သျှမ်းပြည်တောင်ပိုင်း လွယ်လင်ခရိုင် မိုင်းရှူးမြို့နယ် အတွင်း ရှိ ဒုက္ခသည် စခန်းတခု အတွင်းသို့ လက်နက်ကြီးများ ကျရောက်သည့် အတွက်ကြောင့် စစ်ဘေးရှောင်များ တခြားနေရပ်သို့ ထပ်မံ တိမ်းရှောင်နေရသည်ဟု သိရသည် ။

လဲချားသို့ရောက်ရှိလာသည့် စစ်ဘေးရှောင်များ

နိုဝင်ဘာ ၁၀ ရက် နံနက် ၁၁ နာရီမှ ညနေ ၄ နာရီ အထိ မိုင်းရှူးမြို့နယ်  စစ်ဘေး ရှောင်များရှိရာ ဝမ့်ဆော့ကျေးရွာသို့ ၆၀ မမ အမျိုးအစား လက်နက်များဖြင့် အလုံး ၇၀ ကျော် ပစ်ခတ်သောကြောင့် အဆိုပါကျေးရွာရှိ စစ်ဘေးရှောင် ၁၅၀၀ ကျော် နှင့် ဝမ့်ဆော့ဒေသခံများ ကျေးသီးမြို့နယ်ဘက်သို့ လည်းကောင်း ၊ မိုင်းရှူးမြို့အဝင် ဆိုင်လျဲန်းမိန်း ဘုန်းကြီးကျောင်းသို့ လည်းကောင်း အသီးသီး ထပ်မံတိမ်းရှောင်ရသည်ဟု မိုင်းရှူးမြို့ ရောက် ဒုက္ခသည်များအား ကူညီပေးနေသည့် ဘုရားဒါယကာ စိုင်းရိန် ကပြောသည် ။


“ စစ်ဘေးရှောင်တွေက ဝမ့်ဆော့ ကနေ ဝမ့်ဟိုင်း ၊ ဝမ့်ဟိုင်းကနေ ကျေးသီးဘက်ကို ထပ် တိမ်းရှောင်ရ တယ် ။ ဒေသခံတွေပါ ပြေးရတယ်အခု ။ မိုင်းရှူးဘက်ကိုလာတယ် ။ ဆိုင်လျဲန်းမိန်းကျောင်း တိုက်မှာ ရာဂဏန်းရှိတယ် ” - ဟု စိုင်းရိန် ကပြောသည် ။


ရွေးကောက်ပွဲကာလ တွင် သျှမ်းပြည်တပ်မတော်အား အစိုးရ တပ်မတော်မှ တိုက်ခိုက်မှု ရပ်နားထား သည့်အတွက် ဟိုင်းပါ ရှိ စစ်ဘေးရှောင်ဒုက္ခသည်များ နေရပ်ပြန်သည့်သူ အချို့ ရှိခဲ့ကြောင်း ရွေး ကောက်ပွဲ အပြီး တိုက်ပွဲ ပြန်လည် စတင်သည့်အတွက် ဟိုင်းပါသို့ ဒုက္ခသည်များ ပြန်လည်ရောက် ရှိလာကြောင်း ဒုက္ခသည်အရေးကူညီပေးနေသည့် နန်းစိန် က ပြောသည် ။


ယခုတိုက်ခိုက်မှုနှင့် ပတ်သက်၍ မြန်မာအစိုးရ တပ်မတော် ပိုင် မြ၀တီ သတင်းစာက အက်စ်အက်စ် အေ (ဝမ့်ဟိုင်း) အဖွဲ့သည် လူထုအားအကာအကွယ်ပြု၍ မိုင်းနောင်ရှိ တပ်ဌာနချုပ် အားအကြိမ်ကြိမ် တိုက်ခိုက်သည့်အတွက် ၎င်းတို့အားရှင်းလင်း တိုက် ခိုက်သွားမည်ဟု ရေးသားထားသည် ။


နိုဝင်ဘာလ ၁၁ ရက် ညနေ ၆ နာရီတွင်မူ ဝမ့်ဆော့ရွာတွင် တိုက်ပွဲစတင်ဖြစ်ပွါးကြောင်း ၊ ဝမ်ဆော့ရွာတွင် ခိုလှုံသော စစ်ဘေးရှောင်များနှင့် ဒေသခံများမှာမူ နိုဝင်ဘာလ ၉ ရက် ညပိုင်းက ထွက်ပြေးကြပြီဖြစ်ကြောင်း သိရပါသည် ။