သျှမ်းပြည်နယ် မိုင်းရှူးမြို့နယ်အတွင်းရှိ ကျေးရွာအုပ်စု အချို့ မှာရွေးကောက်ပဲမကျင်းပပဲ ဖျက်သိမ်း ပေးရန် အမျိုးသား ဒီမိုကရေစီအဖွဲ့ချုပ် ပါတီကတောင်းဆိုထားသော်လည်း ပြည်ထောင်စု ရွေးကောက် ပွဲကော်မရှင် မဖျက်သိမ်းဖို့ ဆုံးဖြတ်လိုက်ကြောင်း သျှမ်းပြည်နယ်ရွေးကောက်ပွဲ ကော်မရှင်တာဝန်ရှိသူက ပြောသည်။

မဲဆန္ဒရှင် ၄၀၀၀  ခန့် ရှိသည့် သျှမ်းပြည် မိုင်းရှူးမြို့နယ်က ကျေးရွာအုပ်စု ၃ ခုဖြစ်သည့် ကွန်ကျောင်း၊ နောင်အက်နှင့် မော်မေ့ ကျေးရွာ အုပ်စုများရှိ မဲရုံများ ဖျက်သိမ်းပေးရန် အမျိုးသား ဒီမိုကရေစီအဖွဲ့ ချုပ်ပါတီ ကိုယ်စား လှယ်လောင်းက ကန့်ကွက်စာ တင်ထားသော်လည်း ပြည်ထောင်စု ရွေးကောက်ပွဲ ကော်မရှင်က ဖျက်သိမ်းခြင်းမပြုဟု ဆုံးဖြတ်လိုက်ခြင်း ဖြစ်ကြောင်း သိရသည်။


“မဲရုံတွေကိုဘဲရွှေ့ဖို့စီစဉ်ထားတယ်။ပြည်ထောင်စုရွေးကောက်ပွဲကော်မရှင်ကလည်းကြေငြာထားတယ်။ကျနော်တို့ရွေးကောက်ပွဲကိုအောင်မြင်အောင် အားလုံးက ၀ိုင်းဝန်းပြီးတော့မှ  စုပေါင်းလုပ်ဆောင် သွားမယ်  ဆိုတဲ့သဘောလည်းဖြစ်တယ်။အဲဒီအုပ်စု ၃ စုကို - ဘယ်ကိုရွှေ့မယ်ဆိုတာ အစကတည်း က လျာထားပြီးသား။ … မဲဆန္ဒရှင်တွေ သွားလာလွယ်ကူဖို့လည်း စီစဉ်ထားပါတယ် လုံခြုံရေးအရ စိတ်ချရအောင်ပေါ့။”- ဟု လွိုင်လင် ခရိုင်ရွေးကောက်ပွဲကော်မရှင် ဥက္ကဌ ဦးသန်းတင်ကပြောသည်။


မဲရုံများအား လမ်းမကြီးဘေးသို့ ရွေ့ပြောင်းမည်ဟုဆိုသော်လည်း မည်သည့်နေရာမှာ မဲရုံဖွင့်လှစ်မည် ဆိုသည့်အချက်တော ထုတ်ဖေါ်ပြောဆိုခြင်းမရှိပေ။နီးစပ်သည့်အသိုင်းအ၀ိုင်း တဦးက “အဝေးဆုံး ကျေးရွာနှင့် မဲရုံ ၄ မိုင်ထက်မပိုပါဘူး” – ဟု သျှမ်းသံတော်ဆင့်သို့ပြောသည်။


SNLD  ပြောခွင့်ရ စိုင်းလိတ်က - “မဲလုံးဝ မထည့်ရတာနဲ့ ရှင်ရင် အခုလိုမဲရုံရွေ့လိုက်တာက ကောင်း တယ် လို့ပြောလို့ရတယ်။ ဒါပေမယ့်လို့ နယ်မြေအေးချမ်းတည်ငြိမ်ပါလျက်နဲ့ ကိုယ့်ရဲ့နယ်မှာ ကိုယ်မဲမ ထည့်ရဘဲနဲ့ ၃-၄-၅ မိုင်မှာဝေးတဲ့ နေရာကိုမဲသွားထည့်ရမယ်ဆိုရင် နဂိုကတည်းက မဲပေးဖို့အပေါ်မှာ သိပ်ပြီးအာရုံလာတဲ့ဒေသခံလူထုအတွက် တော့ တော်တော်လေးကို ကြောင့်ကြရတဲ့အလုပ်ဖြစ်ပါ တယ်။သူတို့မဲလာထဲ့ဖို့တောင်မနည်းပြောရမဲ့အနေအထားမျိုး ဖြစ်နေပါတယ်” –ဟု ပြောသည်။


မိုင်းရှူး ဒေသတွင်းရှိ ကျေးရွာအုပ်စု အချို့တွင် ရွေးကောက်ပွဲ မကျင်းပရန် NLD ပါတီမှ တင်ပြခဲ့မှု အပေါ် မြို့ခံများအကြားတွင်လည်း ဝေဖန်မှုများရှိနေခဲ့သည်။


  “၂၀၁၅ မှာ လုံခြုံရေးအခြေအနေအရ ဒီလူတွေကမဲ မပေး ခဲ့ရဘူးပေါ့။ ၂၀၁၇ မှာကော ခင်ဗျားတို့ သဘောထား ဘယ်လိုလဲ။ အဲ့မှာလုပ် လို့ရလား မရလားမေးတော့ အဲ့ဒီမှာ သူတို့ သဘောထား မှတ်ချက်လာပေး တယ်။ မိုင်းရှူးမြို့နယ် ကော်မရှင်အဖွဲ့ခွဲရော အဲ့ဒီကျေးရွာအုပ်စု သုံးခုက ကော်မရှင်အဖွဲ့ခွဲတွေရော ကျေးရွာအုပ်ချုပ် ရေးမှူးတွေကော သဘောထား လာတင်ပေးဖို့ ပြောတော့သူတို့ လာတင်တယ်။ လာတင်တော့ ပိတ်သိမ်းဖို့ မသင့်ဘူးဆိုပြီး အကုန်လုံးကတင်တယ်။ ဒါကြောင့်ပါ။ UEC ပြည်ထောင်စု ကော်မရှင်ကလည်း ပြန်ကျလာပြီ မဖျက်ဖို့ဆိုပြီးတော့ပေါ့။ ' ဟု ပြည်နယ် ရွေးကောက်ပွဲ ကော်မရှင် တာဝန်ရှိသူက ပြောသည်။


အဆိုပါ ကျေးရွာအုပ်စု ၃ ခုမှာ မဲပေးခွင့်ရှိသူဦးရေ စုစုပေါင်း ၄၀၀၀ ကျော် ရှိသည့် အတွက် မဲဆန္ဒနယ်တစ်ခုလုံး၏ ၁၀ ရာခိုင်နှုန်းနီးပါးရှိနေပြီး လက်နက်ကိုင် အကြောင်းပြချက်ဖြင့် လွတ်လပ်၍ တရားမျှတသည့် ရွေးကောက်ပွဲ မဖြစ်နိုင်ဟု ဆိုကာ တောင်းဆိုခဲ့ခြင်းဖြစ်သည်။


သျှမ်းပြည် တိုးတက်ရေးပါတီ (SSPP/SSA)မှ စိုးမိုးလှုပ်ရှားသည့် ဒေသအတွင်း ကြားဖြတ်ရွေးကောက်ပွဲ အတွက် မှတ်ပုံတင်ထားသည့် မည်သည့် ပါတီမဆို လွတ်လပ်စွာ မဲဆွယ် စည်းရုံးခြင်းများ လုပ်ဆောင်နိုင်ကြောင်း လစ်လပ်မဲ ဆန္ဒနယ်များတွင် ရွေးကောက်ပွဲ ကျင်းပမည့်အပေါ် ကြိုဆိုထောက်ခံကြောင်း ဖေဖော်ဝါရီ ၂၅ ရက်စွဲဖြင့် သျှမ်းပြည်တိုးတက်ရေးပါတီ (SSPP/SSA) က သဘောထား ထုတ်ပြန်ထားပြီး SSPP/SSA နာယက ဗိုလ်ချုပ်ကြီးဆေထင်ကလည်း နယ်မြေအတွင်း လွတ်လပ်စွာ မဲဆွယ်ခွင့်ပြုထားကြောင်း သျှမ်းသံတော်ဆင့်သို့ ပြောဆိုထားသည်။