ကြားဖြတ်ရွေးကောက်ပွဲ ကျင်းပမည့် နယ်မြေများတွင် SSPP/SSA သျှမ်းပြည်တိုးတက်ရေးပါတီ သျှမ်းပြည်တပ်မတော် ဌာနချုပ်တည်ရှိရာ ၀မ်ဟိုင်းအုပ်စုလည်း ပါဝင်နေရာ မဲပေးပိုင်ခွင့်ရှိသူ အုပ်စုသားများ အတွက် ၀မ်ဟိုင်းကျေးရွာတွင် မဲပုံးထောင်မည်ဖြစ်ကြောင်း သိရသည်။

ဝမ်ဟိုင်းရှိ အခြေခံပညာအထက်တန်းကျောင်းတွင် မဲရုံ နှစ်ရုံနှင့် ပါခီးလမ်းခွဲရှိ မူလတန်းကျောင်းတွင် မဲရုံများ ထားရှိမည်ဖြစ်ကြောင်း ကျေးသီးမြို့နယ် ရွေးကောက်ပွဲကော်မရှင်မှ ထုတ်ပြန်ထားသည်။


' ၀မ်ဟိုင်း အထက်တန်းကျောင်းမှာ နှစ်ရုံ ပါခီးလမ်းခွဲမှာ တစ်ရုံရှိမယ်။ ' ဟု ကျားခေါင်းပါတီ SNLD ၏ ကျေးသီမြို့နယ် ပြည်နယ်လွှတ်တော်ကိုယ်စားလှယ်လောင်းဖြစ်သည့် စိုင်းစံမိန်းက သျှမ်းသံတော်ဆင့် သို့ ပြောသည်။


ဝမ်ဟိုင်းကျေးရွာအုပ်စုတွင် မဲဆန္ဒရှင် စုစုပေါင်း ၁၂၆၉ ဦးရှိသည်ဟု သိရသည်။


ကျေးသီးတမြို့နယ်လုံးတွင် မဲဆန္ဒရှင် စုစုပေါင်း ၅ သောင်း ၂ ထောင်ကျော်ရှိပြီး ပြည်နယ်မဲဆန္ဒနယ် အမှတ် (၁) တွင် မဲရုံပေါင်း ၂၇ ရုံနှင့် အမှတ် (၂) တွင် မဲရုံပေါင်း ၃၇ ရုံရှိသည်ဟု သိရသည်။


မြို့အဆင့် သတ်မှတ်ထားသည့် မိုင်းနောင်မြို့မှာ ပြည်နယ်လွှတ်တော် အမှတ်(၂) မဲဆန္ဒနယ်တွင် ပါဝင်ကာ ၀မ်စိမ်း ၊ ဝိန်းကောင်  မိုင်းနန်းစသည့် ကျေးရွာကြီးများ အပြင် တပ်မတော်တပ်ရင်းများလည်း ရှိနေကာ လားဟူနှင့် ပလောင်လူမျိုးများနေထိုင်သည့် ကျေးရွာများလည်း ရှိနေသည်။ ကျေးသီးအမှတ် (၁) ပြည်နယ် မဲဆန္ဒနယ်မြေတွင် SNLD သျှမ်းတိုင်းရင်းသားများ ဒီမိုကရေစီ အဖွဲ့ချုပ် ၊ ကျားဖြူပါတီ SNDP ၊ NLD နှင့် ပြည်ခိုင်ဖြိုးစသည့် ပါတီ လေးပါတီ ယှဉ်ပြိုင်မည်ဖြစ်ကာ အမှတ် (၂) တွင်မူ လားဟူပါတီပါ ၀င်ရောက်ယှဉ်ပြိုင်သဖြင့် စုစုပေါင်း ၅ ပါတီ ယှဉ်ပြိုင်ကြမည်ဖြစ်သည်။


ကျေးသီးမြို့နယ် ပြည်သူ့လွှတ်တော် မဲဆန္ဒနယ်အတွက်မူ ကျားခေါင်း ၊ ကျားဖြူ ၊ NLDနှင့် ပြည်ခိုင်ဖြိုးစသည့်ပါတီ လေးပါတီ ယှဉ်ပြိုင်ကြမည်ဖြစ်သည်။