သို့
သျှမ်းသံတော်ဆင့် အယ်ဒီတာ ခင်ဗျား

သျှမ်းပြည်မြောက်ပိုင်း မူစယ်မြို့မှာ မဲပေးပိုင်ခွင့်ရှိသူစာရင်းကို ဂျွန်လ ၂၂ ရက်နေ့မှာ ရပ်ကွက်တိုင်းမှာ လာကပ် ပါတယ်။ ဒါပေမဲ့ဗျာ… စာရင်းထဲမှာ ကွယ်လွန်သွားပြီးတဲ့သူတွေလည်း ပါလာတယ်။ နောက် နာမည်တွေလည်း မှားတယ်။ အများဆုံးဘဲ။ အမျိုးသမီးနာမည်က အမျိုးသားနာမည် ဖြစ်လိုဖြစ်။ မှတ်ပုံတင်နံပါတ်တွေလည်းမှား။ ကွယ်လွန်သွားတဲ့သူစာရင်းတွေ ပါလာရင်တော့ ဒါဟာစာရင်းဟောင်းဘဲလို့ ထင်ပါတယ်။

ဒီမဲစာရင်းအတွက်ဆိုပြီး ရပ်ကွက်အုပ်ချုပ်ရေးမှူးတွေ၊ လူငယ်တွေကို လူဦးရေစာရင်းကောက်ပေးဖို့ တာဝန်ရှိ သူတွေက အကူအညီတောင်းလို့ ကူကောက်ပေးခဲ့ကြပါတယ်။ ကျနော့်အိမ်ကိုလည်း လာကောက်သွားလို့ သိတာပါ။ ဘာကြောင့် ရပ်ကွက်အုပ်ချုပ်ရေးမှူး၊ ရပ်ကွက်သားတွေ ကောက်ပေးတဲ့စာရင်းကို မသုံးတာလဲ။ မသုံးချင်ရင် ဘာကြောင့်ကူကောက်ခိုင်းတာလဲ။ ကောက်ပေးတဲ့သူတွေ အချိန်ကုန် လူပန်းတာဘဲ အဖတ်တင်တယ်။

ဒီမဲပေးပိုင်ခွင့်ရှိသူစာရင်းက အရမ်းကို အရေးကြီးတယ်လို့ မြင်ပါတယ်။ ပြည်သူတွေက ရွေးကောက်ပွဲဆိုင်ရာ ဗဟုသုတတွေ အားနည်းနေသေးပါတယ်။ လူတယောက်မှာ မဲပေးပိုင်ခွင့်ရှိရဲ့သားနဲ့ အချက်အလက်တခုခု မှားနေတာကို မိမိကိုယ်တိုင်ကလည်းမသိ သူများတွေကလည်းမပြောရင်တော့ မဲပေးပိုင်ခွင့်ရှုံးသွားမှာ သေချာ ပါတယ်။ ဒါကြောင့် ရွေးကောက်ပွဲဆိုင်ရာတာဝန်ရှိသူတွေ မဲပေးပိုင်ခွင့်ရှိသူစာရင်း ထုတ်ပြန်ထားတာတွေကို သေသေချာချာ ပြန်စစ်ပေးစေချင်ပါတယ်။ မှားနေတဲ့ဟာတွေကိုလည်း အမြန်ဆုံး ပြန်ပြင်ပေးစေချင်ပါတယ်။




မူစယ်မြို့ခံတစ်ဦး
၂၃၊ ၆၊ ၂၀၁၅