သျှမ်းပြည်တပ်မတော် SSPP/SSA နှင့် အစိုးရ စစ်တပ်တို့အကြား မိုင်းနောင်မြို့နယ် အတွင်း အောက် တို ဘာလ ၉ ရက်နေ့က  လေးရက်မြောက်နေ့အဖြစ် တိုက်ပွဲများ ဖြစ်ပွားခဲ့ကြောင်း သျှမ်းပြည် တပ်မ တော် မြောက်ပိုင်း တာဝန်ရှိသူက  အတည်ပြု ပြောဆိုသည် ။

"မနက် ၆ နာရီကျော်လောက်ကတည်းက ဖြစ်နေတာ ၊ နေ့လည်းပိုင်းမှာလည်း ဆက်ဖြစ်နေတယ် ။ အခုထိတော့ ကျနော်တို့ဘက်က စခန်းကျဆုံးတာ မရှိသေးဘူး ။ မကျအောင်လည်း အတတ်နိုင်ဆုံး တောင့်ခံ တွန်းလှန်နေတယ် ။"- ဟု သျှမ်းပြည်တပ်မတော် မြောက်ပိုင်းမှ ပြောခွင့်ရ ဗိုလ်မှူးကြီး စိုင်းလက  ပြောသည် ။


မိုင်းနောင်မြို့နယ်အတွင်း အောက်တိုဘာလ ၆ ရက်နေ့ကစတင် ဖြစ်ပွားခဲ့သည့် တိုက်ပွဲများကြောင့် ဒေသခံရာပေါင်းများစွာမှာ မိုင်းရှူး ဟိုင်းပါ စသည့် ဒေသများသို့ ထွက်ပြေးပုန်းရှောင်နေရပြီး တိုက်ပွဲများကြောင့် ထိခိုက်ကျဆုံးမှုများ ရှိနိုင်ကြောင်း ဒေသခံများက ပြောသည် ။


" ဖုန်းလိုင်းတွေလည်း ဖြတ်ထားတာ အခုည အောက်တိုဘာလ ၉ ရက်ညမှ ပြန်ရတယ် ။ လက်နက်ကြီးတွေကတော့ တဒုန်းဒုန်း တနေကုန် ပစ်နေသံတွေ ကြားရတယ် ။ ကျနော်တို့ ပါတီ အောက်ခြေ တာဝန်ရှိသူတွေက စစ်ဘေးရှောင် အရေးအတွက် ကူညီနေတယ် ။" - ဟု လာမည့် ရွေးကောက်ပွဲတွင် မိုင်းရှူးမြို့နယ် ပြည်သူ့လွှတ်တော် မဲဆန္ဒနယ်မှ ကျားခေါင်း SNLD ပါတီ ကိုယ်စားပြုပြီး ၀င်ရောက်ယှဉ်ပြိုင်မည့် စိုင်းထွန်းအေးက ပြောသည် ။


သျှမ်းပြည်တိုးတက်ရေးပါတီ ဌာနချုပ် ၀မ့်ဟိုင်းအတွက် စစ်ရေးအရ အရေးပါသော တာ့ဆမ်ပူး - တာ့ခမ့် ကူးတို့ဆိပ်တဝိုက်မှ SSA တပ်များအား ဖယ်ပေးရန် အရှေ့အလယ်ပိုင်းတိုင်း စစ်ဌာနချုပ်မှ တာဝန်ရှိသူများက SSA မြောက် ပိုင်း တာဝန်ရှိသူများအား ဖုန်းဆက် အကြောင်းကြားထားပြီး မဖယ်ပေးပါက ဌာနချုပ်ဝမ့်ဟိုင်းအား တိုက်ခိုက်မည်ဟု ပြောဆိုထားကြောင်းလည်း SSA တာဝန်ရှိသူက ဆိုသည် ။


" ဘယ်လိုလုပ် ဖယ်ပေးလို့ရမလဲဗျာ ။ အခုက တဖွဲ့ချင်း အပစ်ရပ်ပြီးသားအဖွဲ့ကို နိုင်ငံလုံးဆိုင်ရာ အပစ်ရပ်လက်မှတ်ထိုးဖို့ အသင့်မဖြစ်သေးဘူး ပြောလို့ ပြသနာရှာနေတာ ။ ကျနော်တို့က  လုံးဝ မထိုးဘူး ပြောနေတာ မဟုတ်ဘူးလေ ။ "- ဟု ဗိုလ်မှူး ကြီးစိုင်းလက ပြောသည် ။


အစိုးရနှင့် တိုင်းရင်းသား လက်နက်ကိုင်အဖွဲ့များအကြား လာမည့် အောက်တိုဘာလ ၁၅ ရက်နေ့ တွင်  နိုင်ငံလုံးဆိုင်ရာ အပစ်ခတ်ရပ်စဲရေး ပြုလုပ်ရန်စီစဉ်ထားပြီး KNU နှင့် သျှမ်းပြည်တပ်မတော် တောင်ပိုင်းအပါအဝင် အဖွဲ့ ၈ ဖွဲ့ကသာ လက်မှတ်ရေးထိုးကြမည်ဖြစ်သည် ။


သျှမ်းပြည်တပ်မတော် မြောက်ပိုင်းနှင့် အစိုးရတို့အကြား ၂၀၁၂ ခုနစ်ကတည်းက ပြည်ထောင်စု အဆင့် အပစ်ခတ်ရပ်စဲရေး ပြုလုပ်ခဲ့သော်လည်း အပစ်ရပ်ပြီးနောက်ပိုင်း တိုက်ပွဲပေါင်း ရာနှင့် ချီဖြစ်ပွားခဲ့ကာ ၂၀၁၄ ခုနစ်အတွင်း တာ့ဖာဆောင် ဒေသတိုက်ပွဲများမှာ အပြင်းထန်ဆုံးဖြစ်သည် ။