သျှမ်းလူငယ်ကွန်ရက် TYN က ပဲခူးတိုင်းဒေသကြီးရှိ သျှမ်းများနှင့်တွေ့ဆုံကာ မြန်မာနိုင်ငံလုံးဆိုင်ရာ သျှမ်းလူငယ်ကွန်ရက် တတိယအကြိမ် ညီလာခံအတွက်ဆွေးနွေးပြင်ဆင်ကြကြောင်းသိရသည်။


ဂျူလိုင်လ ၂၇ ရက် ညနေ ၃ နာရီက သျှမ်းလူငယ်ကွန်ရက်မှလူငယ်ခေါင်းဆောင် ၆ ဦး ပဲခူးတိုင်းဒေသကြီး ကျောက်တံခါးမြို့နယ်  အတွင်းရှိဒေသခံသျှမ်းများနှင့်တွေ့ဆုံခဲ့ခြင်းဖြစ်သည်။ ထိုမှတဆင့် တောင်ငူ၊ ဖြူး၊ ကျောက်ကြီး၊ ကျောက်တံခါး ၄ မြို့နယ်ရှိ သျှမ်းများနှင့်ထပ်မံတွေ့ဆုံကာ ညီလာခံကျင်းပရေးအတွက် ရှင်းလင်းပြသခဲ့သည်။

သျှမ်းလူငယ်ကွန်ရက် TYN က ပဲခူးတိုင်းဒေသကြီးရှိ သျှမ်းများနှင့်တွေ့ဆုံ

TYN လူငယ်ခေါင်းဆောင်တဦးဖြစ်သည့် စိုင်းလွယ်ခမ်းပန်က - လာမယ့်တတိယအကြိမ် ညီလာခံ အတွက်ကြို တင်တွေ့ဆုံဆွေးနွေးစီစဉ်တာ။  အခုလိုလာရောက်တွေ့ဆုံဖို့အတွက် ဒုတိယအကြိမ်ညီလာခံက တည်းကစီစဉ် ထားပြီးသား။ တတိယအကြိမ်ညီလာခံကိုလည်း ကျောက်တံခါးမြို့ သပြေတန်းမှာလုပ်ဖို့ ဆွေးနွေးကြတယ်” - ဟုပြောဆိုသည်။


၂၈ ရက်နေ့တွင်မူ တောကျွဲအင်းမြို့သို့သွားရောက်ကာ သျှမ်းဒေသခံများနှင့်တွေ့ဆုံခဲ့ကြသေးသည်။ ယခုကျင်းပမည့်ညီလာခံသည် ဒေသတွင်းလူငယ်အချင်းချင်းလက်တွဲဆောင်ရွက်သွားနိုင်ရန် ၊ အတွေ့ အကြုံဗဟုသုတ များဖလှယ်နိုင်ရန်နှင့် လူငယ်ထုအရေးလက်တွဲဆောင်ရွက်သွားနိုင်ရန်ရည်ရွယ်သည်ဟုပြောသည်။


ပထမအကြိမ် မြန်မာနိုင်ငံလုံးဆိုင်ရာ သျှမ်းလူငယ်ကွန်ရက် ညီလာခံကို ၂၀၁၃ ခုနှစ်ကလည်းကောင်း၊ ဒုတိယအကြိမ်ကို ၂၀၁၅ ခုနှစ်ကလည်းကောင်း မန္တလေးမြို့တွင်ကျင်းပခဲ့ပြီး ယခုတတိယအကြိမ်ကို ပဲခူးတိုင်းတွင်သွားရောက်ကျင်းပပြုလုပ်သွားမည်ဖြစ်ကြောင်းသိရပါသည်။