်ဆေးဝါး ပြဿနာများ  သဘာဝ ပတ်ဝန်းကျင်ပျက်စီးမှု ၊ ကျောက်တူးဖော်မှုကြောင့် လယ်ယာမြေများ ပျက်စီးမှုစသဖြင့်  မြောက်မြားစွာပင်။ ၁၉၉၇ ခုနစ်လောက်အထိ မိုင်းရှူးတောင်ပေါ်တွင်လူတိုးမပေါက်သည့် အနေထားမှ ယခုအခါတွင် ကျိုးတို့ ကျဲတဲမျှသာ။


မြို့အမည်ခေါ်တွင်စေမှုအတွက် အဓိကကျသည့် နမ့်ဆုချောင်းကတော့ တောင်ပေါ်တွင်ကျောက်များ အလွန်အကျွံတူး ဖော်မှုတို့ကြောင့် လွန်ခဲ့သည့်နှစ်နှစ်ဆယ်ခန့်ကပင် ကောနေပြီဖြစ်သည်။


နမ့်ဆုနှင့်အပြိုင်နမ့်ငချောင်းမှာမိုင်းရှူးခေတ်ကောင်းစဉ်ကာလတစ်လျှောက် ရေပင် မကြည်လင်နိုင်ရှာ တောင်ပေါ်မှကျောက်အလွန်ကျွံတူးဖော်မှု သဘာဝ ပတ်ဝန်းကျင် ပျက်ယွင်းမှုကြောင့်ချောင်းရေမှာ အမြဲလိုလို နောက်ကျိနေခဲ့သည်။ ယခု အချိန်တွင်တော့ ရေမှာပြန်လည်ကြည်လင်လာနေခဲ့ပြီဖြစ်သည်။
သို့သော်ကျောက်ထွက်အားမှာလည်းမကောင်းတော့သည့်အပြင် ယခင်က လမ်းမတန်းတစ်လျောက် ရှိခဲ့ဖူးသည်ကျောက်အရောင်းအဝယ်ဈေးကွက်မှာ ပျောက်ချင်းမလှ ပျောက်သွားခဲ့ပြီဖြစ်သလိုတစ်ချိန်က ကြက်ပျံမကျ စည်ကားခဲ့ဖူးသည့် မြို့လူဦးရေမှာလည်း ရပ်ကွက်နှင့်ကျေးရွာအုပ်စုအားလုံးပေါင်း တစ်မြို့နယ်လုံးတွင်မှ ရ သောင်းခန့်သာကျန်တော့လေသည်။


မိုင်းရှူးကျောက်များကုန်သလောက်ဖြစ်သွားသော်လည်းဒေသအနေဖြင့် မည်သည့် တိုးတက်မှုကို ခံစားရ သနည်းဆိုသည့် မေးခွန်းနှင့်ပတ်သက်၍မူ ဦးအုန်းမောင်က ဒေသခံ ဆိုသည့်အတိုင်းဟူ၍ အထက်တွင် ဖြေဆိုခဲ့ပြီးဖြစ်သည်။ ၂၄ နာရီ လျှပ်စစ်မီးတောင်မှ လွန်ခဲ့သည့် ဖေဖော်ဝါရီလမှပင် ရလေသည်။ ဒေသတွင်း အဓိက တိုင်းရင်းသားလက်နက်ကိုင်အဖွဲ့ဖြစ်သည့် SSPP/SSA မှာ စစ်အစိုးရလက်ထက် တစ်လျှောက် အပစ်ခတ်ရပ်ခဲ့သော်လည်း မခိုင်မြဲသည့် မြန်မာပြည်၏ ဖြစ်နေကျငြိမ်းချမ်းရေးဖြစ်စဉ်များအတိုင်း ၂၀၁၀ ခုနစ်တွင် စစ်တပ်နှင့်ပြန်တိုက်သည့် အဆင့်သို့ ရောက်ရှိသွားခဲ့ပါသည်။


ခြုံငုံပြောရလျှင်သယံဇာတများသာ ကုန်ခန်းသွားသည် ဒေသအတွက် လောက်လောက်လားလား အထောက် ကူမပြုနိုင်ခဲ့ပဲ လူ့အဖွဲ့အစည်းအတွင်း ယဉ်ကျေးမှုဆိုင်ရာရောနှောပျက်ယွင်းမှု ၊သဘာဝပတ်ဝန်းကျင် အလွန်အမင်းပျက်စီးမှု ၊မူးယစ်ဆေးဝါးပြဿနာတို့သာ ကျန်ရစ်နေခဲ့ပြီး အခြေမခိုင်သည့် ငြိမ်းချမ်းရေး မူဝါဒများကြောင့် မြို့ပတ်ဝန်းကျင်တွင် ပစ်သံခတ်သံ တိုက်ခိုက်သံများမကြာခဏ ပြန်ကြားနေရသည့် ဒေသအဖြစ်နှင့် ဖွံ့ဖြိုးမှု များစွာနိမ့်သည့်ဒေသအဖြစ်သာ ကျန်နေခဲ့သည်ဟု ဆိုရပေမည်။


အဖိုးတန်ကျောက်မျက်ရတနာများကတော့ကုန်လုမတတ်နည်းသွားခဲ့ပြီဖြစ်ပေသည်။ မူလဒေသခံများအဖို့ ယခုအခါစိုက်ပျိုးရေး လုပ်ငန်းလုပ်ရင်လုပ် မလုပ်ရင် ထိုင်းသွားအလုပ်လုပ်ဆိုသည့်သျှမ်းပြည်ကျန် နေရာ အနှံ့တွင်မြင်တွေ့နေရသည့် သမားရိုးကျသက်မွေးဝမ်းကျောင်းမှုသာ အဓိက အားပြုနေရသည်ဟုမိုင်းရှူးမြို့ တွင်နေ ထိုင်သည်မှာ နှစ်ပေါင်း ၃၀ ကျော်ကြာမြင့်ပြီဖြစ်သည့် ဦးစိုင်းကျော်ညွှန့်ကပြောသည်။


စာရေးသူရောက်လာသည့်ယခုအစိုးရသစ်လက်ထက်တွင်ပင် ယခင် ခေတ်ကာလများနည်းတူ မူးယစ်ဆေး ၀ါးပြဿနာကတော့ရှိနေဆဲဖြစ်သည်ဟု ဦးအိုက်အဲက်က ဆိုသည်။  '


ဒေသတွင်း အခြေနေကိုကြည့်ရင် အခု အစိုးရသစ်လက်ထက်မှာတောင် အားရစရာအခြေနေမရှိဘူး။ တောင်သူတွေက ပြောင်းဈေးကျ သီးနှံဈေးကျနဲ့ဒုက္ခရောက်တဲ့အပြင် အစိုးရကလည်း အရေးပေါ် သီးနှံဝယ်ပေးတဲ့အစီအစဉ်တွေမရှိဘူး။ ပြောင်းဆိုရင် တရုတ်ဘက်ကိုပဲ ပို့ရတာ။တရုတ်ဘက်ပို့တဲ့ လမ်းတွေမှာလည်း တိုက်ပွဲတွေဖြစ်တယ်။ NLDကိုမဲထည့်ဖို့ဆိုတာ ဒေသခံတွေအတွက် တော်တော်လေးကို စဉ်းစားရမဲ့ကိစ္စဖြစ်ပါတယ်။ အရင်အစိုးရ လက်ထက်တွေကတည်းက ရှိခဲ့တဲ့ ဒုစရိုက်မှုတွေ မူးယစ်ကိစ္စတွေက အစိုးရသစ်လက်ထက်မှာလည်း ရှိနေဆဲပဲ။ NLDသာတက်လာသာ မူးယစ်ဆေး ၀ါးပြဿနာတွေလည်း မရှင်းနိုင်သေးဘူး။ ' ဟုလည်း ၄င်းကပင်ငြီးတွားပြောဆိုသည်။


(ခ) ဒုတိယနေ့ကြုံရ ဆုံရသမျှ


မနက်လင်းသည်နှင့် ဆိုင်ကယ်သံများကြောင့်နိုးထလာခဲ့သည်။ လဘက်ရည်သောက်ရင်းမည်သည့် သတင်းကို အရင်လိုက်ရမည် စဉ်းစားရင်းက ညက ကြားသိခဲ့ရသည့်ကျေးရွာအချို့တွင် ရွေးကောက်ပွဲ ကျင်းပမှု ပယ်ဖျက်ပေးရန်ဆိုသည့်NLD ပါတီဘက်မှ တောင်းဆိုမှုကို စိတ်ဝင်စားသည့်အတွက် NLDရုံးဘက်သို့ ထွက်လာခဲ့သည်။ ရုံးသို့ရောက်တော့ ခဏအကြာစောင့်ဆိုင်းအပြီးမြို့ အတွင်းတွင်တော့ စာပြန်ပွဲတော်နှင့် အလှူပွဲ ရှိသည့်နည်းတူကျားခေါင်းပါတီ အတွက် ကြားဖြတ်ရွေး ကောက်ပွဲဆိုင်ရာ သျှမ်းအဆိုတော်များ၏ ဖျော်ဖြေစည်းရုံးမှုများလည်း ရှိသဖြင့် သျှမ်းဝတ်စုံဝတ်ဆင်ထားသူအမြောက်အမြား ဥဒဟို သွားလာနေသည်ကို မြင်တွေ့နေရသည်။ NLDရုံးဘက်အရောက်တွင်တော့ ကံကောင်းထောက်မစွာပင် NLD ကိုယ်စားလှယ်လောင်းများအနက် အသက်အရွယ်အရ ၀ါအရင့်ဆုံးနှင့်ရာထူးအကြီးဆုံးဖြစ်သူ ဗဟိုအလုပ် အမှုဆောင် ကော်မတီဝင် ဦးကျော်ခင်နှင့်တွေ့ဆုံခွင့်ရခဲ့သည်။


စာရေးသူ မေးသမျှ ကမ်ပိန်း အခြေနေ ကြုံရသမျှကိုစိတ်ရှည်လက်ရှည်ဖြေကြားပေးသည်။ ဆေးရုံ ၊ လမ်း ၊ ကျောင်း ၊ လျှပ်စစ်မီးစသည့် အခြေခံ အဆောက်အဦးများ ကောင်းမွန်စေရေးနှင့် ဒေသဖွံ့ဖြိုးရေးအတွက်ဆောင်ရွက်ပေးမည်ဟု ကတိပေး၍ မဲဆွယ်သည်ဟု ဆိုသည်။


အဓိကပြိုင်ဘက်မှာ SNLDပါတီဖြစ်ပြီး မိုင်းရှူးမြို့မြောက်ပိုင်းမှ ကျေးရွာအုပ်စု များတွင်ရွေးကောက်ပွဲ မကျင်းပပဲ ပယ်ဖျက်ပေးရေးအတွက် တောင်းဆိုထားမှုနှင့်၎င်းကိုယ်တိုင်ပင် အဆိုပါ နယ်မြေများသို့ သွားရောက်ခဲ့ သော် လည်း လိုရင်းနေရသာသို့ မရောက်နိုင်ခဲ့ဟု ပြောသည်။ မော်မေ့ ၊ ကွန်ကျောင်း နောင်အက်ကျေးရွာ အုပ်စု များတွင် ရွေးကောက်ပွဲ မကျင်းပပဲ ပယ်ဖျက်ပေးရန် NLDကိုယ်စားလှယ်များက တင်ပြထား ခြင်းဖြစ်သည်။ ရွေးကောက်ပွဲ ကော်မရှင်နှင့်ပါတီများအကြား သဘောတူညီထားမှုကို ဖောက်ဖျက်ရာရောက်ပြီး လက်နက်ကိုင်များရှိနေသည့်အတွက် လွတ်လပ်ပြီးတရားမျှတသည့် ရွေးကောက်ပွဲ ဖြစ်လာရန် အခက်အခဲရှိနေသည် အချက်  ၂ ချက်နှင့် ညှိစွန်းနေသည်ဟု ၄င်းကပင်ဆိုသည်။ SNLDပါတီကိုပဲ မဲဆွယ်ရန် လက်ခံသည်ဆိုခြင်းမှာ မဖြစ်သင့်ဟုပင်ဆိုသည်။
လက်ရှိ မဲဆန္ဒရှင်စာရင်းအရ ကြည့်မည်ဆိုလျှင် ၄ သောင်း ၃ ထောင်ကျော်ရှိသည့် မိုင်းရှူးမြို့နယ်အတွင်း ဒေသခံ တိုင်းရင်းသားမဟုတ်သည့်လူမျိုးမှာ အင်မတန်မှ နည်းပါးလှသည်ဟု ကောက်ချက်ချနိုင်သည်။


လွိုင်ဆောင်ထောက်ကဲ့သို့ မိုင်းရှူးကျောက်ထွက်သည့် တောင်ပေါ်ဒေသတွင်ဗမာအများစုရှိသေ်ာလည်း မဲဆန္ဒရှင် စုစုပေါင်း မဲပေးနိုင်သည့် အရေအတွက် ၅ထောင်အထက် ရှိနိုင်သော်လည်း နောက်ပိုင်း လုပ်ကွက်မကောင်းသည့်အတွက် အခြားပယင်းနှင့်ရွှေမှော် ဒေသများသို့ ပြောင်းရွှေ့မှုများလည်းအမြောက် အမြားရှိနေသည်။
ဒေသခံ ၄၀၀၀ နီးပါး မဲပေးခွင့် ဆုံးရှုံးမည့် ကိစ္စမှာလည်း ရာခိုင်နှုန်းအရကြည့်မည်ဆိုလျှင် ပေ့ါသေးသေးတော့ မဟုတ်ပေ။ ဦးကျော်ခင်နှင့်ေ တွ့ဆုံပြီးမြို့နယ် ကြံ့ခိုင်ရေးမှ တာဝန်ရှိသူတစ်ဦးနှင့် တွေ့ရတွင်တိုင်းရင်းသား လက်နက်ကိုင် စိုးမိုးနယ်မြေအတွင်းမဲသွားဆွယ်ရာတွင်အစိုးရမှနိုင်ငံတော်အဆင့် ဆောင်ရွက်သည့် ရွေးကောက်ပွဲဖြစ်သည့်အတွက် တပ်နှင့် ရဲ လုံခြုံရေးများ ခေါ်သွားခွင့်မရသည့် ကိစ္စအပေါ်သာတသွင် သွင်ပြောနေပေလျော့ သည်။ တပ်မတော်မူဝါဒနှင့်ပင် သိပ်ကွာဟန်မတူ၊လက်နက်ကိုင်များကို ချက်ခြင်း လက်နက်ဖြုတ်ခိုင်းချင်သည့်လေသံဖြင့်ပင်။ NLD ကြံ့ခိုင်ရေး ကိုယ်စားလှယ်များ နှင့်တွေ့ဆုံပြီး နောက်တွင်တော့ ဒေသခံများအသံကို နားထောင်လိုသဖြင့်မြို့လယ်တဝိုက် လဘက်ရည်ဆိုင်ထိုင်ရင်း တစ်ဖုံ ၊ ဘုရားပွဲဈေးနားသွားရင်တစ်မူ တတ်နိုင်သမျှ ရွေးကောက်ပွဲ အပေါ် ဒေသခံ အမြင်ကို တီးခေါက်ကြည့် တော့မြို့ခံအများစုမှာ လက်ရှိအခင်းအကျင်းအပေါ် ငြီးငွေ့မှု အရိပ်အယောင်များမြင်နေရသလို ရွေးကောက်ပွဲ နယ်မြေပယ်ဖျက်ရန် တင်ပြသည့် လုပ်ရပ်အပေါ်ကြိတ်မနိုင်ခဲမရ ဖြစ်နေသည့် အရိပ်အယောင်များလည်း တွေ့နေရပါသည်။


စာရေးသူစနည်းနာမိသလောက် ပြောရလျှင် မြို့ခံအများစုနှင့် ဒေသခံအများစုမှာရွေးကောက်ပွဲ မဲထည့်ရန် အထူးစိတ်အားထက်သန်နေကြသည်။ ၀မ်ဆော့မိုင်းရှူးလမ်းမှ ရွာအချို့ဆိုလျှင် နိုင်ငံရေးအခမ်းအနား နှင့်လှုပ်ရှားမှုရှိလျှင် အိမ်ရှေ့တွင် သျှမ်းပြည်အလံ ( သို့မဟုတ် ) သျှမ်းအမျိုးသား အလံလွှင့်ထူထားလေ့ရှိသည့် ထုံးစံအတိုင်း အိမ်ရှေ့တွင်သျှမ်းအလံများ လွှင့်ထူထားသည်ကို တွေ့မြင်ရသည်။ ရပ်ကွက် ၁ မှ ဦးစိုင်းစိန်မြင့် ဆိုလျှင်'ဒေသခံပြည်သူတွေအကြားမှာတော့ တိုင်းရင်းသား ပြည်မသားဆိုပြီး စိတ်တွေမရှိကြဘူး။ ပြိုင်ဆိုင်မှု ပြင်းထန်နေတာ ပါတီတွေပဲရှိတယ်။


အဓိကပြဿနာတွေဖြစ်နေတာလည်း ပါတီကြီးတွေကြောင့်ဖြစ်ပါတယ်။ ပါတီကြီးတွေဆိုတာပြည်မက လာပြိုင်တဲ့ NLD ၊ ပြည်ခိုင်ဖြိုးတို့ပေါ့ ။ ကျန်တာကသိတဲ့အတိုင်း ပါတီငယ်တွေဖြစ်တဲ့ ကျားခေါင်း SNLD ၊ SNDP ကျားဖြူ ၊ ၀ပါတီတွေပဲ ပြိုင်မှာလေ။ မဟာမိတ်လည်းဆိုခဲ့သေးတယ် ပါတီကြီးအနေနဲ့ပါတီ ငယ်တွေကို သြဇာသုံးပြီး ဖိအားပေးတာမျိုး မဖြစ်စေချင်ဘူး။အခုလုံခြုံရေးအကြောင်းပြတယ်ဆိုပေမဲ့ SSPP/SSA ကလည်း သူ့နယ်မြေထဲမဲဆွယ်နိုင်ကြောင်း ကြေငြာချက်ထုတ်ပြီးသားပဲ။ ' ဟုပင်ပွင့်ပွင့် လင်းလင်းပြောလေသည်။


ကျားခေါင်းပါတီမဲဆွယ်မှုများတွင်လူအမြောက်အမြား စုရုံးနားထောင်လေ့ရှိသည်ဟု ပြောကြသလို NLD မှာ များမကြာမှီ ကာလကပင် မြို့နယ် ပါတီဗဟိုအလုပ်အမှုဆောင်နှုတ်ထွက်မှုအပါဝင် ပါတီဝင်များနှုတ်ထွက်မှုများရှိခဲ့ပြီးဖြစ်သည်ဟု ထောက်ပြကြသည်။ လူမှု ကွန်ယက်မီဒီယာများ တွင်ဖော်ပြထားသည့် မိုင်းရှူးမြို့နယ်အတွက် မဲဆွယ်စည်းရုံးမှုများတွင်လည်းNLDမှာ ပရိသတ်အများအပြားနှင့် စုရုံးဟောပြောနေသည်ကို မတွေ့ရ။


ဦးကျော်ခင်ကိုယ်တိုင်ပင် သျှမ်းအများစုနေထိုင်ရာ ဒေသတွင်သျှမ်းဘာသာဖြင့် စည်းရုံးဟောပြောခြင်း မပြုပဲ သျှမ်းဘာသာလက်ကမ်းစာစောင်ဖြင့်သာ ဖြန့်ဝေကာ စည်းရုံးရေးလုပ်ငန်းများဆောင်ရွက်သည်ဟုစာရေးသူကို ပြောထားသည်ကိုလည်း သတိရမိလာသည်။ ပါတီစည်းရုံးရေးလုပ်ငန်းများဆောင်ရွက်ရာတွင် သက်ဆိုင်ရာ ဒေသခံတိုင်းရင်းသားပါတီဝင်များ အမြောက်အမြားမရှိလျှင် လွယ်ကူမည်မဟုတ်ဆိုသည့်အတွေးလည်း ခေါင်းထဲဝင်လာပါတော့သည်။


တစ်ချိန်တည်းတွင်ပင် အင်တာနက် ဆိုင်ဘက်ရောက်လို့ လူမှု့ကွန်ယက်မီဒီယာကိုဖွင့်ကြည့်လိုက်တော့ ဟောင်ကောင်တက္ကသိုလ်မှ ဆုမွန်သဇင်အောင်၏တိုင်းရင်းသားအရေးနှင့် ပတ်သက်သည့် ဆောင်းပါးကို တွေ့မိလိုက်သည်။


ဆောင်းပါးအနှစ်ချုပ်က ငြိမ်းချမ်းရေးမရသည်မှာ အခြေခံ ဥပဒေမပြင်သည့်အတွက်အပစ်မရပ်သည့်အတွက်ဟု ဆိုနေကြသော်လည်း အစိုးရများအနေဖြင့်တိုင်းရင်းသားများ၏ မူလရပိုင်ခွင့်နှင့် ကိုယ်ပိုင်ပြဌာန်းခွင့်ကို အသိ အမှတ်ပြုမှုကသာ အရေးကြီးဆုံးအချက်ဖြစ်သည်ဟု ဆိုထားသည်။


လတ်တစ်လောမိုင်းရှူးတွင် NLD နှင့် SNLD ပါတီ အကြား ပြိုင်ဆိုင်မှုပြင်းထန်နေမှု ၊ မွန်ပြည်နယ်မှ ဗိုလ်ချုပ်အောင်ဆန်း တံတားအရေး ကိစ္စတို့တွင်NLDသဘောထားတို့မှာ တိုင်းရင်းသားအရေးနှင့် ပတ်သက်၍လည်း အမှန်တကယ်ပင် မေးခွန်းထုတ်စရာရှိနေသည်က အသေအချာပင်။


ရွေးကောက်ပွဲနိုင်လိုဇောနှင့် နယ်မြေပယ်ဖျက်ပေး ရန်တောင်းဆိုမှုက ဒီမိုကရေစီအရကြည့်လျင် မသင့်လျော်သည့်ကိစ္စဖြစ်သလို ဗမာများတဲ့ တောင်ပေါ်ကျတော့ မဲပေးရ၊ တိုင်းရင်းသား မူလ ဌာနေမျိုးနွယ်စုတွေ နေတဲ့ ဒေသအချို့က လုံးဝမဲပေးခွင့်မရှိတေ့ာဘူးလားဆိုသည့် သဘော ဆောင်နိုင်သည်ကို သတိပြုသင့်သည်။
မွန်တံတားကိစ္စတွင်လည်း ကန့်ကွက်မှုများအကြား ဇွတ်တိုးခဲ့ခြင်းမှာတံတားနာမည် ကိုယ်ပိုင်ပြဌာန်းခွင့်အ တွက်ပင် မေးခွန်းထုတ်စရာဖြစ်နေပေသည်။ အမျိုးသားပြန်လည်သင့်မြတ်ရေးဟာ အတင်းအကြပ်ဇွတ် အတင်းအနိုင်ယူမှုနဲ့အခြေခံလို့ရမရဆိုတဲ့ ကိစ္စ တိုင်းရင်းသားဝတ်စုံဝတ် တိုင်းရင်းသားဘာသာဖြင့်ရေး ထားသည့် လက်ကမ်းစာစောင်နဲ့ မဲဆွယ်သော်လည်းလူပေါင်းရာချီအောင်မစည်းရုံးနိုင်မှုတွေက စဉ်းစားသင့် တဲ့ကိစ္စများဖြစ်သည်။ ဖက်ဒရာယ်ပြည်ထောင်စုကို တည်ဆောက်မည်ဆိုလျှင် ဒေသခံအမျိုးသားပါတီများ တိုင်းရင်းသားပါတီများ၏ အခန်းကဏ်ဏ္ဍကိုပါစဉ်းစားသင့်ပါသည်။


ဥပမာအားဖြင့် အိန္ဒိယနိုင်ငံတွင်ပြည်လုံး ကျွတ်ရွေးကောက်ပွဲနှင့် ပြည်နယ်ရွေးကောက်ပွဲများ ဟူ၍ရှိပြီးပြည်နယ် ရွေးကောက်ပွဲကျင်းပရာ ဒေသတွင် သက်ဆိုင်ရာ မျိုးနွယ်စုတိုင်းရင်းသားပါတီများအားကောင်းနေလျှင် ပြည်မရှိ အာဏာရပါတီ အပါအဝင် ၊ ပါတီကြီးများ အနေဖြင့် ဒေသအခြေစိုက် ပါတီများနှင့် မဟာမိတ်ဖွဲ့၍ဝင်ရောက် ယှာဉ်ပြိုင်ခြင်းမပြုပဲ ဗဟိုအဆင့်တွင် သူတို့အား ပြန်၍ထောက်ခံရန် သဘောတူညီချက်များဖြင့် မဟာမိတ်ဖွဲ့လေ့ရှိသည်။


ဗမာပါတီဟုအများက ရှုမြင်ခဲ့သည့် ဦးနု၏ ဖဆပလ အစိုးရ လက်ထက်တွင်ပင်သျှမ်းပြည်ကဲ့သို့ နေရာများရှိ ရွေးကောက်ပွဲအား ဖဆပလမှဝင်ရောက်မပြိုင်ခဲ့ဖူးပေ။ လွတ်လပ်ရေးနှင့်အတူပေါက်ဖွားလာသည့် တိုင်းရင်း သား ပဋိပက္ခမှာ စစ်အာဏာရှင် စနစ်ကြောင့် ပိုမိုရှူပ်ထွေးမှုများဖြစ်စေခဲ့ပြီး မူလဌာနေ တိုင်းရင်းသား များမှာနေရပ်စွန့်ခွာမှု သေကြေပျက်စီးမှု မြောက်မြားစွာဖြစ်ခဲ့ကာ ၄င်းတို့ ဒေသတွင်တပ်မတော်မှ နယ်မြေစိုးမိုးမှုနှင့် အတူ အခြားဒေသမှလာရောက်အခြေချနေထိုင်မှုများ မြောက်မြားစွာ ဖြစ်ပေါ်ခဲ့ပြီးဖြစ်ပါသည်။


မူလဌာနေ တိုင်းရင်းသားမျိုးနွယ်စုများအတွက် ရပိုင်ခွင့်များသတ်သတ်မှတ်မှတ်မရှိသေးမှီ ကချင်ဒေသတွင် ကချင်နည်းသွားပြီ ၊ ရှမ်းဒေသတွင်ရှမ်းနည်းသွားပြီ ဆိုသည့် ပြောဆိုချက်များနှင့် ယင်းအားနည်းချက်ကို အခွင့်ကောင်းယူ၍ နေရာမှန်သမျှအုပ်စီးလိုသည့် ရည်ရွယ်ချက်ဖြင့်ဆောင်ရွက်ကြမည်ဆိုလျှင် မြန်မာနိုင်ငံ၏ လက်နက်ကိုင် ပြဿနာမှာဖြေရှင်း၍ပင် ပြီးနိုင်တော့မည်မဟုတ်ပါ။


ဒုတိယနေ့ မနက်ပိုင်းတွင် ကျားခေါင်းပါတီ၏ မဲဆွယ်စည်းရုံးမှုနှင့် သျှမ်းအဆိုတော် အချို့ ဖျော်ဖြေနေမှုများကို တွေ့ရသည်။ ကျားဖြူပါတီမှာမူလှုပ်ရှားမှု အနည်းငယ်တွေ့ရသော်လည်း မိုင်းရှူး ရွေးကောက်ပွဲတွင် ၀င်ရောက် ယှဉ်ပြိုင်သည့် ၀ လစ်ဘရယ် ဒီမိုကရက်တစ်ပါတီမှာမူ လှုပ်ရှားမှုမရှိသလောက်ပင်။ ဟံသာမုနိဘုရားဝင်း အတွင်းတွင်မူ ၂၅ နှစ်မြောက် စာပြန်ပွဲ ၊ဈေးပွဲတော်နှင့် တရားပွဲများ ကျင်းပနေသည့်အတွက် ရပ်ဝေးရပ်နီးမှ လာရောက်သူများဖြင့် စည်ကားနေသည်။ ချစ်စရာကောင်းသည့် ဓလေ့တစ်ခုမှာအဆိုပါ ပွဲတော်အတွက်  မြို့အဝင်တွင် မုခ်ဦးများ ဆောက်ထားပြီး သျှမ်းလှပျိုဖြူများက ဧည့်ကြိုအဖြစ် ၀င်လာသမျှ ကားများ ၊ ဆိုင်ကယ်များအားမည်သည့်နေရာတွင် တည်းခိုရမည် ၊ ဆွေမျိုးရှိပါက ရပ်ကွက်မသိပါက မည်သို့သွားရမည်၊ ထမင်းကျွေးသည့် နေရာမှာ မည်သည့်နေရာတွင်ရှိသည်ကို မြို့အဝင်ကပင် လမ်းညွှန်ပေးနေခြင်းပင်။ သတင်းသမားတစ်ဦးအဖို့ မြို့တွင်အခက်အခဲဖြစ်ရသည်မှာ သတင်းပို့ရန် အင်တာနက်ကိစ္စပင်၊ မြန်မာ့ဆက် သွယ်ရေးဖုန်းမှာ ဖုန်းပင် ရသချက် မရသချက်ဖြစ်နေသလို တယ်လီနောကျပြန်တော့လည်း အင်တာနက် သုံး၍မရ၊ စကိုင်းနက်ဖြင့် သုံးသည့်အင်တာနက်ရသည့် စတိုးဆိုင်တွင်သာ စိတ်ရှည်ရှည်ဖြင့် သွားသုံးရသည်။


ယခင်ကဖုန်းလိုင်းများအဆင်မပြေစဉ်က အိုင်ပီစတား ဂြိုလ်တုဖြင့် ဖုန်းဆက်သွယ်မှုသုံးခဲ့ရသည့် ကာလလည်း ရှိခဲ့ဖူးသည်ဟု ဆိုကြသည်။ ဒုတိယနေ့တွင်ရွေးကောက်ပွဲနှင့် ပတ်သက်၍ မြို့ခံများထံမှ အကဲခတ်မိသလောက် ကကျေးရွာအုပ်စုအချို့တွင် ရွေးကောက်ပွဲ ပယ်ဖျက်မည့် ကိစ္စအပေါ်မကျေမချမ်းဖြစ်နေကြသည်မှာ အသေ ချာပင်။


' ပအိုဝ်းတွေကို ဟိုပုံးမှာအမျိုးသားအဆင့် ဆွေးနွေးပွဲ ကျင်းပခွင့်ပေးတယ်။ သျှမ်းကိုတော့မြို့တော်နဲ့ ပင်လုံမှာ လုပ်ခွင့်မပေးဘူး။ အခု သျှမ်းတွေများတဲ့ကျေးရွာတွေမှာ ရွေးကောက်ပွဲ မကျင်းပဖို့ လုပ်နေပြီး ဗမာများတဲ့ တောင်ပေါ် မှာတော့ ကျင်းပမယ်။ ဆိုတာ လူမျိုးကြီးဝါဒနဲ့ သွေးခွဲတဲ့လုပ်ရပ်ကို ကျင့်သုံးနေတာဖြစ်တယ်။ ' ဟု အမည်မဖော်လိုသူမြို့မိမြို့ဖတစ်ဦးက မကျေမချမ်းဖြင့် ပြောသည်။


အပိုင်း ( ၃) ကို ဆက်လက်ဖော်ပြပါ့မည်။




 
© 2012 All Rights Reserved | Asean Celebrity | Fonts @ AtFonts | Free Templates