၂၀၁၆-၂၀၁၇ ပညာသင်နှစ် တက္ကသိုလ်ဝင်တန်းစာမေးပွဲ ထူးချွန်အောင်မြင်ခဲ့သော သျှမ်းတိုင်းရင်းသား ကျောင်းသား/သူများအား ဂုဏ်ပြုချီးမြှင့်ပွဲတရပ်ကို သျှမ်းပြည်တောင်ပိုင်း တောင်ကြီးမြို့ရှိ သျှမ်းစာပေယဉ်ကျေးမှု အသင်းမှပြုလုပ်ပေးခဲ့ကြောင်း သိရသည်။


သြဂတ်စ် ၁၂ ရက်နေ့က သျှမ်းစာပေယဉ်ကျေးမှုခန်းမ၌ ကျင်းပသော အဆိုပါ  ဂုဏ်ပြုပွဲအခမ်းအနားတွင် တောင်ကြီးမြို့ရှိ သျှမ်းလူမှုအသင်းအဖွဲ့ အသီးသီးမှ ၂၀၁၆-၂၀၁၇ ပညာသင်နှစ်က ထူးချွန်အောင်မြင်ခဲ့သော သျှမ်းတိုင်းရင်းသား ကျောင်းသား/သူ ၅၆ ဦးရှိကြောင်း သိရသည်။

၆ ဘာသာ ဂုဏ်ထူးရှင် နန်းဝိုဖောင်ဟွမ် က “ဒီလိုအောင်သွားတော့ ပျော်လည်းအရမ်းပျော်တယ်၊ ဆေးကျောင်းတက်မယ်  ဆရာဝန်ဖြစ်ချင်တယ် မိဘကလည်း ဆရာဝန်ဖြစ်စေချင်တယ် ကျမကိုယ်တိုင် လည်း ဆရာဝန်ဖြစ်ချင်တယ်၊ ဘာလို့လဲဆိုတော့  ကျမ ငယ်ငယ်ကတည်းက ကျမမြင်ဖူး တွေ့ဖူးတာက  ကျမတို့ မျိုးရိုးထဲမှာ  ဖျားနာတာတွေရှိရင် တစ်ချို့လည်း ပြန်ကုလို့ ကောင်းတာ ရှိသလို တစ်ချို့လည်း  ကုမရဘဲ သေဆုံးသွားတာလည်း ရှိတယ် အဲ့လိုတွေ့တော့ စိတ်မကောင်းဘူး ကြီးလာရင် ဆရာဝန်လုပ်ပြီး လူတကာကို ကုပေးချင်တယ်၊ ဘာအလုပ်မဆို  ကြိုးစားပြီး ဖြစ်အောင်လုပ်ရင်  အောင်မြင်မှာဘဲ လို့ပြောချင်ပါတယ်” ဟု ပြောသည်။


အဆိုပါအခမ်းအနားသို့ သျှမ်းလူမှုအသင်းအဖွဲ့အသီးသီး နှင့် ကျောင်းသား မိဘများကျောင်းသား/သူ စုစုပေါင်း ၂၀၀ ကျော်တက်ရောက်ခဲ့ပါသည်။


တောင်ကြီး သျှမ်းစာပေယဉ်ကျေးမှု ဥက္ကဌ လုံးစိုင်းတင် က  “ကျနော်တို့ ကလေးတွေ အရင်ကထက် ပိုမိုချစ်ခင်ရင်းနှီးမှု ရှိလာအောင် ကိုယ့်လူမျိုး  စာပေအတွက် ရှေ့ဆက် လက်တွဲဆောင်ရွက်သွားဖို့ ကျနော်တို့ ရည်ရွယ်ပြီး ဒီဂုဏ်ပြုပွဲကို လုပ်ခဲ့တာပါ ” ပြောသည်။


၂၀၁၆-၂၀၁၇  ပညာသင်နှစ် တက္ကသိုလ်ဝင်တန်း အောင်မြင်သော သျှမ်းတိုင်းရင်းသား ကျောင်းသား/သူများမှာ ၆ ဘာသာ ဂုဏ်ထူးရှင် (၂ ) ဦး၊ ၅ ဘာသာဂုဏ်ထူးရှင် (၂ ) ဦး၊ ၄ ဘာသာဂုဏ်ထူးရှင် (၃ ) ဦး ၊ ၃ ဘာသာဂုဏ်ထူးရှင် ( ၅ ) ဦး၊ ၂ ဘာသာဂုဏ်ထူးရှင်(၇) ဦး ၊ ၁ ဘာသာဂုဏ်ထူးရှင် (၆) ဦး နှင့် ရိုးရိုးအောင်မြင်သော ကျောင်းသား/သူ (၃၁ ) ဦး  တို့ကို ဂုဏ်ပြုချီးမြှင့် ခဲ့ပါသည်။


သျှမ်းပြည်နယ်အတွင်းရှိ ၂၀၁၆-၂၀၁၇  ပညာသင်နှစ်မှာ တက္ကသိုလ်ဝင်တန်း ဖြေဆိုသူ ကျောင်းသား/သူ စုစုပေါင်း ၄၆၀၀၀ ကျော်ရှိပြီး  အောင်မြင်သူ ၁၅၀၀၀ ကျော်ရှိကြောင်း ပညာရေးဝန်ကြီးဌာနမှထုတ်ပြန်ထားသည်။