သျှမ်းပြည်မြောက်ပိုင်း နမ့်ခမ်းမြို့အနီး ကချင်ပြည်နယ် မန်စီမြို့နယ်အတွင်း  ယမန်နေ့ညက အစိုးရတပ်နှင့် KIA တပ်တို့အကြား တိုက်ခိုက်ဖြစ်ပွားရာနေရာအနီး ဒေသခံတစ်ဦးအား အစိုးရတပ်ပစ်ခတ်ရာမှာတဦးသေ ဆုံးပြီး သုံးဦး ဒဏ်ရာရရှိကြောင်း ဒေသခံများ ပြောပြချက်အရ သိရပါသည်။

အောက်တိုဘာ ၂၆ ရက် ညနေ ၁၇း၃၀ နာရီခန့်က နမ့်ခမ်း နှင့် မူစယ်မြို့နယ်အတွင်းပြေးဆွဲနေသည့် ကျောက်တင် ကား ၅ စီးအား အစိုးရတပ်က ချောဆွဲသွားကြောင်း၊ အစိုးရတပ်သားအားလုံးနီးပါးအရပ်ဝတ် ဖြင့်သာဝတ်ဆင်ကြ ကြောင်း၊ နမ့်ခမ်းမြို့ဘက်မှ မန့်ဝိန်းကြီးကျေးရွာအုပ်စုသို့အသွား မန့်ဟီး နှင့်စွန်ခါး ကျေးရွာကြားအရောက် ကင်းလှည့် နေသည့် KIA တပ်ဖွဲ့နှင့် တိုးမိရာမှ တိုက်ခိုက်မှုဖြစ်ပွားခဲ့ရကြောင်း ချောဆွဲခံရသည့်ကားဆရာများနှင့် နီးစပ်သည့်  ဒေသခံ စိုင်းဖဟန် ကပြောပါသည်။

“မနေ့ညက အစိုးရတပ် နဲ့ ကချင်တပ်တို့ တိုက်ပွဲဖြစ်တယ်။ တိုက်ပွဲဖြစ်ပြီးမကြာခင် တရုတ်ပြည်ဘက်ကနေကျွဲ နွား ရောင်းပြီး ထော်လာဂျီ နဲ့ပြန်လာတဲ့ နွားကုန်သည် (၁၄) ယောက်ကို အစိုးရတပ်က ဟန့်တားစစ်ဆေးတယ်။ လေးငါး ယောက်က ကြောက်လို့ ထွက်ပြေးတော အစိုးရတပ်က လက်နက်ကြီးနဲ့ လှမ်းထုတယ်။ တယောက်တော့ ဦးခေါင်း ထိမှန်ပြီး သေဆုံးသွားတယ်၊ ၃ ယောက်ဒဏ်ရာရတယ်”ဟု နမ့်ခမ်းဒေသခံစိုင်းအိုက်ထွန်း ကပြောပြသည်။

အဆိုပါနွားကုန်သည်အဖွဲ့သည် ကချင်ပြည်နယ် မန်စီမြို့နယ် မန့်ဝိန်းကြီးကျေးရွာအုပ်စုမှရွာသားများဖြစ်ကြ၏။

သေဆုံးသူမှာ စိုင်းမြင့်ဦး အ သက်(၃၀)နှစ် ၊ ဒဏ်ရာရရှိသောသူ(၃)ဦးမှာ စိုင်းယီခမ်း၊ စိုင်းမောင်မြင့်၊ စိုင်းဆမ် တို့ဖြစ်ပါသည်။ သေဆုံးသူ ရုပ်အလောင်းအား နမ့်ခမ်းပြည့်သူဆေးရုံသို့ပို့ဆောင်ပြီး ဒဏ်ရာရရှိသူသုံးဦးအား မန့်ဝိန်း ကြီးရွာ ဆေးခန်းသို့ ပို့ဆောင်ထားကြောင်း စိုင်းအိုက်ထွန်းက ဆက်၍ပြောပါသည်။

ယမန်နေ့ည တညလုံး အဆိုပါဒေသဘက်မှ သေနတ်သံများကို  နမ့်ခမ်းမြို့နယ်ဘက်မှ ကြားနေရကြောင်း၊ တိုက်ပွဲဖြစ်သည့် ကချင် နှင့် အစိုးရဘက် တပ်ရင်းအမည်များလည်း မသိရသေးကြောင်း ဒေသခံများပြောပါသည်။

အစိုးရ နှင့် KIO တို့သည် ရွှေလီမြို့၌ မကြာမီတွေ့ဆုံနိုင်ရန် ပြင်ဆင်နေသော်လည်း တပ်အင်ဖြည့်တင်းမှုများကြောင့် နှစ်ဘက်တိုက်ပွဲဆက်တိုက်ဖြစ်ပွားလျက်ရှိနေပါသည်။