အနာဂတ် ဖက်ဒရယ်ဒီမိုကရေစီ ပြည်ထောင်စု တည်ဆောက်ရာတွင် အခြေခံသင့်သော ကဏ္ဍအလိုက် မူဝါဒ အကြံပြုချက်များ (မူကြမ်း) ကို သျှမ်းပြည်တောင်ပိုင်း တောင်ကြီးမြို့၌ တိုင်းရင်းသားလူမျိုးများ ရေးရာစင်တာ (ENAC ) မှ အလုပ်ရုံဆွေးနွေးပွဲ ကျင်းပခဲ့သည် ။

ပြည်ထောင်စု ငြိမ်းချမ်းရေးညီလာခံ ၂၁ ရာစု ပင်လုံတွင် အထောက်အကူဖြစ်ရန်အတွက် ကဏ္ဍ အလိုက် အခြေခံသင့်သော မူကြမ်း ၉ မျိုး ပြုစုထားကြောင်း Ethnic Nationalities Affairs Center (Union of Burma) ENAC ဘုတ်အဖွဲ့ဝင် လည်းဖြစ် သျှမ်းတိုင်းရင်းသားများဒီမိုကရေစီအဖွဲ့ချုပ် (SNLD) ပါတီ၏ အထွေထွေအတွင်းရေးမှူး ဦးစိုင်းညွန့်လွင် ကပြောသည် ။


“နိုင်ငံတော်တည်ဆောက်ရေးမှာ လိုအပ်တဲ့ ပေါ်လစီတွေကို ကျနော်တို့က ဒီပညာရှင်တွေရော နောက်အဖွဲ့ အစည်း အသီးသီးက ပုဂ္ဂိုလ်တွေ အလုပ်ရုံဆွေးနွေးပွဲတွေလုပ်ပြီးတော့ မူကြမ်းရေးထားတာပါ၊ ခု အားလုံး ၉ မျိုးရှိပါတယ်၊ ဒါက တကယ့်နိုင်ငံရေးဆွေးနွေးပွဲကျရင် အသုံးချလို့ရအောင် အစရှာထုတ်ပေးထား တာပေါ့ အဲ့ဒီအစကနေကစပြီးတော့ နောက်ဆုံးတစ်နေ့မှာတော့ နိုင်ငံတော်ရဲ့ ပေါ်လစီဖြစ်သွားအောင် ဖောင်ဒေးရှင်း သဘောလုပ်တာပါ ဘယ်အဖွဲ့အစည်းမှ လုပ်တာသိပ်မရှိဘူး ကျနော်တို့ ENAC အနေနဲ့ပေးတာ ၉ မျိုးရှိပါတယ်” ဟု ၄င်းကပြောသည် ။


အနာဂတ် ဖက်ဒရယ်ဒီမိုကရေစီ ပြည်ထောင်စု တည်ဆောက်ရာ၌ အခြေခံသင့်သော ကဏ္ဍအလိုက် မူဝါဒ အကြံပြုချက်များ (မူကြမ်း) ၉ မျိုးတွင် ၁- ကျန်းမာရေး မူဝါဒများ (မူကြမ်း)၊၂- ပညာရေး မူဝါဒများ (မူကြမ်း)၊၃-မြေယာ မူဝါဒများ (မူကြမ်း)၊၄- သဘာဝသယံဇာတဆိုင်ရာ မူဝါဒများ (မူကြမ်း)၊ ၅- စိုက်ပျိုးရေးဆိုင်ရာ မူဝါဒများ (မူကြမ်း)၊၆- ပြည်တွင်းနေရပ်စွန့်ခွာတိမ်းရှောင်သူများနှင့် ဒုက္ခသည်များဆိုင်ရာ မူဝါဒများ(မူကြမ်း)၊ ရ- လူသားချင်းစာနာထောက်ထားမှု အကူအညီဆိုင်ရာ မူဝါဒများ (မူကြမ်း)၊ ၈ - အခွန်ကောက်ခံခြင်းဆိုင်ရာ မူဝါဒများ (မူကြမ်း)၊ ၉ - ကုန်သွယ်ရေး နှင့် ရင်းနှီးမြှုပ်နှံမှုဆိုင်ရာ မူဝါဒများ (မူကြမ်း) တို့ဖြစ်သည် ။


“ဒီပေါ်လစီ ၉ ခုက အရေးကြီးတယ်၊ တကယ့် ပင်လုံညီလာခံ ငြိမ်းချမ်းရေးညီလာခံမှာဆွေးနွေးရမယ့် အချက်က ဒီပေါ်လစီ တွေဘဲဖြစ်ပါတယ်၊ ငြိမ်းချမ်းရေးညီလာခံတက်တဲ့ခါကျရင်၊အထောက်အကူပြုဖို့ ဖက်ဒရယ်ဒီမိုကရေစီဖွဲ့စည်းပုံရေးဆွဲမယ်ဆိုရင် ဒီဟာ တွေ အရေးကြီးတယ်၊ဒါကြောင့် ပြည်သူတွေ နိုင်ငံရေးအစုအဖွဲ့တွေ ချပြပြီး သူတို့ရဲ့ သဘောထားတွေကို ရယူတာပါ” ဟု  ENAC အလုပ်မှုဆောင်ဒါရိုက်တာ ဇိုသုန်းမှုန် ကပြောသည် ။


 တိုင်းရင်းသားလူမျိုးများရေးရာစင်တာ (ENAC ) မှ ရေးဆွဲထားသော မူကြမ်းကို ရန်ကုန်၊ မွန်ပြည်နယ် မော်လမြိုင်၊ကရင်ပြည်နယ် ဘားအံ၊ သျှမ်းပြည်နယ် အရှေ့ပိုင်း ကျိုင်းတုံမြို့၊ သျှမ်းပြည်မြောက်ပိုင်း လားရှိုးမြို့တို့တွင် သွားရောက် ပြုလုပ်သွားပြီဖြစ်ပြီး သျှမ်းပြည်တောင်ပိုင်း တောင်ကြီးမြို့တွင် ဖေဖော်ဝါရီ (၂၀-၂၁ ) ရက် နှစ်ရက်တာ ပြုလုပ်ပြီး အရပ်ဘက်အဖွဲ့အစည်းများ၊ အစိုးရအဖွဲ့များ၊ လွှတ်တော်အမတ်များ တက်ရောက်ကြောင်း သိရသည် ။


အခြေခံမူဝါဒ (မူကြမ်း) ၉ ခုကို ညီညွတ်သော တိုင်းရင်းသားလူမျိုးများ ဖက်ဒရယ်ကောင်စီ(UNFC) ၏ ၂၀၁၆ ခုနှစ် ဇွန်လ ၁ မှ  ၃  ရက်နေ့အထိ အလုပ်အမှုဆောင် အစည်းအဝေးတွင် အသိအမှတ် ပြုပြီး လူထုသို့ ချပြရာ တွင်ဖြစ်စေ၊နိုင်ငံရေး ဆွေးနွေးပွဲများနှင့် ဖက်ဒရယ် ဖွဲ့စည်းပုံအခြေခံဥပဒေ ရေးဆွဲပြုစုရာတွင်ဖြစ်စေ အလျဉ်းသင့်သလို အသုံးပြုသွားရန် ဆုံးဖြတ်ခဲ့ပြီးလည်း ဖြစ်ကြောင်း တိုင်းရင်းသားလူမျိုးများရေးရာစင်တာ (ပြည်ထောင်စု မြန်မာနိုင်ငံ) စာအုပ်တွင် ဖော်ပြထားသည်။