တန်းတူရေးနှင့် ကိုယ်ပိုင်ပြဌာန်းခွင့်ကို ဦးတည်မည်ဆိုပါက ၂၁ ရာစု ပင်လုံ ညီလာခံမှာ အောင်မြင် လိမ့်မည်ဟု တိုင်းရင်းသားလက်နက်ကိုင်တပ်ပေါင်းစု UNFC ၏ နိုင်ငံရေးညှိနှိုင်း ဆွေးနွေးမှုဆိုင်ရာ ကိုယ်စားလှယ်အဖွဲ့ခေါင်း ဗိုလ်ချုပ်စိုင်းထူးက ပြောသည် ။

‘၂၁ ပင်လုံကို အောင်မြင်မယ်လို့ မျှော်လင့်တယ်။ တိုင်းရင်းသားတွေလိုလားနေတဲ့ တန်းတူရေး ကိုယ်ပိုင်ပြဌာန်းခွင့်ကို အခြေခံရင် အောင်မြင်မှာပေါ့။ ‘ဟု ရန်ကုန်ရောက် ဗိုလ်ချုပ်စိုင်းထူးက ပြောသည် ။


ကေအိုင်အေ အုပ်ချုပ်နယ်မြေဖြစ်သည့် မိုင်ဂျာယန်တွင် ကျင်းပခဲ့သော တိုင်းရင်းသားအင်အားစုများ မျက်နှာစုံညီအစည်းဝေး အခြေအနေနှင့် ပတ်သက်၍ အစိုးရ၏ ငြိမ်းချမ်းရေးကော်မရှင်မှ တာဝန်ရှိသူများနှင့် တိုင်းရင်းသားလက်နက်ကိုင် တပ်ပေါင်းစု UNFC ၏ DPN အဖွဲ့မှ ကိုယ်စားလှယ်များသည် သြဂတ်စ်လ ၅ ရက်နေ့က ရန်ကုန်မြို့တွင် ဆွေးနွေးခဲ့ကြသည် ။


မိုင်ဂျာယန်ဆွေးနွေးပွဲမှ ထွက်ပေါ်လာသည့် ဘုံသဘောတူညီချက်များ ၊ တိုင်းရင်းသားများ လိုလားချက် ၊ အစိုးရ၏ ၂၁ ပင်လုံတွင် ပူးပေါင်းပါဝင်နိုင်မှု အလားအလာများနှင့် ပတ်သက်၍ ဆွေးနွေးခဲ့ပြီး အသေးစိပ်ကိုမူ သတင်းထုတ်ပြန်ခြင်းမရှိခဲ့ပေ ။


ယခုတွေ့ဆုံမှုအပေါ်တွင် အကောင်းဘက်မှ ရှုမြင်ကြောင်းလည်း ဗိုလ်ချုပ်စိုင်းထူးက ပြောသည် ။


နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်မှ ဦးဆောင်၍ ကျင်းပရန် ရည်ရွယ်ထားသော ၂၁ ပင်လုံအား သြဂတ်စ်လ နောက်ဆုံးအပတ်တွင် ကျင်းပရန် အစိုးရဘက်မှ ပြင်ဆင်နေပြီး နိုင်ငံရေးဆွေးနွေးမှု မူဘောင်ပြင်ဆင်ရေး ၊ အားလုံးပါဝင်နိုင်ခွင့် ၊ လုံခြုံရေး ၊နိုင်ငံရေးကဏ်ဏ္ဍအပြင် အခြားခေါင်းစဉ်များ ထပ်တိုးဆွေးနွေးခွင့် အစရှိသည့် ကိစ္စများမှာ အစိုးရနှင့်တိုင်းရင်းသားများအကြား ၂၁ ပင်လုံ မစတင်ခင် ဆွေးနွေးရမည့် ကိစ္စများအဖြစ် ကျန်ရှိနေသည်ဟု အကဲခတ်များက ဆိုသည် ။